Nɔnaar Daka la yɛla
6
1 David da lɛn gaŋ Israel dim nidib tusa pistan', 2 ka on nɛ o nidib la da naam Baal teŋin dinɛ bɛ Juda teŋgbauŋʋn la ye ba mɔr Zugsɔb Nɔnaar Daka la lɛb Jerusalem na. Ba da buon Daka la nɛ, nɛ Zugsɔb la yʋ'ʋr ye, Zugsɔb Paŋtita'ar Sɔb. Onɛ bɛ Kerubnam la zugin ka Wina'am girima nɛ o paŋ bɛɛ ba teŋsʋk. 3 Ka ba nɔk Wina'am Nɔnaar Daka la niŋ tɛreko paalin, mɔri yi Abinadab yin dinɛ bɛ kʋkʋn zug la. Uzaa nɛ Ahio banɛ an Abinadab biis la da dɔlisid tɛreko la 4 ka Wina'am Nɔnaar Daka la bɛɛ li zug, ka Ahio gaadi li tuon. 5 David nɛ Israel nidib la wʋsa da maannɛ sumalisim nɛ ba sʋʋnr wʋsa Zugsɔb la tuon. Ba da yʋ'ʋmnɛ ka piebid wiis ka nwɛ'ɛd googinam nɛ siyada. 6 Ban da paae Nakon zieŋin la, Uzaa da gban'e Wina'am daka la bɔzugɔ niigi la da tu'ug nɛ ka daka la bɔɔd liib. 7 Zugsɔb la sʋnf da duoe nɛ Uzaa, on pʋ tis Zugsɔb daka la na'asi la zug. Wina'am da nwɛ' o bas ka o kpi Zugsɔb daka la baba, 8 Ka David sʋnf pɛlig bɔzugɔ Zugsɔb la sʋnpɛɛn da lu Uzaa zug. Ka din yi saŋkanɛ paae zina ba buon zin'ikan la ye Perez Uzaa.a 9 David da zɔ Zugsɔb la dabiem daakan la, ka yɛl ye, “M ye m niŋ wala ka mɔr Zugsɔb daka la kuli m san'an na?” 10 O da pʋ bɔɔd ye o siaki di'e Zugsɔb daka la ka li keŋ David Teŋinɛ. Ka lɛɛ mɔri li keŋ Obɛd-Edom onɛ an Gaf nid la yin.11 Zugsɔb daka la da kpɛm bɛ nɛ Obɛd-Edom onɛ an Gaf nid la yinne paae nwadis atan', ka Zugsɔb la niŋ o albareka, on nɛ o yidim wʋsa.
Nɔnaar Daka la lɛb Jerusalem
12 Ba da yɛl na'ab David ye, “Zugsɔb la niŋ Obɛd-Edom nɛ o yidim nɛ on mɔr si'el wʋsa albareka, ka li anɛ Zugsɔb daka la zug.” Ka David keŋ Obɛd-Edom yinne nɔk Zugsɔb daka la mɔri keŋ David Teŋin ka maal sumalisim. 13 Banɛ da ziid Zugsɔb Nɔnaar Daka la ya'a yak nɔba ayuobʋ, o kʋʋdnɛ lɔlig nɛ na'apɔlli maal maan. 14 David da yɛnɛ dansik ma'aa wa'ad Zugsɔb la tuon nɛ o sʋnf wʋsa. 15 Ka on nɛ Israel dim wʋsa mɔr Zugsɔb daka la kena ka tansid agɔl gɔla ka piebid na'atana. 16 Zugsɔb daka la ti kpɛn'ɛd David teŋin la, ka Mikal onɛ an Saul pu'ayua la gɔsid takoro ni. Ka on nyɛ David n wa'ad Zugsɔb la tuon si'em la o nɛ'ɛs o, o sʋʋnrin. 17 Ka ba mɔr Zugsɔb daka la na kpɛn'ɛs Fuug Sʋgʋr kanɛ ka David ti' li yɛla la. Ka David maal maana linɛ nyu'od nɛ bugum nɛ taaba la'asʋg maana Zugsɔb la tuon. 18 On da maal malʋŋ dinɛ nyu'od bugum nɛ taaba la'asʋg maannɛ naae la, o da kaanb, kaanb sʋŋʋ tis nidib la Zugsɔb onɛ an Paŋtita'ar Sɔb la yʋ'ʋr zug. 19 Ka nɔk bodobodo nɛ tiwala pʋdig Israel dim la wʋsa pu'ab nɛ dap. Ka nidib la wʋsa lɛbi kuli ba yaan.
20 Lin nya'aŋ David da lɛb yin ye o niŋ o yidim albareka, ka Mikal onɛ an Saul pu'ayua la yina tʋ'ʋs o ka yɛl ye, “Zina Israel na'ab la maal o mɛŋi bɛɛ o kɔn'! O yaal o mɛŋ sankpan'asnam nɛ pu'asada tuon nwɛnɛ ninyɔɔdi niŋid si'em.” 21 David da yɛl Mikal ye, “Li anɛ Zugsɔb la tuon ka m wa'ad. Onɛ gaŋim ka basi fʋ saam nɛ o yidim wʋsa, ka zaŋimi zi'el ye m gur o nidib Israel dim la. M na maal sumalisim Zugsɔb la tuon. 22 M na maligim maali m mɛŋ ninyaalig ka diisi m mɛŋ nyan hali gaad ala. Amaa li ya'a anɛ sankpan'asnam nɛ pu'asada la yɛla, man nan kpɛm mɔri m na'asi la!”
23 Mikal onɛ an Saul pu'ayua la da pʋ du'a biiga hali ti paae o kum daar.