Na'ab David nyaŋir yʋʋm
18
1 Man nɔŋ fʋn Zugsɔb onɛ aan m paŋ daan la.2 M Zugsɔba, fʋnɛ aan m tampiing,
m suak zin'ikpi'euŋ nɛ m faangid.
M Wina'am la anɛ m gbanti'edʋg, o san'an ka m su'ad.
Onɛ lusidim ka aan m vʋm la paŋ, nɛ m kpi'euŋ zin'ig.
3 M buol Zugsɔb onɛ nar nɛ zun'or la,
ka paam yɔlisim yii m dataas nu'usin.
4 Kum lɔbi giligim nwɛnɛ nwiis nɛ,
ka kum ku'onwiis libigim yɔɔg-yɔɔg.
5 Ayaʋg lɔb nwiisi giligim,
ka Akum bɛndim nɛ baans.
6 M mugusʋg pʋʋgin m daa buolnɛ Zugsɔb la,
m daa kaasi tisim Wina'am la bɔɔd sʋŋir,
ka o naanɛ o Pʋ'ʋsim Yin la ka wʋm tisim,
m kukuma la paae o san'an ka kpɛn' o tʋba ni.
7 Teŋgbauŋ la damnɛ ka mi'im zika-zika,
hali ka zuoya la gbina dammid;
ba mi'imnɛ o sʋnfʋ duoe la zug.
8 Nyɔ'ɔs daa naanɛ o nyɔnya nii yina;
ka bugum linɛ kanbid yii o nɔɔrin na,
ka bugumsaana linɛ dit yii li pʋʋgin na.
9 O da buak agɔla ka sig na,
ka saŋgbansabilig bɛɛ o nɔba teŋir.
10 O da ban' Kerub la iank.
Ka sisi'em da'ad o ken tɔ'ɔtɔ wʋʋ niiŋ nɛ.
11 O da nɔk liki su'a o mɛŋ,
ka kɛ ka saa saŋgbansabilig gilig o.
12 Saŋgbana nɛ sakuga nɛ sa-ian'asʋg
naan nɛɛsim linɛ bɛɛ o san'an la yina.
13 Zugsɔb la tans wʋʋ saa nɛ arezana ni;
Onɛ Gaad Si'el wʋsa la lɛn vu ya'as.
14 O da tɔɔn o piema la widigi o bi'emnam,
ka kadi ba nɛ sa-ian'astita'ar.
15 Zugsɔba, fʋ tansʋg
nɛ pɛbistita'ar kanɛ yii fʋ nyɔnya ni na la
kɛ ka Atɛuk ku'osuoya nɛ
teŋgbauŋ ɛɛnbir nie paalʋ.
16 O naan agɔlli su'uni gban'e m nu'ugʋ
yaami yis ku'ozuluŋ pʋʋgin.
17 O faanmi yisi m dataas banɛ mɔr paŋ hali la ni,
banɛ kisim ka mɔr paŋi gatim la.
18 Ba daa kena ludimi m dabisbɛ'og daar,
amaa ka Zugsɔb la sʋŋim.
19 O daa mɔrimi yii keŋ paae zin'ikanɛ an yaliŋa.
O daa faanm, on nɔŋim la zug.
20 Zugsɔb la tʋmnɛ tisim
wʋʋ man an pʋpiel si'em la.
M nu'usi an nyain la zug ka fʋ tisim piini.
21 Man dɔlis Zugsɔb suoya la wʋsa;
m pʋ tʋm tʋʋmbɛ'ɛdi
fɛndig ka basi m Wina'am.
22 M dɔlisid o wada la wʋsa,
m pʋ fɛndig ka bas o zi'ela la.
23 O pʋ nyɛ gba'asi'a m san'anɛ,
m mɔɔ gban'e m mɛŋ ka pʋ tʋm bɛ'ɛdɛ.
24 M pʋpielim la zug ka Zugsɔb la niŋi m zug bareka.
M nu'usi an nyain la zug ka o tisim piini.
25 Banɛ an sida dim la, fʋ pa'annɛ ba nɛ ye fʋ anɛ sida sɔb,
banɛ ka' gba'ar la, fʋ pa'annɛ ba ye fʋ mɛ ka' gba'arɛ.
26 Banɛ an nyain la, fʋ pa'annɛ ba ye fʋ anɛ nyain.
Amaa banɛ bɛllim pʋ dɔl suor la,
fʋ mɛ pa'annɛ ba ye fʋ mi' ba gbin.
