3
1 Saul nɛ David yidim zaba la da yuugnɛ hali. David yidim la da nyaŋidi ka Saul yidim la on tadigid.David n du'a bisieba Hebron teŋin la
2 David n da du'a biribis sieba Hebron teŋin la yʋda nwa: O bikpɛɛm la yʋ'ʋri da buon Amnon on ma da an Ahinoam ka yi Jezireel na. 3 O bikanɛ da paas ayi' la yʋ'ʋri da buon Kileab ka o ma an Abigel onɛ da an Nabal pʋkɔɔnr ka yi Kaamel na la; ka o bikanɛ paas atan' la da anɛ Absalɔm ka o ma yʋ'ʋr buon Maaka o da anɛ Talimai onɛ an Gesur na'ab la pu'ayua. 4 Onɛ paas anaasi la yʋ'ʋri da buon Adonija ka o ma yʋ'ʋr buon Haggif. O bikanɛ da paas anu la yʋ'ʋri da buon Sefatia ka o ma yʋ'ʋr buon Abital. 5 Ka onɛ paas ayuobʋ la yʋ'ʋr buon Itiram ka o ma an David pu'a kanɛ ka o yʋ'ʋr buon Egla la. Bama ka David da du'a Hebron teŋin la.
Abner n La'as nɛ David la yɛla
6 Saul nɛ David yidimi da zabid nɛ taaba saŋa si'a la, Abner da kpɛ'ɛŋid ye o nyɛ zi'esim Saul yin la. 7 Saul da mɔr pu'abil ka o yʋ'ʋr buon Rizipa, o da anɛ Aya pu'ayua. Isibosef da yɛl Abner ye, “Bɔ ka fʋ digin nɛ m saam pu'abila?” 8 Abner sʋnf da pɛlig nɛ hali Isibosef n yɛl si'el la zug, ka o lɛbis ye, “Fʋ tɛn'ɛs ye m anɛ yalim Juda dɔɔg la nii? Man zi'enɛ fʋ saam nɛ o yidim nɛ o zuanam yɛla hali ti paae zina, ka pʋ nɔki ya niŋ David nu'uginɛ. La'am nɛ wala fʋ yɛlim ye m tʋm bɛ'ɛd nɛ pu'a kaŋa! 9 M pɔya! Zugsɔb maalimim on bɔɔd si'em man Abner ya'a pʋ tʋm tis David wʋʋ Zugsɔb la zi'el o si'em, 10 ka tiak Saul na'am la diis David ka o sʋ'oe Israel nɛ Juda tɛɛns wʋsa din yi Dan hali ti paae Beerseba teŋin la!” 11 Isibosef da pʋ lɛn ya'ae nɔɔri yɛl Abner si'ela bɔzugɔ o da zɔt o nɛ dabiem.
12 Abner da tʋm nidib David san'an yɛl o ye, “Anɔ'ɔnɛ sʋ'oe teŋ la? Maalim nɔɔr yinne nɛ man ka m na sʋŋi mɔr Israel wʋsa lɛbi fʋ san'an na.” 13 David da lɛbis o ye, “Li an sʋ'ʋŋa. M na maal nɔɔr yinne nɛf. Amaa bʋn yinne ka m bɔɔd ye fʋ maal. Da kɛɛn m san'an naa, asɛɛ ka fʋ mɔr Mikal onɛ an Saul pu'ayua la kɛn na tisim.” 14 David da tʋm yɛl Isibosef onɛ an Saul biig la ye, “M bɔɔdi m pu'a Mikal onɛ ka m da di ka kʋ Filistia dim kɔbiga ka nwaasi ba yu'ogbana kena tis ka li an pu'asʋl la.” 15 Isibosef da tʋm faaɛn pu'a la o sid la san'an onɛ an Paltiel ka an Lais biig la. 16 Ka o sid la dɔl o nya'aŋi kaasid hali ti paae Bahurim. Ka Abner yɛl o ye, “Lɛm kul,” ka o lɛbi kul. 17 Abner da nwɛ' Israel dim kpɛɛmnam la sɔɔra ka yɛl ye, “Ya daa pʋn bɔɔd ye ya diis David na'am. 18 Nannanna niŋimini ala! Zugsɔb la da zi'el David nɔɔr ye, ‘M tʋmtʋm David zug, m na faaɛn Israel nidib Filistia dim nɛ ba bi'emnam wʋsa nu'usin.’ ” 19 Abner mɛŋ da pian' tis Benjamin dɔɔg la dim. Ka keŋ Hebron David san'ani tu'as o Israel dim nɛ Benjamin nidib la wʋsa bɔɔd ye ba niŋ si'em. 20 Abner onɛ mɔr nidib pisi la da keŋ David san'an Hebron teŋin, ka David maal on nɛ o nidib la saauŋ. 21 Abner da yɛl David ye, “M zugdaan na'aba, kɛl ka m keŋ tɔ'ɔtɔ la'as Israel dim la naa tisif, ka ba na la'asi fʋ san'an na niŋ nɔɔr yinne. Ka fʋ na sʋ'oe ba paae fʋn bɔɔd si'em bɛn nɛ sumalisim.” David da kɛɛs Abner ka o lɛb nɛ sumbʋgʋsʋm.
