Ayi' Samuel
David n wʋm na'ab Saul kum labaar si'em
1
1 Na'ab Saul kum la nya'aŋ, David da nyaŋ Amalek dim ka lɛb Ziklag teŋin na, ka kpɛlim ani daba ayi'. 2 Daba atan' la daar ka dau sɔ' yi Saul nɛ o nidibi la'as zin'isi'a zaba ni la kena, ka o fuud aans ka o zug wʋsa an uusʋg ka li pa'al o sʋnsa'aŋ. On da paae David san'an na la ka igin teŋin na'as o. 3 Ka David bu'os o ye, “Fʋ yi yaanɛ na?” Ka o lɛbis ye, “Man yinɛ Israel dim la'asʋg la zin'igini su'a zɔɔ kena.” 4 Ka David bu'os o ya'as ye, “Yɛlimim, bɔɔ maalɛ?” Ka o lɛbis ye, “Nidib la zɔɔ widig zabbɔn'ɔgin la ka nidib bɛdegʋ kpi. Saul nɛ o biig Jonatan mɛ kpiya.” 5 Ka David bu'os dau la ye, “Anɔ'ɔnɛ mɔr labaar la na yɛli fɔ? Ka fʋ niŋ wala baŋ ye Saul nɛ o biig Jonatan kpiya?” 6 Ka o lɛbis ye, “Man bɛɛn nɛ Giliboa zuorin la ka Saul mɛ bɛɛ anina ka nɔk o kpan nɛ ti'il ka dɛlli li, ka zabzabidib nɛ ba zaba tɛrekonam la'asi gilig o. 7 Ka on gi'e gɔsi nyɛɛm la ka buolim, ka m bu'os o ye, ‘Fʋ bɔɔd ye m maal bɔɔ tisi fɔ?’ 8 Ka o bu'osim ye, ‘Fʋ aan anɔ'ɔnɛ?’ Ka m lɛbis o ye, ‘Amalek nid.’ 9 Ka o yɛl ye, ‘Li'elim na kʋʋ m, ka mam pu'alim si'em la m pʋ lɛn lal nɛ kum amaa ka lɛɛ nan vʋe.’ 10 Ka m li'eli o san'ani kʋʋ o bɔzugɔ, m mi' ye on sadigim pu'alim dig si'em la o kʋ nyaŋi vʋ'ʋgɛ. Din ka man nɔk na'am zupibig la o zugin, nɛ baŋ kanɛ bɛɛ o nu'ugin la mɔri kena na ye m tisi, m zugdaan.” 11 Ka David nɛ banɛ bɛɛ anina la wʋsa yɛɛsi ba fuud la aans sʋnsa'aŋ zug. 12 Ka ba kum ka lɔ nɔɔr Saul nɛ o biig Jonatan yɛla ti paae zaam, nɛ Zugsɔb nimbanɛ an Israel dim la yɛla, ban kʋʋ ba wʋsa zaba ni la zug. 13 Ka David bu'os dau kanɛ yɛl o Saul kum la ye, “Fʋ yi ya na?” Ka o lɛbis ye, “Man anɛ Amalek nid.” 14 Ka David bu'os o ye, “Bɔ ka fʋ pʋ zɔ dabiem ka nɔki fʋ nu'ugʋ san'am onɛ ka Zugsɔb gaŋ ka bu'oe malʋŋ kpaam niŋ o zugɔ?” 15 Ka David buol o nidib la yinne yɛl o ye, “Kem nwɛ' o bas!” Ka o keŋ nwɛ' o bas ka o lu teŋin kpi. 16 Ka David yɛl ye, “Fʋ ziim na kpɛlimi fʋ mɛŋ zugin, lin sadigim yii fʋ mɛŋ nɔɔrin na di kasɛt ye fʋnɛ kʋ onɛ ka Zugsɔb gaŋ ka bu'oe malʋŋ kpaam niŋ o zug la.”David sʋnsa'aŋ yʋʋm
17 David da yʋ'ʋm yʋʋm kaŋa Na'ab Saul nɛ o biig Jonatan yɛla. 18 Ka tis nɔɔr ye ba pa'alim Juda dim yʋʋm kaŋa, ka ba buoli li ye, Tuk Yʋʋm, ka ba sɔbi li Jaser gbauŋʋn la, ye,
19 “Ya girima dim la kpii dig la,
Giliboa zuoya la zug ka ya kpi'euŋ la naae.
20 Da yɛli li yɛla Gaf teŋinɛ,
mɛ da mɔɔnnɛ li yɛla Askɛlon suoya la nii.
Ka Filistia dim pu'ayuos sʋnf na ma'ae
ka banɛ pʋ kpɛn' baŋʋ la pu'asada maal sumalisim.
21 Kai! Giliboa zuorɛ, mɛligim kʋ luu fʋ zugin bɛɛ saa nii,
bɛɛ pɔɔd banɛ maan zʋʋd la lɛn du'a ya'asɛ!
Bɔzugɔ ani ka ba san'am kpi'euŋ sɔb la gbanti'edʋg,
Ba kʋ lɛn suoɛn Saul zaba gbanti'edʋg la nɛ kpaam.
22 Saul nɛ Jonatan da nyaŋidi ba dataas,
Ba da kʋʋd kpi'emnam saŋa wʋsa:
Jonatan tiraug la nan zi' lɛb zaalim,
Saul sʋ'ʋraug la nan zi' lɛb ka o sʋnf pʋ ma'ae.
23 Saul nɛ Jonatan daa nɔŋ taaba ban daa vʋe la,
la'am nɛ kum zin'igin ba pʋ wɛligɛ.
Ba daa zɔti gat siligʋ na ian'ad
ka mɔr paŋi gat gbigim.
24 Yanam Israel pu'ayuosɛ, kummi Saul yɛla
onɛ nɔk na'abiis fuudi yɛɛli ya
ka pili ya nɛ sanlima la'avɛnla la.
25 Israel dima wʋmmiya, ya kpi'euŋ la naae ya;
Jonatan kpii dig Giliboa zuoya zug la.
26 M ba'abiig Jonatan, m sʋnf san'ami fʋ yɛla;
fʋ daa anɛ onɛ paae m ya'am.
Fʋn daa nɔŋim si'em la anɛ nyalima,
li daa anɛ nyalima hali gat pu'ab nɔŋilim.
27 Israel dima, ya kpi'euŋ la naae ya!
Zaba la'ad la wʋsa bɔdig ya!”