Wɔ'ɔgim Wina'am nyaŋir yɛla
21
1 O Zugsɔba, Na'ab la mɔr sumalisim fʋ paŋ la zug.O mɔr sumalisim hali
nɛ nyaŋir banɛ ka fʋ kɛ ka o nyaŋ la zug!
2 Fʋ kɛ ka o paam o sʋnfʋ bɔɔd si'el
ka pʋ kɛ ka o nɔɔri sɔs si'el la niŋ zaalim.
3 Fʋ di'e o nɛ bareka pamm
ka nɔk sanlimmɛŋir zupibigi pil o zug.
4 O sɔsif nyɔvʋr yɛla ka fʋ tis o;
fʋ kɛ ka o bɛllim dabisa ka' naarɛ.
5 Fʋn kɛ ka o nyaŋ si'em la zug ka o girima zu'oe
fʋ nɔk vɛnlim nɛ na'am pipilim tis o.
6 Sida, fʋ tis o albareka linɛ ka' naarɛ
ka kɛ ka o pʋʋg pie nɛ sumalisim fʋn bɛɛ o san'an la zug.
7 Bɔzugɔ Na'ab la niŋnɛ Zugsɔb la yadda
ka li yinɛ Onɛ Gaad Si'el wʋsa nɔŋilim linɛ pʋ naad la ni,
ka dabiem kʋ mɔr o, ka si'el mɛ kʋ daam o.
8 Fʋ na nyaŋi fʋ dataas wʋsa;
fʋ na nɔki fʋ paŋ la nyaŋi fʋ bi'emnam.
9 Saŋkanɛ ka fʋ na ti nie paalʋ la
fʋ na maali ba wʋʋ bugum linɛ dit hali;
Zugsɔb la sʋnduor pʋʋgin o na vɔli ba,
ka o bugum la na kanbi ba.
10 Fʋ na kʋʋ ba yaas la wʋsa dunia zug,
ka mɛlisi ba ninsaalib buudi wʋsa sʋʋgin.
11 La'am nɛ ban gban'e gban'abɛ'ɛdi fʋ yɛla
ka mɔr bugusim suoya la,
ba kʋ nyaŋ hali baa bi'elaa.
12 Bɔzugɔ fʋ na gʋdi fʋ tiraug la kpa' ba
ka li na kɛ ka ba fɛndig tɔ'ɔtɔ zɔ.
13 O Zugsɔba, di'em zun'ori fʋ paŋ la zug!
Ti na yʋ'ʋm ka wɔ'ɔgif fʋ kpi'euŋ la zug.