27 Fʋ faand banɛ siedi ba mɛŋ la,
ka sigisid nyɛɛsim dim wʋsa.
28 Zugsɔba, fʋnɛ kɛt ka m fitir la kpɛn dit,
Wina'am la kɛ ka lik lieb nɛɛsim tisim.
29 Fʋ sʋŋir la zug, m na nyaŋi zab nɛ m dataas.
Wina'am paŋ zug, m na ianki gaŋ zaŋguom tita'ar.
30 Ya'a an sida, Wina'am suoya la an sʋ'ʋŋa.
Zugsɔb la pian'ad pʋ mɔr zirii;
onɛ lusid banɛ wʋsa su'a o san'an la.
31 Anɔ'ɔnɛ an Wina'am ka ya'a ka' Zugsɔb la?
Ka anɔ'ɔnɛ an Tampiing kanɛ kpi'em
ka li ya'a ka' ti Wina'am la?
32 Li anɛ Wina'am la tisidim paŋ,
ka maannɛ m suor sʋ'ʋŋa.
33 O maali m nɔba wʋʋ walig nɔba nɛ,
ka dʋ'ʋsimi zi'el zuor zug.
34 O pa'alim man na zab si'em,
m nu'us tun'e pɔnd kʋntzɛn'ug tiraug.
35 Fʋ zaŋ nɛ zaba gbanti'edʋgʋ lusim ka m nyaŋi m dataas,
ka fʋ datiuŋ nu'ug gurim.
Fʋ sʋŋir kɛ ka m an nintita'ar.
36 Fʋ yalig suokanɛ bɛɛ m tuon la,
ka m nɔba kʋ sadigɛ.
37 M kadi m dataas la paae ba,
ka pʋ fɛndig nya'aŋa, hali nɛ mam ti san'ami ba wʋsa.
38 M nwɛ' ba digil teŋinɛ m nɔba ni
ka ba mak duori gʋ'ʋŋ.
39 Fʋ tisim paŋ kanɛ na zab,
ka kɛ ka m dataas igini m tuon.
40 Fʋnɛ kɛ ka m dataas fɛndigi zɔ ka basim,
ka m kʋ banɛ kisim la wʋsa.
41 Ka ba kaasi bɔɔd sʋŋir,
amaa sɔ' kae na faaɛn ba.
Ba kaasi tis Zugsɔb la ka o pʋ gi'e gɔsi ba.
42 M bʋ' ba hali
ka ba ti nwɛnɛ uusʋg ka pɛbisim ziidi kennɛ;
m kpa'ae ba bas pal zug wʋʋ bian'ar nɛ.
43 Fʋ faanmi yis nimbanɛ kisim la nu'usin,
ka kɛ ka m lieb tɛɛns la zugdaan;
ka sʋ'oe nimbanɛ ka m zi' ba.
44 Teŋ zʋŋ dim kenna iginidi m tuon
m ya'a yɛl si'el ba siakid nɛ tisidim tɔ'ɔtɔ.
45 Ba wʋsa giinla kɛns nɛ,
ka ba kiridi yiti ba kpi'euŋ zin'isin kenna.
46 Zugsɔb la sid bɛ! Zun'or anɛ m Tampiing la din!
Wina'am onɛ aan m faangid la nar nɛ zun'or!
47 O anɛ Wina'am onɛ yɔɔd banɛ tʋmmim bɛ'ɛd la sam,
ka nyaŋid tɛɛns banɛ ka m sʋ'oe ba la,
48 o faanmi yisi m dataas nu'usin.
Fʋ dʋ'ʋsimi gaadi m dataas,
ka faanmi yis banɛ bɔɔd zaba la ni.
49 Alazug, Zugsɔba, m na na'asif buudi wʋsa sʋʋgin,
m na yʋʋm wɔ'ɔgi fʋ yʋ'ʋr la.
50 O kɛt ka o na'ab nyaŋid o dataas,
ka pa'an o nɔŋir kanɛ pʋ naadi
tis onɛ ka o bu'oe malʋŋ kpaam niŋ o zugin la.
Ɛɛn! O sʋŋid man David,
ka na sʋŋi m biis nɛ m yaas wʋsa
hali nɛ saŋa linɛ ka' bɛnnɛ.