Levi yaas yʋda nwa
6
1 Levi biribis da anɛ Gerson nɛ Kohat nɛ Merari.2 Kohat biribis da anɛ Amram nɛ Izar nɛ Hebron nɛ Uziel. 3 Amram biribis da anɛ Aaron nɛ Moses nɛ Miriam. Aaron biribis da anɛ Nadab nɛ Abihu nɛ Eleazar nɛ Itamar.
4 Eleazar da du'a Finehas ka Finehas du'a Abisua 5 ka Abisua du'a Buki ka Buki du'a Uzi, 6 ka Uzi du'a Zerahaya, ka Zerahaya du'a Merayof, 7 ka Merayof da du'a Amaraya ka Amaraya du'a Ahitub, 8 ka Ahitub da du'a Zadok ka Zadok du'a Ahimaaz, 9 ka Ahimaaz da du'a Azaria, ka Azaria da du'a Johanan 10 ka Johanan da du'a Azaria (onɛ da an maanmaan Pʋ'ʋsim Yikanɛ ka Solomon da mɛ' Jerusalem tempʋʋgin la). 11 Azaria da du'a Amaraya, ka Amaraya du'a Ahitub, 12 ka Ahitub du'a Zadok, ka Zadok du'a Sallum, 13 ka Sallum du'a Hilkia, ka Hilkia du'a Azaria, 14 ka Azaria du'a Seraya ka Seraya du'a Jehozadak. 15 Ba da gban'e Jehozadak n keŋ teŋ zʋŋ, saŋkanɛ ka Zugsɔb la da kɛ ka Nebukadnɛza gban'e Juda nɛ Jerusalem dimi keŋ la.
16 Levi biribis da anɛ Gerson nɛ Kohat nɛ Merari. 17 Gerson biribis da anɛ Libni nɛ Simie. 18 Kohat biribis da anɛ Amram nɛ Izar nɛ Hebron, nɛ Uziel. 19 Merari biribis da anɛ Mahili nɛ Musi. Ba da sɔb Levi dɔɔg la yʋda nɛ dɔlis ba' gbin ba' gbin.
Gerson yaas yʋda nwa
20 Gerson yaas da anɛ Gerson biig Libni onɛ da du'a Jehaf, ka Jehaf du'a Zimma 21 ka Zimma du'a Joa, ka Joa du'a Iddo, ka Iddo du'a Zera, ka Zera mɛ du'a Jeterai.
Kohat yaas yʋda nwa
22 Kohat yaasi nwa: Kohat biigi da an Aminadab ka Aminadab du'a Kora, ka Kora du'a Asir, 23 ka Asir du'a Elkana, ka Elkana du'a Ebiyasaf, ka Ebiyasaf du'a Asir, 24 ka Asir du'a Tahaf, ka Tahaf du'a Uriel, ka Uriel du'a Uzia, ka Uzia du'a Sauul.
25 Elkana biribis da anɛ Amasai nɛ Ahimof. 26 Ka Ahimof du'a Elkana, ka Elkana du'a Zofai, ka Zofai du'a Nahaf, 27 ka Nahaf du'a Eliab, ka Eliab du'a Jeroham, ka Jeroham du'a Elkana, ka Elkana mɛ du'a Samuel.
28 Samuel biribis da anɛ Joel onɛ da aan o bikpɛɛm ka Abija tia'al.
29 Merari yaas yʋda nwa: o biig yʋ'ʋri da buon Mali. Ka Mali da du'a Libni, ka Libni du'a Simie, ka Simie mɛ du'a Uzaa, 30 ka Uzaa du'a Simea, ka Simea du'a Hagiya, ka Hagiya du'a Asaya.
Pʋ'ʋsim yin yʋʋmyʋ'ʋmnib la yɛla
31 Ban da mɔr nɔnaar Daka la kena digil la nya'aŋ, nimbama ka David da kɛ ka ba sʋ'oe yʋʋma yɛla Zugsɔb Pʋ'ʋsim Yin la. 32 Ba tʋʋma da anɛ yʋʋma: ba da zi'e La'asʋg Fuug Sʋgʋr la tuonnɛ yʋ'ʋm yʋʋma zun'od Zugsɔb la, hali ka Solomon nyaan ti mɛ' Zugsɔb Pʋ'ʋsim Yir la Jerusalem tempʋʋgin. Ba da tʋmmi ba tʋʋma wʋʋ wada la zi'el ye ba tʋm si'em la.
