David n nyaŋ Ammon dim la yɛla
19
1 Li da paae saŋa si'a ka Ammon na'ab Nahas kpi, ka o biig Hanun dii o saam na'am. 2 Ka Na'ab David tɛn'ɛs ye, “M na maal Hanun onɛ an Nahas biig la pʋpielim wʋʋ o saamme mɛ da maalim pʋpielim si'em la.” Dinzug, o da tʋm nidib ye ba keŋ pʋ'ʋs Hanun saam kʋʋr la. David nidib la paae Ammon dim teŋin la ka keŋ Hanun san'an ye ba pʋ'ʋs o kʋʋr la. 3 Ka Ammon dim kpɛɛmnam la yɛl Hanun onɛ aan ba zugdaan la ye, “Fʋ tɛn'ɛs ye David na'as nɛ fʋ saam la ka tʋm nidib na ye ba pʋ'ʋsɛɛ? Ayei, fʋ zi' ye David tʋm o nidib la nɛ ye ba kena labisi gɔs teŋ la ka o ti kena zabi faaɛn lii?” 4 Alazug Hanun da gban'e David nidib la pʋni ba tiemis la ka maki ba gbina zinzema nwaasi ba fuud la bas ka kadi ba yis.5 Ban da yɛl David yɛl kaŋa yɛla la, o da tʋmi o tʋmtʋmnib ka ba tʋ'ʋsi ba, ban daa diisi ba nyan la zug. Ka ba yɛli ba ye, “Kpɛlimi Jeriko teŋin ka ya tiemis la bus ka ya nyaan kul na.”
6 Hanun nɛ Ammon dim la baŋ ye ba pɔ'ɔg David la, ka keŋ da' zabzabidibi paasi ba mɛŋ. Ba da nɔk anzurifa gbila tusir ye ba keŋ da' zaba tɛrekonam nɛ wiedban'adibi yi Aram Naharam nɛ Aram Maaka nɛ Zoba tɛɛnsin. 7 Ba da da' tɛrekonam nɛ wiedban'adib la tusa pistan' nɛ ayi' (32,000) la'am nɛ Maaka na'ab nɛ o zabzabidib banɛ da kena la'as taaba diginɛ kpi'en nɛ Medeba teŋ la. Ammon dim la mɛ da yii ba tɛɛns la wʋsa ni na ti'eb ye ba zab.
8 David n da wʋm nɛ'ɛŋa la, o da tʋm Joab nɛ zabzabidib la wʋsa. 9 Ka Ammon dim la yina, ti'eb zaba ti'ebʋgʋ ba teŋ la za'anɔɔrin, ka na'anam banɛ kena la la'asi zi'e sian'arin zin'ig yinne.
10 Joab n da nyɛ ka zabzabidib la gilig o tuon nɛ o nya'aŋ wʋsa la, o gaans Israel zabzabidib banɛ an ninkpi'ema ka mi' zaba sʋ'ʋŋa la zi'eli ba gu' Aram dim la. 11 Ka zaŋ banɛ kpɛlim la niŋ Abisai onɛ aan o pitʋ la nu'ugin ka kɛ ka ba gu' Ammon dim la. 12 Joab da yɛl o ye, “Aram dim la ya'a kpi'emi gaadi m paŋ, li anɛ ye fʋ kena sʋŋim, amaa Ammon dim la ya'a kpi'emi gaadi fʋ paŋ, mam mɛ na kena sʋ'ʋŋif. 13 Zi'enim sʋ'ʋŋa ka kpɛ'ɛŋi fʋ sʋnf ka ti zabi ti nidib nɛ ti Wina'am teŋ la yɛla. Zugsɔb la na maal linɛ ka o mɛŋ bɔɔd.” 14 Ka Joab nɛ o nidib la keŋ tuonnɛ zab nɛ Aram dim la, ka ba zɔɔ widig. 15 Ammon dimi nyɛ ka Aram dim la zɔt la ka ba mɛ zɔɔ keŋ kpɛn' tempʋʋgin la ka bas Abisai. Ka Joab bas Ammon dim la zaba ka lɛb Jerusalem na.
16 Aram dim la da nyɛ ka Israel dim nyaŋidi ba la, ba da tʋm buol Aram nimbanɛ bɛ kɔldaug lɔ'ɔm la, ka Siofak onɛ an Hadadeze zabzabidib kpɛɛm la gaadi ba tuon.
17 Ban da yɛl David nɛ'ɛŋa la, o da la'as Israel dim wʋsa, lɔ'ɔŋ Joodan kɔldaug la tʋ'ʋsi ba. Aram dim la da zi'en nɛ maal siri ye ba tʋ'ʋs David n zab nɛ o. David nɛ o nidib la da ti'ebi zi'enɛ zab nɛ ba. 18 Amaa ba da zɔya ka bas Israel dim, ka David kʋʋ ba zabzabidib banɛ mɔr tɛrekonamɛ zabid la tusa ayɔpɔi (7,000) ka mɛ kʋ zabzabidib banɛ ken nɔba zabid la tusa pisnaasi (40,000). O mɛ da kʋ Siofak onɛ aan ba tuongat la.
19 Nidib banɛ wʋsa da la'as nɛ Hadadeze ka nyɛ ka Israel dim nyaŋi ba la, ba da mɔr sumbʋgʋsʋm nɛ Israel dim ka liebi ba tʋmtʋmnib.
Dinzug, Aram dim la da zɔ dabiem ka pʋ lɛn sʋŋ Ammon dim la ya'asɛ.