Namisʋg nɛ nyaŋir yʋʋm
22
1 M Wina'am, m Wina'am, bɔ ka fʋ basi ma?Bɔɔ kɛ ka fʋ lal hali nɛ fʋn na faaɛn ma;
fʋ lal nɛ hali, ka pʋ wʋmi m fabʋlʋgɔ?
2 M Wina'am, man fabin nintaŋ, amaa fʋ pʋ wʋmmi tisidi ma,
hali la'am nɛ yʋ'ʋŋ mam pʋ sinna.
3 La'am nɛ wala fʋnɛ an kasi.
Fʋ zin'ini fʋ na'am gbauŋ la zug;
fʋn ka Israel dim la wɔ'ɔgid.
4 Fʋn ka ti yaanam da nɔki ba mɛŋi dɛl,
ba da niŋif yadda ka fʋ faaɛn ba.
5 Ba da fabili tisif ka paam faangir;
fʋn ka ba da niŋ yadda ka pʋ di nyannɛ.
6 Amaa man yʋ'ʋn anɛ zunzunr ka ka' ninsaala,
ka nidib la'adim ka nɛ'ɛsidim.
7 Banɛ nyɛɛm wʋsa maanim nɛ siaa;
ba tʋ'ʋdimnɛ, ka lɔbidi ba zuti yɛt ye,
8 “O daa ti'enɛ Zugsɔb la,
kɛl ka Zugsɔb la faaɛn o
kɛl ka o yis o,
on sadigim nɔŋ o yɛla la!”
9 Fʋnɛ yisimi m ma pʋʋgin na;
hali man da nan mu'adi m ma bin'isim la
fʋn ka m da niŋ yadda.
10 Lin pin'ili m du'am daar la, fʋnɛ gurim;
m ma pʋʋgin sa ka fʋ da aan m Wina'am.
11 Da lal nɛ ma
bɔzugɔ yɛla la pʋ lalla
ka sɔ' kae na sʋŋi ma.
12 M dataas bɛdegʋ n la'asi giligim
Ba nwɛnɛ Basan wɛniigi la'asi giligim.
13 Ba nwɛnɛ gbigima
na gban'e bʋnkɔnbidi ɔnbid ka nwa'amid si'em la,
ba ya'anɛ ba nɔya ieedim.
14 Ba kpa'ae mam wʋʋ ku'om nɛ,
ka m kɔnba wʋsa pʋ lɛn tɔ'ɔŋ taabaa.
M sʋnf nwɛnɛ kpaam linɛ nyɛligid nɛ;
li nyɛligi yi ka basim.
15 M kʋdignɛ wʋʋ tandʋk nɛ
ka m zilim tabin;
fʋ kɛ ka m dig teŋin wʋʋ kum nɛ.
16 Nimbɛ'ɛdnam bɛdegʋ la'asi kena giligim
nwɛnɛ baas nɛ,
ba kʋnsi m nu'us nɛ m nɔba.
17 Man na nyaŋi kaali m kɔnba wʋsa;
nidib la'asi gɔtim ka la'adim.
18 Ba pʋdigi m fuudi tis taaba
ka maal bʋgʋlʋm-bʋgʋlʋm m fuug la yɛla.
19 Amaa, Zugsɔba, da bɛ lalli;
m Paŋsɔba, kem tɔ'ɔtɔ na sʋŋim.
20 Yisimi m nyɔvʋr zaba sʋ'ʋs la ni,
m nyɔvʋsʋŋ la, yisimi li baas la ni.
21 Faanmimɛ yis gbigima la nɔɔrin
ka yisim wɛniigi la iila ni.
22 M na yɛli m ba'abiis fʋn tʋm si'eli tisim la,
m na dʋ'ʋsi fʋ yʋ'ʋr nidib bɛdegʋ tuon.
23 Yanam banɛ zɔt Zugsɔb la, wɔ'ɔgim o!
Yanam banɛ an Jakob yaas la wʋsa, zun'omi nɛ o!
24 O pʋ zan'as onɛ namisid hali la,
bɛɛ gɔsid o wʋʋ dian'ad sɔba;
o pʋ fɛndig o nindaa ka bas oo,
amaa o wʋm on kaasidi bɔɔd sʋŋir la.
25 Fʋn tʋm si'el la zug ka m zun'odif fʋ nidib la teŋsʋk,
ka na tʋm man daa zi'el nɔɔr si'em la
ka nidib la wʋsa nyɛ.
26 Nɔŋ dim na dii tig;
banɛ ieed Zugsɔb la na wɔ'ɔg o,
ba na paam bareka saŋa linɛ ka' naarɛ.
27 Dunia bɛn wʋsa na tiɛn
ka lɛb Zugsɔb la san'an na,
ka sʋ'ʋlim wʋsa nidib
na igini o tuon,
28 bɔzugɔ na'am paŋ wʋsa anɛ Zugsɔb la din
onɛ sʋ'oe sʋ'ʋlim wʋsa.
29 Dunia nwa kpan'am dim na di ka wɔ'ɔg o yʋ'ʋr;
ka banɛ kpiid wʋsa na igin o tuon,
la'am nɛ banɛ kʋ nyaŋi gɔsi ba mɛŋ la.
30 Ba biis nɛ ba yaas la na dɔl o;
ba na yɛl Zugsɔb la yɛla tis zʋmaaŋ kanɛ na ti duoe na la.
31 Ba na yɛl o pʋpielim la yɛla
tis nimbanɛ ka ba nam pʋ du'a la,
bɔzugɔ onɛ maali li wʋsa.