33 Banɛ ka ban nɛ ba biribis da la'am tʋm la yʋda nwa: Kohat buudi la ni, Heman da anɛ yʋʋmyʋ'ʋm ka an Joel biig, ka Joel mɛ an Samuel biig 34 ka Samuel an Elkana biig, ka Elkana an Jeroham biig, ka Jeroham an Eliel biig, ka Eliel an Toak biig, 35 Toak da anɛ Zuf biig, ka Zuf an Elkana biig, ka Elkana an Mahaf biig, ka Mahaf an Amasai biig, 36 ka Amasai da an Elkana biig, ka Elkana an Joel biig, ka Joel an Azaria biig, ka Azaria an Zefanaya biig, 37 ka Zefanaya da an Tahaf biig, ka Tahaf an Asir biig, ka Asir an Ebiyasaf biig, ka Ebiyasaf an Kora biig, 38 Kora da an Izar biig, ka Izar an Kohat biig, ka Kohat da an Levi biig, ka Levi mɛ an Israel biig.
39 Heman tʋmtʋm tiraan Asaf da zi'enɛ o datiuŋʋ tʋm: Asaf da anɛ Berekaya biig, ka Berekaya an Simea biig, 40 ka Simea da an Maikel biig, ka Maikel an Baaseya biig, ka Baaseya an Malkija biig, 41 ka Malkija da an Efni biig ka Efni an Zera biig, ka Zera mɛ an Adaya biig, 42 ka Adaya da an Etan biig, ka Etan an Zimma biig, ka Zimma an Simie biig, 43 ka Simie da an Jahaf biig, ka Jahaf an Gerson biig, ka Gerson mɛ an Levi biig.
44 Heman tʋmtʋm taaba banɛ da zi'e o dagɔbʋgʋ sʋŋid o la da anɛ Merari dim. Banɛ da an Etan onɛ da an Kisi biig la, ka Kisi an Abidi biig, ka Abidi an Maluk biig, 45 ka Mauk an Hasiabiya biig, ka Hasiabiya an Amazaya biig, ka Amazaya mɛ an Hilkia biig, 46 ka Hilkia an Amzi biig, ka Amzi an Bani biig, ka Bani an Semer biig, 47 ka Semer an Mahli biig, ka Mahli an Musi biig ka Musi an Merari biig, ka Merari mɛ an Levi biig.
48 Levi dim banɛ da kpɛlim la da tʋmnɛ tʋʋm banɛ bɛ Fuug Sʋgʋr linɛ an Wina'am Yir la ni.
Aaron yaas yʋda nwa
49 Amaa Aaron nɛ o yaas la da an banɛ maan maana linɛ nyu'od maan daka la nɛ bimbim kanɛ ka ba nyu'od bʋnnyubisa la zug. Ka li dɔl wʋʋ ban maan Kasi wʋsa Kasi zin'igin si'em la, ka ba maannɛ sɔsid suguru tisid Israel dim tʋʋmbɛ'ɛd yɛla, nwɛnɛ Wina'am tʋmtʋm Moses n da zi'el nɔɔr si'em tisi ba la wʋsa. 50 Aaron yaas da anɛ Eleazar ka Eleazar da du'a Finehas, ka Finehas da du'a Abisua, 51 ka Abisua da du'a Buki, ka Buki da du'a Uzi, ka Uzi da du'a Zerahaya, 52 Zerahaya da du'a Merayof, ka Merayof du'a Amaraya, ka Amaraya da du'a Ahitub, 53 ka Ahita du'a Zadok, ka Zadok mɛ du'a Ahimaaz,
Levi dim tɛɛns yʋda nwa
54 Ban da tis Aaron yaas teŋ sieba nwa ye ba zin'in (ba da tis o yaas banɛ yi Kohat tuŋʋn la yiiga wʋʋ din nar si'em): 55 Ba da tisi ba Hebron linɛ bɛ Juda sʋ'ʋlimin la, la'am nɛ ban kemmi ba kɔnbid zin'isi'a la wʋsa. 56 Amaa pɔɔd nɛ tembibis linɛ gilig teŋ la, ba da nɔki li tis nɛ Kaleb onɛ an Jefune biig la. 57 Alazug Aaron yaas la da sʋ'oe Hebron (teŋ kanɛ an suak zin'ig la), nɛ Libna nɛ Jatir nɛ Estemoa, 58 nɛ Hilen nɛ Debir, 59 nɛ Asan, nɛ Jueta nɛ Bet Semes, la'am nɛ ban kemmi ba kɔnbid zin'isi'a la wʋsa. 60 Benjamin dɔɔg la sʋ'ʋlimin ba da tisi ba nɛ Gibeon nɛ Geba nɛ Alemef nɛ Anatof la'am nɛ ban na kemmi ba kɔnbid zin'isi'a wʋsa.
