Ba mɔr Nɔnaar Daka la kɛn Jerusalem na la
15
1 David n da mɛ dɔɔdi naae zin'ikanɛ ka ba buon ye David Teŋ la, o da bɔ zin'igi maali ti' fuug sʋgʋri niŋ Wina'am Daka la ani. 2 Ani ka David yɛl ye, “Levi dɔɔg dim la ma'aa na zi Wina'am Daka la, bɔzugɔ Zugsɔb la da gaŋnɛ ban ye ba ziid o Daka la ka tʋmmi o tʋʋma saŋa linɛ ka' bɛnnɛ.”3 David da la'as Israel dim wʋsa Jerusalem teŋin ye ba mɔr Zugsɔb Daka la kɛn zin'ikanɛ ka o maal ye li bɛ la. 4 O da buol Aaron nɛ Levi yaas la la'as na. Ba da anɛ:
5 Kohat tuŋ la ni: Uriel da aan ba tuongat nɛ o nidib kɔbiga nɛ pisi (120); 6 Merari tuŋ la ni: Asaya da aan ba tuongat nɛ o nidib kɔbisyi' nɛ pisi (220); 7 Gerson tuŋ la ni: Joel da aan ba tuongat nɛ o nidib kɔbiga nɛ pistan' (130); 8 Elizafan tuŋ la ni: Semaya da aan ba tuongat nɛ o nidib kɔbisyi' (200); 9 Hebron tuŋ la ni: Eliel onɛ an tuongat la nɛ o nidib pisnii (80); 10 Uziel tuŋ la ni: Aminadab da aan ba tuongat nɛ o nidib kɔbiga nɛ pii nɛ ayi' (112);
11 David da buol Zadok nɛ Abiata banɛ an maanmaannib la na, nɛ Uriel nɛ Asaya nɛ Joel nɛ Semaya nɛ Eliel nɛ Aminadab banɛ an Levi dɔɔg nidib la, 12 ka yɛli ba ye, “Yanamɛ an maanmaannib tuŋ la tuongatib. Kɛlli ka yanam nɛ ya Levi taaba la maali ya mɛŋ nyain, ka mɔr Zugsɔb onɛ an Israel Wina'am la Daka kɛn zin'ikanɛ ka m maal ye li bɛ la na. 13 Li anɛ yanam Levi dɔɔg dim la daa pʋ bɛ nɛ ti li pin'ilʋgʋn la kɛ ka Zugsɔb onɛ aan ti Wina'am la sʋnf daa pɛlig nɛ ti. Ti daa pʋ bu'os o baŋ din nar ye ti zii li si'em.” 14 Alazug maanmaannib la nɛ Levi dɔɔg dim la da maali ba mɛŋ nyain linɛ na kɛ ka ba nyaŋi zi Zugsɔb onɛ an Israel Wina'am Daka la na. 15 Levi dim la da zi Wina'am Daka la nɛ li dapuuda la ba biankimpiind zug, wʋʋ Zugsɔb la da tis Moses nɔɔr ka pa'al si'em la.
16 David da yɛl Levi dɔɔg tuongatib la ye ba gaŋimi ba ba'abiis banɛ na yʋ'ʋmid, ka ba nwɛ'ɛd kɔna nɛ siyaaris nɛ galana ka piebid wiisi yʋ'ʋm sumalisim yʋʋma.
17 Alazug Levi dɔɔg dim la da gaŋ Heman onɛ an Joel biig la, nɛ Asaf onɛ an Berekaya biig la: ba ba'abiis Merari tuŋ la ni ba da gaŋ Etan onɛ an Kuseaya biig la. 18 Ba ba'abiis banɛ da tia'al la anɛ Zakaria nɛ Jaaziel nɛ Siemiramof nɛ Jehel nɛ Uni nɛ Eliab nɛ Benaya nɛ Maaseya nɛ Matitia nɛ Elifelehu nɛ Miknɛya nɛ Obɛd-Edom nɛ Jeyel banɛ gur za'anɔɔr la. 19 Yʋʋma dimi la, Heman nɛ Asaf nɛ Etan tʋʋm da anɛ ye ba nwɛ' kʋntzɛn'ug bʋnnwɛ'ɛda la. 20 Zakaria nɛ Aziel nɛ Siemiramof nɛ Jehel nɛ Uni nɛ Eliab nɛ Maaseya nɛ Banaya tʋʋm da anɛ ba nwɛ' kɔna la dɔlis nɛ Alamof gbana la pa'an si'em la, 21 nɛ Matitia nɛ Elifelehu nɛ Miknɛya nɛ Obɛd-Edom nɛ Jeyel nɛ Azazaya tʋʋm da anɛ ye ba nwɛ' kɔna la wʋʋ Seminif gbana pa'al si'em la. 22 Kanania onɛ an Levi dim tuongat la da sʋ'oe yʋʋma yɛla, linɛ da aan o tʋʋm bɔzugɔ o da mi' li nɛ hali.
23 Berekaya nɛ Elkana da gur Daka la bɛ dɔsi'a la za'anɔɔr. 24 Siebanaya nɛ Joseafat nɛ Netanɛl nɛ Amasai nɛ Zakaria nɛ Banaya nɛ Elieza da anɛ maanmaannib, ba tʋʋm da anɛ ye ba pieb na'atana Wina'am Daka la tuon. Obɛd-Edom nɛ Jehel mɛ da guri Daka la dɔɔg za'anɔɔr.
Ban nɔk Nɔnaar Daka la lɛbid Jerusalem la yɛla
25 David nɛ Israel kpɛɛmnam nɛ banɛ gat zabzabidib tusir tuon la da keŋ ye ba nɔk Zugsɔb Nɔnaar Daka la yi Obɛd-Edom yin nɛ sumalisim. 26 Wina'am da sʋŋ Levi dim banɛ da ziid Zugsɔb Nɔnaar Daka la zug, ba da kʋ na'araad ayɔpɔi nɛ pɛraad ayɔpɔi. 27 David da yɛnɛ fuwɔk linɛ pɛlig wʋʋ Levi dim banɛ ziid Daka la fuud la, nɛ banɛ da an yʋʋmyʋ'ʋmnib la, nɛ Kanania onɛ pa'an yʋʋmyʋ'ʋmnib la. David mɛ da yɛ dansika paas. 28 Alazug Israel dim wʋsa da zi Zugsɔb Nɔnaar Daka la kena ka tansid agɔla gɔla ka piebid na'atana nɛ wiis, ka nwɛ'ɛd galana nɛ googinam nɛ siyaaris. 29 Ka Zugsɔb Nɔnaar Daka la ti kpɛn'ɛd David teŋin la, ka Mikal onɛ an Saul pu'ayua la gɔsid takoro ni. Ka on nyɛ David n wa'ad Zugsɔb la tuon si'em la ka o nɛ'ɛs o, o sʋʋnrin.