16
1 Ba da mɔr Wina'am Daka la na kpɛn'ɛs fuug dɔɔg kanɛ ka David ti' ye ba kpɛn'ɛsi li la. Ka David maal nyu'or maan nɛ taaba la'asʋg maan Wina'am tuon. 2 On da maal nyu'or maan nɛ taaba la'asʋg maan la naae la, o da kaanb, kaanb sʋŋʋ tis nidib la Wina'am yʋ'ʋr zug. 3 Ka nɔk diibi pʋdig Israel dim la, pu'ab nɛ dap wʋsa.4 O da gaŋ Levi dim la sieba ye ba tʋm Daka la tʋʋma Zugsɔb la tuon, ka an nu'unwɛ'ɛdib, ka maan bareka pʋ'ʋsim, ka wɔ'ɔgid Zugsɔb onɛ an Israel Wina'am la. 5 Ba tuongat da anɛ Asaf, ka Zakaria tia'al, nɛ Jeyel nɛ Siemiramof nɛ Jehel nɛ Matitia nɛ Eliab nɛ Benaya nɛ Obɛd-Edom nɛ Jeyel. Ban tʋʋm da anɛ ba nwɛ' kɔna ka pieb wiis, Asaf tʋʋm da anɛ ye o nwɛ'ɛd siyada. 6 Ka Benaya nɛ Jahaziel banɛ da an maanmaannib la tʋʋm da anɛ ye ba piebid na'atana saŋa wʋsa Wina'am Nɔnaar Daka la tuon.
David yʋʋm kanɛ pian'ad Wina'am yʋ'ʋr la
7 Daakan la David da tis Asaf nɛ banɛ dɔl o nya'aŋ la yʋʋm kaŋa ye ba yʋ'ʋm pʋ'ʋs Zugsɔb la:
8 Pʋ'ʋsimi Zugsɔb la bareka, buolim o yʋ'ʋr;
kɛl ka tɛɛns la wʋsa baŋ on maal si'el.
9 Yʋ'ʋm tis o, yʋ'ʋm zun'e o;
mɔɔlim o tʋʋmnyalima la wʋsa.
10 Maalim sumalisim Zugsɔb la yʋ'ʋri an kasi la zug;
kɛl ka banɛ ieed Zugsɔb la wʋsa maal sumalisim.
11 Gɔsimi Zugsɔb nɛ o paŋ la;
ieminɛ o zin'ig saŋa wʋsa.
12-13 Yanam Israel yaas banɛ aan o tʋmtʋmnib,
nɛ Jakob biribis banɛ ka o gaŋ la,
tɛnri nyalima banɛ ka o maal la
nɛ tʋʋm kilima banɛ ka o tʋm la nɛ on kat saria si'em yɛla.
14 Onɛ aan ti Zugsɔb Wina'am;
ka o sariakadib bɛ dunia wʋsa ni.
15 O tɛnri o nɔnaar la yɛla saŋa wʋsa,
nɛ o pian'ʋk linɛ ka o tis zʋmaana tusir la,
16 nɔnaar linɛ ka o da naalim nɛ Abraham,
nɛ on pɔɔ zi'el si'eli tis Isaak la.
17 O da maligim tiɛn li tis Jakob ye li anɛ o nɔzi'elʋg,
ka pa'al Israel ye li anɛ o nɔnaar linɛ ka' naarɛ.
18 O da yɛl ye, “Fʋn ka m ye m nɔk Keenan teŋ la tis
ka li liebi fʋ faar.”
19 Saŋa kan ka ba kal da nam pʋ zu'oe la;
sida, ba da pɔɔd ka mɛ an saam teŋin la.
20 Ba da gɔɔndi giligid teŋ-teŋ
yit sʋ'ʋlim yinne ken sʋ'ʋlim yinne ni.
21 O da pʋ kɛ ka sɔ' mugusi baa;
ba yɛla ka o da zɛrig na'anam ka yɛli ba ye,
22 “Mid ka ya si'is onɛ ka man gaŋ la;
da niŋi m nɔdi'esidib la si'ela.”
23 Dunia wʋsa yʋ'ʋm yʋʋma pian' Zugsɔb la,
yɛlimini o faangir kanɛ ka' naar la yɛla daar wʋsa.
24 Kɛlli ka dunia wʋsa wʋmi o girima la yɛla,
ka kɛ ka nidib la baŋ o tʋʋmnyalima la yɛla.