Tembanɛ ka ba da nɔki pʋdig Kohat tuŋ la da la'as nɛ pii nɛ atan'.
61 Kohat yaas banɛ kpɛlim la da di'enɛ tɛɛns piiga Manase dɔɔg pʋsʋk la sʋ'ʋlimin la.
62 Ba da tis Gerson yaas la tɛɛns pii nɛ atan' yit Isaka nɛ Asa nɛ Naftali dɔɔd la sʋ'ʋlimin nɛ Manase dɔɔg la sieba banɛ bɛ Basan teŋgbauŋ sʋ'ʋlimin la. 63 Ba mɛ da tis Merari yaas la tɛɛns pii nɛ ayi' ka li yit Reuben, Gad nɛ Zebulun dɔɔd sʋ'ʋlimin la. 64 Israel buudi la da pʋdig tɛɛns la'am nɛ ban na kemmi ba kɔnbid zin'isi'a tis Levi dim la lin nar si'em. 65 Juda dɔɔg nɛ Simeon nɛ Benjamin dɔɔd la ba da tisi ba nɛ tɛɛns banɛ ka ti pʋn buoli ba yʋda la.
66 Kohat dim banɛ kpɛlim an Levi dim la, ba da pʋdig Efiram dim sʋ'ʋlim la tɛɛnsi tisi ba: 67 Efiram kʋkʋna teŋ la ba da tisi ba Sekɛm (teŋ kanɛ an suak zin'igi tis onɛ wʋsa kʋ nid la), nɛ Giza, 68 Jokimem, Bet-Horon, 69 Aijalon, nɛ Gaf Rimmon, la'am nɛ ban kemmi ba kɔnbid zin'isi'a la wʋsa. 70 Manase dɔɔg pʋsʋk la ni ka Israel dim da di'e Anɛr nɛ Bileam, la'am nɛ ban kemmi ba kɔnbid zin'isi'a la, tis Kohat dim banɛ kpɛlim la.
71 Gerson dim la da di'e si'el Manase dɔɔg pʋsʋk sʋ'ʋlimin la da anɛ Golan linɛ bɛ Basan la, nɛ Asitarof, la'am nɛ ban kemmi ba kɔnbid zin'isi'a la wʋsa.
72 Isaka dɔɔg sʋ'ʋlimin la ba da di'enɛ Kades nɛ Dabɛraf 73 nɛ Ramot nɛ Anem, la'am nɛ ban kemmi ba kɔnbid zin'isi'a la wʋsa. 74 Asa dɔɔg sʋ'ʋlim la da di'enɛ Misial nɛ Abidon, 75 nɛ Hukkok nɛ Rehob, la'am nɛ ban kemmi ba kɔnbid zin'isi'a la wʋsa.
76 Naftali dɔɔg sʋ'ʋlim la mɛ da di'enɛ Kedes linɛ bɛ Galile nɛ Hamon nɛ Kiriafaim, la'am nɛ ban kemmi ba kɔnbid zin'isi'a la wʋsa.
77 Merari dim banɛ kpɛlim Levi dɔɔg la ni la da di'e si'eli nwa: Zebulun dɔɔg la ni ba da di'enɛ Jokneam nɛ Kata nɛ Rimono nɛ Tabo, la'am nɛ ba kɔnbid kemmʋg zin'ig wʋsa. 78 Reuben dɔɔg la ni da di'enɛ Beza linɛ bɛ pipirisin la, nɛ Jaaza, 79 nɛ Kedemof nɛ Mɛfaaf nɛ ba bʋnkɔnbid kemmʋg zin'is. 80 Gad dɔɔg la da di'enɛ Ramot linɛ bɛ Gilead la nɛ Mahanam, 81 nɛ Hesbon nɛ Jaza, la'am nɛ ban na kemmi ba kɔnbid zin'isi'a wʋsa.