Nyaŋir winsɔsʋg
20
1 Fʋ ya'a ti bɛ yɛla ni, Zugsɔb la na sʋ'ʋŋif;Jakob Wina'am la yʋ'ʋr na gurif.
2 O na kɛ ka o sʋŋir naanɛ o pʋ'ʋsim yin la kena,
ka kɛ ka fʋ paam sʋŋiri yi Zion teŋin.
3 O na tiɛn fʋ piini la yɛla,
ka di'e fʋ piini linɛ an nyu'or maan la.
4 O na kɛ ka fʋ paami fʋ sʋʋnr bɔɔdim
ka kɛ ka fʋ gban'ar wʋsa zi'en.
5 Ti na dʋ'ʋsi ti kʋkɔya agɔla maal sumalisim fʋ nyaŋir saŋa
ka ʋki ti tuutanam agɔla nɛ Wina'am yʋ'ʋr zug.
Zugsɔb na kɛ ka fʋ paam linɛ ka fʋ sɔs o la wʋsa.
6 Nannanna man mi' ye Zugsɔb la faand Na'akanɛ ka o gaŋ la.
O naamid o mɛŋ zin'ig linɛ an kasi arezana ni la
ka wʋm Na'ab la sɔsʋg, ka nɔk o paŋ tita'ar la sʋŋ o.
7 Sieba nɔki ba yadda niŋ nɛ zaba tɛrekonam ni
ka sieba mɛ ti'e ba widi,
amaa tinam niŋnɛ Zugsɔb la yʋ'ʋr yadda;
Zugsɔb onɛ aan ti Wina'am la.
8 Ba wʋsa na tu'ugi li,
amaa tinam na duoe zi'en nɛ kpi'euŋ.
9 Zugsɔba, tisim Na'ab la nyaŋir!
Ti ya'a sɔs si'el, fʋn wʋm tisi ti.