Juda dim banɛ ka' na'am tuŋ dim la yʋda nwa
4
1 Juda yaas da anɛ Perez nɛ Heziron nɛ Karmi nɛ Hur nɛ Soobal. 2 Ka Soobal biig Riaya da du'a Jahaf, ka Jahaf du'a Ahumai nɛ Lahad. Zora dɔɔg dimi la. 3 Etam biribis da anɛ Jezireel nɛ Isima nɛ Idibasi. Ka ba taʋn an Hazelelpooni. 4 Penuel da anɛ Geduor saam, ka Eza mɛ an Husea saam. Ba da anɛ Hur onɛ da an Efirata bikpɛɛm la yaas. Hur da an Betilehem dim wʋsa yaab. 5 Asur biigi da an Tekoa. Asur pu'ab da anɛ ayi', ka ba yʋda an Hela nɛ Naara. 6 Naara biribis da anɛ Ahuzam nɛ Hifa nɛ Temeni nɛ Hahasitari. 7 Hela biribis da anɛ Zeref nɛ Zohar nɛ Efinan 8 nɛ Kos. Ka Kos biis mɛ da an Anub nɛ Hazobeba nɛ Harum nɛ o biig Ahahel yaas.9 Jabes yʋ'ʋr da dʋʋ gaad o mabiis la wʋsa. O ma da pʋd o yʋ'ʋr ye, Jabes, ka yɛl ye, “M da du'a o nɛ ka li zabid hali!” 10 Jabes da kaasi buol Israel Wina'am ka sɔs o ye, “Niŋimi m zug bareka ka kɛ ka m sʋ'ʋlim yalig! Sʋŋimim ka gɔsim ka m da nyɛ tɔɔgɔ!” Ka Wina'am wʋm o sɔsʋg la.
11 Kɛlub da anɛ Suha mabiig, ka o biig da an Mehir, ka Mehir biig da an Esiton. 12 Ka Esiton biis an Bet Rafa nɛ Pasia nɛ Tehina. Ka Tehina biig an Yir-Nahas. Ban da anɛ Reka dap.
13 Kenas biribis da anɛ Ofniel nɛ Seraya. Ka Ofniel biribis an Hataf nɛ Meonotai. 14 Ka Meonotai biig an Ofra. Seraya biig da anɛ Joab. Ka Joab biig an Ge-Haharasim. Linɛ kɛ ka ba da buonnɛ ba anwa la anɛ ye, nimbanɛ da bɛɛ anina la nu'ug tʋʋm da anɛ la'ad maalʋg.
15 Jefune biig Kaleb biribis da anɛ Iru nɛ Ela nɛ Na'am. Ela biig da anɛ Kenas. 16 Jehalelel biribis da anɛ Zif nɛ Zifa nɛ Tiriya nɛ Asarel.
17-18 Ezira biribis da anɛ Jeta nɛ Mered nɛ Efer nɛ Jalon. Mered da di Na'ab Faaro biig ka o yʋ'ʋr buon Bitiya. O bipuŋ yʋ'ʋri da an Miriam ka o biribis an Seamaae nɛ Isiba. Ka Isiba biig an Estemoa. Mered pu'a kanɛ da an Juda nid la biribis da anɛ Jered nɛ Heber nɛ Jekutiel. Jered biig yʋ'ʋri da buon Geduor. Heber biigi da an Soko. Jekutiel biigi da an Zanoak.
19 Hodaya da di Naham taʋn, ka ba yaasi an Kiela nɛ Estemoa. Kiela da anɛ Gerem nid, ka Estemoa mɛ an Maaka nid.
20 Siimon biribis da anɛ Amnon nɛ Arina nɛ Ben-Hanan nɛ Tiiloon. Isi yaas da anɛ Zohef nɛ Ben-Zohef.
21 Juda biig Sela yaas da anɛ Er onɛ an Leka saam nɛ Laada onɛ an Maresa saam ka an banɛ da zin' Beth Asibia ʋgʋd piena 22 nɛ Jokim nɛ Kosiba dim nɛ Joas nɛ Seraf banɛ da sʋ'oe Moab dim ka zin' Betilehem la. (Yɛlbama da sɔbnɛ Kʋdimin sa n digil.) 23 Nimbama da anɛ banɛ ya'abid ka zin' Netayin nɛ Gedera tɛɛnsin ka tʋmmi tisid Na'ab la.
