Agɔla pa'annɛ Wina'am girima an si'em
19
1 Agɔla pa'annɛ Wina'am girima an si'em;saŋgbana la mɛ mɔɔnnɛ o nu'ug tʋʋma yɛla.
2 Dabisir wʋsa ba pian'adnɛ,
yʋ'ʋŋ wʋsa ba pa'annɛ o baŋiri an si'em.
3 Fʋ kʋ wʋm ka ba pian'ad bɛɛ yɛt si'ela
amaa la'am nɛ wala,
teŋgbauŋ la wʋsa mi' ba yɛla.
4 Ba tiig teŋ wʋsa,
ka ba labaar paae dunia bɛn la.
Wina'am maal zin'ig agɔlli tis winnig la
5 ka li nwɛnɛ pu'apaal sidi naanɛ o dɔɔgin yit na,
bɛɛ zɔzɔti zɔɔ nyaŋ
ka maan sumalisim ye o lɛn zɔ.
6 Winnig la yitnɛ nya'aŋi gaadi keŋ lu tuon,
si'el kae na su'a ka o tʋʋlʋg kʋ paae lii.
7 Zugsɔb wada la an sʋm hali,
ka tɛndigid ninsaal sʋnf.
Zugsɔb la pa'alʋg anɛ sida,
ka kɛt ka banɛ zi' si'el la paam baŋir.
8 Zugsɔb la sa'alʋg dɔl suor,
ka tisid sumalisim.
Zugsɔb la zi'ela mɔr nɛɛsim
linɛ nied ninsaal nini.
9 Zugsɔb la zɔtim anɛ nyain
ka na bɛ saŋa linɛ ka' bɛnnɛ.
Zugsɔb la zi'el si'el la zi'enɛ kiŋ-kiŋ
ka pʋpielim bɛɛ li pʋʋgin hali.
10 Li an sʋm gat sanlimsʋŋ,
li gat sanlimmɛŋir bɛdegʋ.
Li malisi gat siind,
li gat siind linɛ siligi yi singbana ni na.
11 Li ni ka m paamid nimmua sa'alʋg;
man kanɛ aan fʋ sankpan'as la,
m ya'a dɔlli li, li mɔri nyɔɔd bɛdegʋ.
12 Anɔ'ɔnɛ na nyaŋi baŋ o gbɛlima?
Kɛlli m tʋʋmbɛ'ɛsu'ada la taali bas.
13 M anɛ fʋ sankpan'as,
gurim ka m da tʋm tʋʋmbɛ'ɛd pɔn'ɔsim-pɔn'ɔsim;
da kɛ ka li sʋ'ʋgi ma.
Ala ka m kʋ mɔr gba'ar linɛ zu'oe halii.
14 Kɛl ka m nɔɔr pian'ad nɛ m sʋnf tɛn'ɛsa paae fʋ ya'am,
Zugsɔba, fʋ anɛ m Tampiing nɛ m Faangid.