Na'ab David ti'ebid ye o mɛ' Zugsɔb Yir la
7
1 Na'ab David n yʋ'ʋn da zin' o na'ayin ka Zugsɔb la tis o yɔlisim o dataas banɛ gilig o la wʋsa ni la, 2 o da yɛl Natan onɛ an nɔdi'es la ye, “Man na niŋ wala bɛ na'ayin ka ba maali li nɛ na'aziinr vɛnliŋa, ka Zugsɔb Nɔnaar Daka la gbɛɛnd sʋgʋrinɛ?” 3 Ka Natan lɛbis ye, “Fʋn mɔr pʋtɛn'ɛsi'a fʋ sʋnfʋn la an sʋm. Kem tuonnɛ tʋmi li, ka Zugsɔb la na bɛ nɛf!” 4 Amaa daakan la yʋ'ʋŋ Zugsɔb la labaar da kɛn Natan san'an na ye, 5 Kem yɛli m tʋmtʋm David ye man Zugsɔb la yɛl o ye, Li anɛ fʋnɛ na mɛ' yiri tis mam ka m kpɛn'ɛ? 6 Din yi man da yis Israel dim Egipt teŋin paae zina, man pʋ gbɛn yinne. Mam da bɛ nɛ sʋgʋrin yanamɛ da paae teŋ si'a wʋsa. 7 Man kennɛ Israel dim la, m nam zi' bu'os banɛ aan ba tuongatib ka m gaŋ ye ba guri m nidib Israel la ye, “Bɔ ka ya pʋ nɔk na'aziinr daadi mɛ' yiri tisi ma?” 8 Ka Zugsɔb la lɛn yɛl ye, “Tɔ, nannanna, yɛlimi m tʋmtʋm David ye man Zugsɔb Paŋtita'ar Sɔb la yɛt si'eli nwa ye, ‘M zaŋif nɛ yi kɔnbid kemʋgin na n kɛ ka fʋ lieb na'abi guri m nidib Israel dim la. 9 M dɔlli fʋ ken, fʋn keŋ zin'isi'a wʋsa, ka kadi fʋ dataasi yisi fʋ tuon. Nannanna m na maalif nintita'ar, nwɛnɛ nintitada banɛ bɛ dunia nwa nii an si'em la. 10 M na tis Israel dim banɛ aan m nidib la zin'ig, ka na zin'ili ba ka ba na mɔri ba mɛŋ teŋ ka sɔ' kʋ lɛn daami ba ya'asɛ. Nimbɛ'ɛdnam kʋ lɛm mugusi ba wʋʋ ban da niŋid si'em pin'ilʋgʋn la. 11 M pʋn dɛŋi maal nɛ'ɛŋa nɛ saŋkanɛ ka m pin'ili gaans tuongatibi tisim nidib Israel dim la. M mɛ na tisif vʋ'ʋsʋm fʋ dataas wʋsa ni ka ba kʋ zab nɛf ya'asɛ.’ ” Ka Zugsɔb la lɛn yɛl Natan ye o yɛl David ye, “Zugsɔb la mɛŋ nie pa'alif ye, ‘Mam Zugsɔb la mɛŋ na mɛ' yiri tisif. 12 Fʋ dabisa la bɛn ya'a ti paae, ka fʋ tig sa'ab, m na kɛ ka fʋ biig yinne duoe naa di'e fʋ zi'esim. O na yinɛ fʋ mɛŋ niŋgbiŋin na. M na kɛ ka o na'am la zi'en. 13 Oŋa an onɛ na mɛ' yir mam yʋ'ʋr zug. M na kɛ ka o na'am saŋa kʋ mɔr bɛnnɛ. 14 Man na aan o saam ka o mɛ aan m biig. O ya'a tʋm bɛ'ɛd m na kɛ ka nidib tɛki o tʋbir, 15 amaa m nɔŋilim la kʋ yii o san'an wʋʋ man yisi li Saul onɛ daa bɛɛ fʋ tuon la san'an si'em la. 16 Fʋ yir nɛ fʋ na'am la na bɛ saŋa wʋsa ka kʋ mɔr bɛnnɛ.’ ” 17 Natan da keŋ tu'as David Wina'am nie si'eli pa'al o la wʋsa.David winsɔsʋg