22 Saŋkan la nɔɔ ka Joab dɔl David nidib la yi zaba la ni lɛb Hebron teŋin na nɛ ya'an, ban nyaŋ zaba la ka faaɛn la'ad bɛdegʋ la zug. Amaa Abner da pʋ lɛm bɛɛ ani bɔzugɔ David da kɛɛs o ka o keŋ nɛ sumbʋgʋsʋm. 23 Joab nɛ o zabzabidib la da paae na la, ka yɛl o ye Abner onɛ an Nier biig la kɛn Na'ab la san'an na ka lɛb nɛ sumbʋgʋsʋm. 24 Ka Joab keŋ na'ab la san'ani yɛl o ye, “Bɔɔ nwa ka fʋ maalɛ? Gɔsima! Abner kɛɛn fʋ san'an na la, bɔ ka fʋ bas o? Nannanna o gaadya. 25 Fʋ mi' ye Abner onɛ an Nier biig la kenɛ na ye o ma'aa fʋ kpansi baŋi fʋ ken zin'ig nɛ fʋn tʋm si'em wʋsa.”
Joab n Kʋ Abner si'em
26 Ka Joab bas David ka tʋm buol Abner, ka ba buol o Sira buligin la lɛb na. Amaa David da pʋ baŋɛ. 27 Abner n da lɛb Hebron na la, ka Joab dɔl o yi za'anɔɔr la baba ka niŋ wʋʋ o bɔɔdi ye o pian' si'eli tis on ma'aa amaa ka kpɛn kʋnsi o pʋʋri kʋʋ o yɔɔ o pitʋ Asahel sam. 28 Li nya'aŋ ka David ti wʋmi li yɛla ka yɛl ye, “Man nɛ m sʋ'ʋlim la wʋsa kʋdim zi' Abner onɛ an Nier biig la kum la yɛla baa bi'ela. 29 O ziim na kpɛlim Joab zugin, on nɛ o saam yidim la wʋsa. Joab nɛ o yidim la wʋsa na mɔr fɛn'ɛdi ba niŋgbina ni, bɛɛ kʋkɔm ban'as na mɔri ba, ka sieba na an tadimbʋʋs, ka sieba na kpi tanpin ka sieba kɔ'ɔŋ diibi di.” 30 Joab nɛ o ba'abiig Abisai da kʋ Abner, on da kʋʋ ba pitʋ Asahel zabbɔn'ɔgin Gibeon teŋin la zug. 31 Ka David yɛl Joab nɛ nimbanɛ bɛɛ anina la ye, “Aansimi ya fuud ka yɛ bɔto fuudi pa'ali ya sʋnsa'aŋ, ka kum dɔl Abner tuonnɛ gaad.” Na'ab David mɛŋ da dɔl sɔnduoya la baba gaad. 32 Ba da mum Abner nɛ Hebron teŋin, ka na'ab la mɛŋ kaasid agɔla gɔla. Ka nidib la wʋsa mɛ kum. 33 Ka na'ab la yʋ'ʋm yʋʋm kaŋa tis Abner, ye,
“Li nar ye Abner kpi wʋʋ yalimm?
34 Ba pʋ lɔɔ fʋ nu'usɛ,
ka fʋ nɔba mɛ pʋ lɔ nɛ baansɛ.
Fʋ kpinɛ wʋʋ nimbɛ'ɛdnamɛ gu' fʋ kʋnɛ.”
Ka nidib la lɛn kum o yɛla ya'as. 35 Ka nidib la wʋsa la'as na bɛllim David ye o di diib ka li nam pʋ sɔbɛ. Amaa ka David pɔ ye, “M pɔya ye, man ya'a di si'el ka winnig nam pʋ lii Wina'am kʋʋmim, asɛɛ ka yʋ'ʋŋ sɔb.” 36 Nidib la wʋsa da kpansi li ka ba sʋnf ma'ae li yɛla. Sida, na'ab la maal si'em la wʋsa da ma'ae ba sʋʋnr. 37 Daakan la ka nidib la nɛ Israel dim wʋsa baŋ ye na'ab la nu'ug kae Abner onɛ an Nier biig la kuminɛ. 38 Ka na'ab la yɛl o nidib la ye, “Ya pʋ baŋ ye tuongat nɛ nintita'ar kpi Israel teŋin zinaa? 39 Zina nwa, la'am nɛ ban bu'oe malʋŋ kpaam niŋim zug ka diisim na'am la m tadig nɛ, ka Zeruyia biis la kpi'emi gati m. Zugsɔb la na yɔ tʋʋmbɛ'ɛd sɔb wʋʋ o tʋʋma an si'em.”