Ba Kʋ Isibosef si'em
4
1 Isibosef onɛ an Saul biig la da wʋm ye Abner kpi Hebron la, o giinla da siɛnnɛ, ka Israel dim wʋsa ya'am iank.2-4 Saul biig Jonatan mɛ da mɔr biig, ka o nɔba ayi' la wʋsa pɔn'ɔlim. O da anɛ yʋma anu ban da mɔr Saul nɛ Jonatan kum labaari yi Jezireel na la. Onɛ da yuon o la da nɔk o zɔ, ka on bɔɔd ye o zɔ tɔ'ɔtɔ la zug ka biig la luu kilim pɔn'ɔr. O yʋ'ʋri da buon Mefibosef.
Saul biig Isibosef la da mɔr nidib ayi' ka ba an tuongatib zaba ni. Yinne yʋ'ʋri da buon Baana ka oŋa la yʋ'ʋr buon Rekab. Ba da anɛ Rimmon biis, ba da yinɛ Beerot teŋin na, teŋ kan da anɛ Benjamin dɔɔg dim la teŋ. Bɔzugɔ Beerot nidib la da pʋn zɔɔ keŋ Gitam teŋin bɛɛ ani ka an saamme keŋ paae zina. 5-7 Dapa ayi' nwa da yii keŋ Isibosef yin, paae anina nintaŋ ka o digi vʋ'ʋsid. Ka ba kpɛn' zakin wʋʋ ba bɔɔdi ki nɛ, ka o nam bɛɛ o dɔɔgin la dig gadʋg zug. Ka ba kpɛn kʋnsi o pʋʋri tabil teŋin. Ban da kʋns o kʋʋ naae la, ka fi'igi o zugʋ su'a mɔri gaad. 8 Ba da mɔr Isibosef zugʋ keŋ Hebron n tis Na'ab David ka yɛl o ye, “Na'aba, fʋ dataa Isibosef onɛ an Saul biig la zugʋ nwa. Fʋ dataa onɛ daa mɔɔd ye o kʋʋf la. Zina Zugsɔb la yɔ Saul nɛ o biis la samme tis fʋn onɛ aan ti zugdaan la.” 9 Ka David lɛbis Rekab nɛ o ba'abiig Baana banɛ an Rimmon biis ka an Beerot teŋ dim la ye, “Sida ka m yɛt ye, Zugsɔb la anɛ onɛ yisim yɛla wʋsa pʋʋgin. 10 Ala ka dau sɔ' daa kena yɛlim ye, ‘Saul kpiya,’ ka tɛn'ɛs ye o mɔri labasʋŋʋ kena yɛlim ka m kɛ ka ba kʋʋ o Ziklag teŋin, 11 ka kɛl nimbɛ'ɛdnamɛ na keŋ sɔ' yinne kʋ o, o mɛŋ gadʋg zugɔ? Li nar ye m kʋʋ ya yɔ o sam ka kɛ ka teŋ la digin baanlimm.” 12 David da tis o nidib la nɔɔr ka ba kʋʋ ba, ka fi'isi ba nu'us nɛ ba nɔba ka nɔki ba niŋgbina ya'al Hebron bɛuŋ baba. Amaa ka nɔk Isibosef zugʋ mum Abner yaʋgʋn Hebron teŋin.