David n di Juda na'am si'em
2
1 Li da paae saŋsi'a ka David bu'os Zugsɔb la ye, “M kem Juda tɛɛns la yinne ni zin'inɛɛ?” Ka Zugsɔb la lɛbis ye, o kem. Ka David lɛm bu'os ye, “Yaanɛ ka m na keŋɛ?” Ka Zugsɔb la lɛbis ye, “Kem Hebron teŋin.” 2 Alazug David da duoe nɛ o pu'aba ayi', Ahinoam onɛ yi Jezireel na la nɛ Abigel onɛ an Nabal pʋkɔɔnr ka yi Kaamel na la. 3 David mɛ da nɔk dap banɛ bɛɛ o san'an la ban nɛ ba yidimi mɔri ba keŋ zin'in Hebron nɛ tembanɛ bɛɛ anina la. 4 Juda dim da kɛnɛ Hebron na nɔk malʋŋ kpaam bu'oe niŋ David zug, ka diis o na'am, ye o an Juda dim na'ab.David n pian' tis Jabis Gilead dim la yɛla
Ban daa yɛl Na'ab David ye Jabis Gilead dimi mum Saul la, 5 o da tʋm nidibi yɛli ba ye, “Zugsɔb albareka na bɛ nɛ ya. Yanamɛ maal sʋm ka mum Saul onɛ aan ya zugdaan la. 6 Zugsɔb la mɛ na maali ya sʋm ka pa'ali ya o sida an si'em ka mam mɛ na maali ya ala, yanamɛ tʋm tʋʋm sʋŋ si'a la zug. 7 Nannanna kpɛ'ɛŋimini ya mɛŋ, ka kpɛ'ɛŋi ya sʋnf, ka ya zugdaan Saul kpiya, ka Juda dim diis man na'am ye m aan ba na'ab.”
Isibosef n di Israel na'am la yɛla
8 Abner onɛ an Nier biig ka an Saul zabzabidib kpɛɛm la da nɔk Isibosef onɛ an Saul biig la mɔr o kɛn Mahanam teŋin na, 9 ka diis o na'am anina, ye o sʋ'oe Gilead nɛ Aser nɛ Jezireel la'am nɛ Efiram nɛ Benjamin nɛ Israel wʋsa. 10 Isibosef onɛ an Saul biig la da anɛ yʋma pisnaasi ka di Israel na'am, o da di na'am la nɛ yʋma ayi'. Amaa Juda dɔɔg la on da bɛŋi dɔl David. 11 David mɛ da bɛ nɛ Hebron teŋin ka di Juda na'am yʋma ayɔpɔi nɛ nwadis ayuobʋ.
Tanp nwɛ'ɛb yɛla
12 Abner onɛ an Nier biig la da la'as nɛ Isibosef onɛ an Saul biig la nidib ka yi Mahanam keŋ Gibeon. 13 Ka Joab onɛ an Zeruyia biig la nɛ David nidib da yii tʋ'ʋsi ba Gibeon bɛuŋin la. Ka bama zi'e bɛuŋ la nɔɔrin ka bama la mɛ bɛ gbɛkaŋa la sa. 14 Ka Abner yɛl Joab ye, “Ti kɛl ka na'akim la sieba duoe zab taaba ka ti gɔs.” Ka Joab lɛbis ye, “Li anɛ sida; kɛl ka ba zab.” 15 Ka ba duoe zi'en ka ba kaal Benjamin nɛ Isibosef onɛ an Saul biig la nidib pii nɛ ayi', ka mɛ kaal David nidib pii nɛ ayi'. 16 Ka sɔ' wʋsa gban'e o bi'em zug, ka nɔk zaba sʋ'ʋgʋ kʋns o lʋgiri vɛ'ɛg o lɛbis o tuon, ka ba la'am lu teŋin. Dinzug ka ba buon Gibeon teŋ la zin'ikan ye, Helkaf Hazzurim.a
17 Daakan la zaba la da mu'oe nɛ galis ka David nidib la zabi nyaŋ Abner nɛ Israel dim la wʋsa. 18 Zeruyia biribis atan' la mɛ da bɛɛ ani: Joab nɛ Abisai nɛ Asahel. Asahel nɔba da kpi'em nɛ zɔɔgʋ nwɛnɛ walig nɛ. 19 O da kad Abner hali ka pʋ gi'ed datiuŋ bɛɛ dagɔbʋga. 20 Ka Abner zɔt ka gi'e nya'aŋi gɔs ka bu'os ye, “Fʋnɛ laa, Asahel?” Ka o lɛbis ye, “Ɛɛn, manɛ la!” 21 Ka Abner yɛl o ye, “Fɛndigimi fʋ dagɔbʋg bɛɛ fʋ datiuŋʋ gban'e na'akim la yinne faaɛn o zaba la'ad la wʋsa.” Ka Asahel zan'as ka kpɛn kat o. 22 Abner da lɛn sa'al Asahel ye, “Basim ka da kati ma; bɔɔ na kɛ ka man nwɛ' fʋ basɛ? Ka m ya'a niŋ ala m na niŋ wala gɔsi fʋ bier Joab nindaanɛ?” 23 Amaa Asahel da zan'as ka kpɛn dɔl o. Alazug Abner da lɛbis o kpan la nya'aŋi kʋns Asahel pʋʋr ka li tɔligi yii o nya'aŋ. Ka o kpɛn lii anina kpi. Ka onɛ wʋsa gat ka paae zin'ikanɛ ka Asahel lii kpi la, asɛɛ ka o zi'en.
24 Amaa Joab nɛ Abisai da kpɛn kat Abner, winnigi ti bɔɔd kpɛn'ɛb la, ka ba paae Amma kʋkʋn kanɛ kpi'e teŋ kanɛ buon Gia, ka ba dɔlli anina ken Gibeon teŋ sian'arin la. 25 Benjamin nidib la da zi'en Abner nya'aŋ ka ba la'as gumm zi'e kʋkʋn la zug. 26 Ka Abner buol Joab ye, “Ti na kpɛn kʋʋd taaba saŋa wʋsaa? Fʋ zi' ye din na zi dataadʋg naa? Bʋndaar ka fʋ na kɛ ka ba basi ba ba'abiis la kadibɔ?” 27 Ka Joab lɛbis ye, “Wina'am ma'aa mi' dinɛ naan niŋin fʋ ya'a pʋ pian'anɛ, nidib la naan kpɛn katinɛ ba ba'abiis la hali ka bɛog ti nie.” 28 Alazug ka Joab pieb na'atan, ka nidib la wʋsa gu'oe ka pʋ lɛn kat Israel dim la, ka mɛ pʋ lɛn zabɛ.
29 Yʋ'ʋŋ kan wʋsa Abner nɛ o nidib la da keŋ paae Araba. Ba da lɔ'ɔŋ Joodan kɔldaug la, dɔlisi yi Bitron teŋin paae Mahanam teŋin. 30 Ani ka Joab lɛb ka pʋ lɛn kad Abner ya'asɛ, ka buol o nidib la wʋsa la'as. David nidib la pii nɛ awai da kpi ka Asahel pʋ paasi. 31 Amaa David nidib la da kʋ Benjamin nimbanɛ da bɛ nɛ Abner la kɔbis atan' nɛ pisyuobʋ. 32 Ba da mum Asahel nɛ o saam yaʋgʋn Betilehem teŋin. Ka Joab nɛ o nidib la keŋ yʋ'ʋŋ la wʋsa nie bɛogʋ paae Hebron teŋin na.