25 Zugsɔb la anɛ kpi'euŋ sɔb ka nar nɛ wɔ'ɔgir,
onɛ nar ye ti zɔɔ o gaad wina wʋsa.
26 Bɔzugɔ tɛɛns la wina la wʋsa anɛ bada
amaa Zugsɔb la maal saŋgbana.
27 Vɛnlim nɛ kpi'euŋ ma'aa bɛɛ o san'an,
paŋ nɛ sumalisim mɛ bɛ on bɛ si'el la.
28 Yanam nimbanɛ bɛ tɛɛsin la wʋsa pian'am Zugsɔb la,
pian'ami Zugsɔb la, o girima nɛ o paŋ la zug.
29 Zun'omi Zugsɔb la wʋʋ o yʋ'ʋr la nar si'em.
Mɔri piini kɛɛn o san'an na;
zun'omi Zugsɔb la, o girima nɛ o kasi bɛllim la zug.
30 Dunia wʋsa zɔm o dabiem.
Dunia la zi'enɛ kiŋ-kiŋ; li ka' linɛ vurigida.
31 Kɛl ka agɔl maal sumalisim ka dunia maal sumpielim.
Kɛl ka ba yɛl dunia wʋsa sʋʋgin ye, “Zugsɔb la an Na'ab!”
32 Kɛl ka atɛuk maligim maal tʋkpiidʋg,
nɛ teŋgbauŋ la, nɛ linɛ bɛɛ li ni wʋsa.
33 Tibanɛ bɛ sian'arin la na yʋʋm;
ba na yʋʋm nɛ sumalisim,
on kenna ye o kad dunia saria la zug.
34 Pʋ'ʋsimi Zugsɔb la bareka on an sʋm la zug;
o nɔŋilim la bɛ nɛ saŋa linɛ ka' bɛnnɛ.
35 “Kaasimi kuŋ ye,
‘O Zugsɔba, fʋnɛ aan ti faangid, faanmi ti;
la'asimi ti ka faaɛn ti yis teŋ zʋŋ dim la ni,
ka ti na pʋ'ʋsi fʋ yʋ'ʋr linɛ an kasi la bareka,
ka ti na paam girima fʋ wɔ'ɔgir la pʋʋgin.
36 Zun'or anɛ Zugsɔb la din, onɛ an Israel Wina'am la,
lin yi nannanna nɛ saŋa linɛ ka' bɛnnɛ.’ ”
Ka nidib la wʋsa yɛl ye, “Ami! Zun'omi Zugsɔb la.”
37 David da bas Asaf nɛ o taaba la Zugsɔb Nɔnaar Daka la zin'igin ye ba maan maana saŋa wʋsa wʋʋ dabisir wʋsa nar ye li maan an si'em. 38 O mɛ da bas Obɛd-Edom nɛ o taaba pisyuobʋ nɛ anii la ye o tʋm nɛ ba. Obɛd-Edom sɔ' mɛ da bɛ, onɛ da an Jedutun biig, ka on nɛ Hoosa da an banɛ gur za'anɔɔr.
39 David da kɛ ka Zadok onɛ an maanmaan la nɛ o taaba la kpɛn tʋm Zugsɔb Pʋ'ʋsim Fuug Sʋgʋrin la, maan zin'ig linɛ bɛ Gibeon teŋin la. 40 Ba da maan nyu'or maana tisid Zugsɔb la maan daka la zug saŋa wʋsa, bɛogʋn nɛ zaam wʋʋ lin sɔb si'em Zugsɔb zi'elʋgin linɛ ka o da zi'eli tis Israel dim la. 41 Banɛ da paas da anɛ Heman nɛ Jedutun nɛ banɛ ka ba gaans ka buoli ba yʋda ye ba tis Zugsɔb la bareka pʋ'ʋsim la, “Bɔzugɔ o nɔŋilim la bɛ nɛ saŋa linɛ ka' bɛnnɛ.” 42 Heman nɛ Jedutun tʋʋm da anɛ ba piebid na'atana ka nwɛ'ɛd siyada nɛ bʋnnwɛ'ɛda banɛ kpɛlim la ka yʋ'ʋm yʋʋm sʋma. Jedutun tuŋ dimi mɛ da gur teŋ la yaŋir.
43 Ka nidib la wʋsa lɛbi kul, sɔ' wʋsa nɛ o yin, ka David lɛb ye o kaanb, kaanb sʋŋʋ tis o yidim.