18 Ka Na'ab David duoe kpɛn' zin'in Zugsɔb la tuon ka yɛl ye, “Man aan anɔ'ɔnɛ, Zugsɔb Paŋtita'ar Sɔba, ka man yin la mɛ an bɔ ka fʋ dʋ'ʋsim ka mɔrim hali paae zina? 19 Li nwɛnɛ nɛ'ɛŋa nam pʋ paae fʋ ya'am, Zugsɔb Paŋtita'ar Sɔba, ka fʋ lɛn yɛl ye fʋ na tʋm ka li gaad ala tisim yidim bɛog sa. Fʋn tʋm nɛ ninsaal si'em nwaa, Zugsɔb Paŋtita'ar Sɔba? 20 Man David na lɛn yɛlif ye bɔ? Zugsɔb Paŋtita'ar Sɔba, bɔzugɔ fʋ mi'im, ka m aan fʋ tʋmtʋm. 21 Fʋn zi'el si'em nɛ fʋ bɔɔdim la zug, fʋ maal bʋntita'akaŋa ka nie li pa'al man onɛ aan fʋ tʋmtʋm la.
22 “M Zugsɔb Paŋtita'ar Sɔba! Sɔ' lɛn kae nwɛnɛ fɔ. Win si'a mɛ lɛn kae asɛɛ fʋn ma'aa. Ti wʋm ya nɛ ti mɛŋ tʋba ka li an sida. 23 Anɔ'ɔnɛ lɛn nwɛnɛ fʋ nidib Israel dima? Fʋnɛ da faaɛn ba yis ban da an yammis Egipt teŋin la, ye ba aan fʋ din. Fʋ da tʋm bʋnnyalima ka kadi ba dataas nɛ ba wina yis ka tisi ba teŋ sʋŋ ka fʋ yʋ'ʋr paam girima. 24 Zugsɔba, fʋnɛ zin'ili fʋ nidib Israel dim ka ba aan fʋ mɛŋ din, saŋa dinɛ ka' bɛnnɛ, ka liebi ba Wina'am.
25 “Nannanna, Zugsɔb Wina'am, kɛl ka fʋ kaanbʋg la ka fʋ zi'eli tis man kanɛ aan fʋ tʋmtʋm nɛ m yidim la, kpɛm bɛɛ ala. Tʋm wʋʋ fʋn kaanb si'em la. 26 Ala ka fʋ na mɔr yʋ'ʋtita'ar saŋa wʋsa. Ka nidib na yɛl ye, Zugsɔb Paŋtita'ar Sɔb la anɛ Israel Wina'am; ka man David yir la na zi'enɛ fʋ tuon, man aan fʋ tʋmtʋm la zug.
27 “Zugsɔb Paŋtita'ar Sɔb onɛ an Israel Wina'am, fʋ nie nɛ'ɛŋa tis man kanɛ aan fʋ tʋmtʋm la yɛl ye, ‘M na mɛ' yiri tisif.’ Alazug ka m kpɛ'ɛŋi m mɛŋi zaŋid winsɔsʋg nwaa tisidif. 28 Zugsɔb Paŋtita'ar Sɔba, fʋ anɛ Wina'am. Fʋ pian'ad wʋsa anɛ sida gʋllim, ka fʋ zi'el nɔsʋŋʋ tisim. 29 Nannanna li ya'a pie fʋ pʋʋg, fʋ niŋim man kanɛ aan fʋ tʋmtʋm la yir albareka ka kɛ ka li kpɛn yaligidi ken tuon saŋa wʋsa. Fʋn Zugsɔb Paŋtita'ar Sɔb la pian' li, ka fʋ bareka tisib pʋʋginɛ, man kanɛ aan fʋ tʋmtʋm la na mɔri fʋ albareka saŋa wʋsa.”