Simeon yaas yʋda nwa
24-25 Simeon biribis da anɛ Nemuel nɛ Jamin nɛ Jarib nɛ Zera nɛ Sauul. Sauul da du'a Sallum, ka Sallum du'a Mibsam, ka Mibsam mɛ du'a Misima. 26 Misima da du'a Hamuel, ka Hamuel du'a Zakur, ka Zakur mɛ du'a Simie.
27 Simie biribis da anɛ biribis pii nɛ ayuobʋ nɛ bipumis ayuobʋ, amaa o pitib da pʋ du'a biribis bɛdegʋʋ, linɛ kɛ ka Simeon dɔɔg dim la da pʋ zu'oe wʋʋ Juda dimi da zu'oe si'em laa.
28 Ba da zin'inɛ Beerseba nɛ Molada nɛ Hazar-Sual, 29 nɛ Biliha nɛ Ezem nɛ Tolad 30 nɛ Betuel nɛ Horma nɛ Ziklag 31 nɛ Bet Maakabof nɛ Hazar-Susim nɛ Bet-Biri nɛ Siaaram tɛɛnsin.
Tembama da aan ba tɛɛns hali ti paae Na'ab David na'am saŋa. 32 Ba teŋkpɛmis la anɛ: Etam nɛ Ɛɛn nɛ Rimmon nɛ Token nɛ Asean. Ba da anɛ tɛɛns anu.
33 Nɛ tembibis banɛ giligi ba la wʋsa, hali ti paae Baalaf.
Ban da zin' teŋ sieba la. Ba da sɔbi ba dɔɔg la nidib yʋda digil.
34 Ba tuongatib yʋda nwa: Mesɔbab nɛ Jamlek nɛ Amazaya biig Josaya 35 nɛ Joel nɛ Jehu onɛ da an Josibaya biig ka Josibaya an Seraya biig ka Seraya an Asiel biig, 36 nɛ Eloanai nɛ Jaakoba nɛ Jesohaya nɛ Asaya nɛ Adiel nɛ Jesimiel nɛ Benaya, 37 nɛ Siefi biig Ziza nɛ Allon biig nɛ Simir biig Jedaya onɛ yaabi da an Semaya la.
38 Bama wʋsa da anɛ ba dɔɔg la tuongatib. Ba nidib da zu'oya hali, 39 ba da yii yadig teŋ la ieed yaama ye ba tisi ba bʋnkɔnbid, hali ti paae Geduor teŋ bɛn, linɛ bɛ ya-nya'aŋ bɔn'ɔfaligin la. 40 Ba da nyɛ mɔsʋma ani, ka paalʋ la yalim bɛdegʋ, ka teŋ la wʋsa dig baanlimm. Ham buudi la sieba da dɛŋi zin'inɛ ani kʋdimin sa ka duoe tɔɔm.
41 Juda Na'ab Hezekia da di na'am saŋa si'a la ka nimbanɛ ka ba sɔbi ba yʋda nwa keŋi zab nɛ Ham dim la ka mɛ zab nɛ Meun dim la ka nyaŋi ba n kʋʋ ba wʋsa. Hali nɛ zina, nidib mi' li yɛla. Ba da di'e teŋ la zin'in, bɔzugɔ yaama da bɛɛ ani bɛdegʋ. 42 Saŋkan la ka Simeon dim la nidib kɔbisnu da keŋ Seir sʋ'ʋlim kʋkʋna la ni na nwɛ' tanp. Ba tuongatib da anɛ Pelataya, Nearaya, Refaya, nɛ Isi biig Uziel. 43 Ba da kʋ Amalek dim banɛ da nyaŋi zɔɔ pɔns Seir teŋin la ka zin'in teŋin la hali ti paae zina.