Winsɔsʋg linɛ mɔr ti'ir
16
1 O, m Wina'am, gurim sʋ'ʋŋabɔzugɔ fʋ san'an ka m su'adi m mɛŋ.
2 M yɛl Zugsɔb la ye, “Fʋ anɛ m Zugsɔb;
ya'a ka' fʋnɛ, m pʋ lɛm mɔr bʋnsʋŋsi'aa.”
3 Zugsɔb nimbanɛ bɛ teŋ la ni la
anɛ girima dim ka m sʋnf malis nɛ ba.
4 Banɛ zɔti dɔl winsieba la, na maligim paasi ba mɛŋ sʋnsa'aŋ.
M kʋ bu'oe ba maan ku'om linɛ an ziim la
bɛɛ ya'am m nɔɔri buoli ba yʋdaa.
5 Zugsɔba, fʋ tisim linɛ aan m bʋn nɛ linɛ narim,
fʋnɛ kɛ ka m zin' ka dabiem kae.
6 M di'e zin'ibanɛ vɛnli tisim;
sida-sida m mɔr faar linɛ ma'adi m sʋnf.
7 M na zun'e Zugsɔb onɛ sa'annim la,
la'am nɛ yʋ'ʋŋ m sʋnf pa'annim man na maal si'em.
8 Zugsɔb la ka man zaŋi galisi m tuon daar wʋsa;
on bɛɛ m datiuŋ la zug, dabiem pʋ mɔri ma.
9 Dinzug, man sʋnf ma'anɛ
ka m pian'ad nɛ sumalisim,
ka m niŋgbina mɛ mɔr laafi ka si'el kʋ daami ma.
10 Bɔzugɔ fʋ kʋ basim yaʋgʋnɛ,
bɛɛ kɛ ka Onɛ an Kasi tisif la pun'oe.
11 Fʋnɛ kɛ ka m baŋ vʋm suor,
fʋ na tisim sumalisim fʋ san'an,
ka kɛ ka m mɔr ya'amlɛog linɛ ka' bɛnnɛ fʋ datiuŋ la.