Reuben yaas yʋda nwa
5
1 Reuben da anɛ Israel bikpɛɛm, amaa on da digin nɛ o saam pu'a la zug, ba da faaɛn dinɛ an bikpɛɛm faar la tis Josef onɛ mɛ da an Israel biribiŋ la. Alazug, ba da pʋ sɔb Reuben yʋ'ʋri pɛ'ɛs banɛ nar ye ba di Israel faar la nii. 2 La'am nɛ Juda da an kpi'em o ba'abiis la wʋsa sʋʋgin ka tuongat yii o tuŋʋn na la, Josef n da sʋ'ʋg bikpɛɛm faar la.3 Reuben onɛ da an Israel bikpɛɛm la biribis da anɛ Hanok nɛ Pallu nɛ Heziron nɛ Karmi. 4 Joel yaas da anɛ Semaya, ka on du'a Gog, ka Gog du'a Simie, 5 ka Simie du'a Maika, ka Maika du'a Riaya, ka Riaya du'a Baal, 6 ka Baal du'a Beera onɛ ka Asiria Na'ab Tigilaf-Pilesa da gban'e o keŋ ka o lieb yammʋg la. Beera da anɛ Reuben dɔɔg la tuongat.
7 Ba da sɔbi ba dɔɔd la yʋda dɔlisi ba tuŋ-tuŋ wʋʋ ban kpin taaba si'em la. Jieel n da an zugdaan la nɛ Zakaria, 8 ka Azas da du'a Bela, ka Azas saam an Sema ka on saam mɛ an Joel. Joel nɛ o nidib la da zin'inɛ Aroa hali ti paae Nebo nɛ Baal Meon tɛɛnsin. 9 Ba mɛ da zin'in ya-nya'aŋ baba yadig hali paae sian'anr la nɔɔrin nɛ Efiritis kɔldaug la, bɔzugɔ ba bʋnkɔnbid la da wiak bɛdegʋ Gilead teŋin. 10 Saŋkanɛ ka Saul da zin' na'am gbauŋ zug la, ba da zab nɛ Haga buudi la nyaŋi ba ka di'e ba teŋ la zin'inɛ tiig Gilead teŋ la zin'ikanɛ lɛbid ya-nya'aŋ la wʋsa.
Gad yaas yʋda nwa
11 Gad dɔɔg la da tʋgisnɛ Reuben dɔɔg la tuonnɛ zin'in Basan teŋin hali ti paae Saleka. 12 Joel n da an zugdaan Basan teŋin la ka Safam tia'al ayi', ka banɛ paas an Janai nɛ Safat. 13 Ba tuŋ la nɛ ba du'am da dɔl si'em nwa: Maikel nɛ Mesulam nɛ Seeba nɛ Joraae nɛ Jakan nɛ Zia nɛ Eba. Ba wʋsa da la'as nɛ nidib ayɔpɔi. 14 Bama da an Abihel biribis, ka Abihel mɛ an Huri biig, ka Huri an Jaroa biig, ka Jaroa an Gilead biig, ka Gilead mɛ an Maikel biig, ka Maikel an Jesisae biig, ka Jesisae an Jahidau biig, ka Jahidau mɛ an Buz biig.
15 Abdiel biig Ahi onɛ yaabi da an Guni la da aan ba tuŋ la tuongat.
16 Gad dɔɔg la da zin'inɛ Gilead linɛ bɛ Basan teŋgbauŋʋn nɛ li teŋkpɛmis la, nɛ Saron mɔma'asa zin'is la nɛ li yalʋŋ la bɛn wʋsa.
17 Ba da sɔb nɛ' wʋsa niŋi ba tuŋ gbana la ni, Juda Na'ab Jotam na'am saŋa la, nɛ Na'ab Jeroboam da an Israel na'ab saŋa si'a la.
Zaba yɛla
18 Reuben nɛ Gad nɛ Manase dɔɔg la pʋsʋk da mɔr dap tusa pisnaasi nɛ anaasi nɛ kɔbisyɔpɔi nɛ pisyuobʋ (44,760) banɛ da siak tanp nwɛ'ɛb. Ba da pa'ali ba zaba zabid si'em, ka ba na nyaŋi zanl gbanti'edʋg nɛ zaba sʋ'ʋs nɛ ban na tɔn kpana si'em. 19 Ba da zab nɛ Haga buudi la, nɛ Jetur dim, nɛ Nafis dim, nɛ Nodab dim la wʋsa. 20 Ba da sɔs Wina'am zaba la saŋa, ka o sʋŋi ba ka ba zabi nyaŋ Haga dim nɛ banɛ zi'e ba nya'aŋ la wʋsa. Wina'am da wʋm tisi ba, ban da niŋ o yadda la zug. 21 Ba da nyaŋi faaɛn Haga dim la yʋgʋma tusa pisnu (50,000), pɛ'ɛs tusa kɔbisyi' nɛ pisnu (250,000), nɛ bʋmis tusa ayi' (2,000). Ba mɛ da gban'e nidib tusa kɔbiga (100,000) keŋ ka ba lieb yammis, 22 ka kʋ nidib la bɛdegʋ bɔzugɔ Wina'am mɛŋi da sʋ'oe zaba la. Ka ba zin'in teŋ la ni hali nɛ Asiria dimi ti gban'e ba keŋ ka ba lieb yammis.
Manase dɔɔg pʋsʋk dim la yʋda nwa
23 Manase dɔɔg pʋsʋk la da zu'onɛ. Ba da zin'inɛ Basan keŋ paae Baal Hemon nɛ Senir (Hemon Zuorin). 24 Ba dɔɔg la tuŋ-tuŋ tuongatib da anɛ Efer nɛ Isi nɛ Eliel nɛ Aziriel nɛ Jeremia nɛ Hodavia nɛ Jadiel.
Ba da anɛ banɛ sʋnfʋ kpi'em zaba ni, ka an yʋ'ʋr dim ka aan ba tuŋ la tuongatib. 25 Amaa ba da pʋ dɔl Wina'am onɛ aan ba yaanam Wina'am la nɛ pʋʋg yinnee, ka tʋm nwɛnɛ pu'agɔɔnda nɛ, ka dɔl teŋ kanɛ ka ba bɛ la nidibi dɔl ba'asieba la, ba'abanɛ yɛla ka Wina'am da san'am nidib la ka ba nyaan kpɛn' teŋin la. 26 Alazug Israel Wina'am la da kɛ ka Pul onɛ an Asiria Na'ab ka o yʋ'ʋr da lɛm buon Tigilaf-Pilesa la gban'e Reuben nɛ Gad nɛ Manase dɔɔg pʋsʋk la kɛ ka ba lieb yammis. O da mɔri ba keŋ Hala, nɛ Haabo nɛ Hara tɛɛnsin, nɛ Gozan kɔldaug la baba. Zin'ikan la ka ba bɛ, hali ti paae zina.