Pʋpiel winsɔsʋg
17
1 O Zugsɔba, kɛlisimi m pʋpielim winsɔsʋg,wʋmmi m kukuma.
Kɛlisimi m sɔsʋg,
li pʋ yit ziri sɔb nɔɔrin naa.
2 Kɛl ka li anɛ fʋnɛ na tisim bʋʋd.
Fʋ nini na nyɛ linɛ an sida.
3 La'am nɛ fʋn mi' m sʋnf ka kpansidim yʋ'ʋŋ la,
la'am nɛ fʋn makidimɛ gɔsid la,
fʋ kʋ nyɛ gba'arɛ;
m gban'e ye m nɔɔr kʋ pian' bɛ'ɛdɛ.
4 Ya'a kpɛlim ninsaalib tʋʋma,
fʋ nɔɔr pian'ad zug man gban'e m mɛŋ
ka pʋ dɔl zaba dim suoya.
5 M nɔba zi'enɛ fʋ suorin la,
m pʋ bie yii li nii.
6 O Wina'am, fʋn ka m buon,
bɔzugɔ m mi' ye fʋ na wʋm tisim.
Kɛlisim ka wʋmi m sɔsʋg.
7 Pa'alimi fʋ nɔŋilim la tʋm nyalima si'em,
fʋnɛ nɔki fʋ paŋi faaɛn nidib wʋsa
banɛ zɔti kennɛ su'adi fʋ san'an ba dataas yɛla la.
8 Mɔrim sʋŋa wʋʋ fʋ nif bielif nɛ,
nɔkimi su'a fʋ kpʋkpama lɛuŋʋn
9 yi nimbɛ'ɛdnam banɛ mɔɔd ye ba duoe
tʋ'ʋsim nɛ zaba la ni,
nɛ m dataas banɛ giligim ye ba kʋ la san'an.
10 Ba yɔɔ ba sʋnya linɛ digilim la,
ka pian'adnɛ tita'alim.
11 Ba gban'e man nɛ zi'el ka giligim;
ba ieednɛ suoya ye ba lugim teŋin.
12 Ba nwɛnɛ gbigim ka kɔ'ɔm mɔr o ka o gu'ud ye o gban'e si'el,
ka nwɛnɛ gbigim kanɛ su'a mɔɔdin mɔɔd ye o gban'e si'eli ɔnb.
13 O Zugsɔba, duom zi'en,
tʋ'ʋsimi ba ka sigisi ba teŋin,
nɔkimi fʋ zaba sʋ'ʋg la faanmi yis nimbɛ'ɛdnam nu'ugin.
14 O Zugsɔba, nɔkimi fʋ paŋi
faanmi yis nimbama nu'usin;
ban banɛ di'edi ba yɔɔd dunia kaŋa ni ma'aa la.
Fʋn nɔŋ sieba la kɔ'ɔm ya'a zabid fʋ tisidi banɛ ka ba tigid
ka ba biis mɛ mɔr bɛdegʋ,
ba su'a arezak bɛdegʋ digili ba biis.
15 Ka mam an pʋpiel la zug m na nyɛɛf.
M ya'a ti duoe ka nyɛɛ fʋ nindaa, lin ma'aa siakim.