6
येसुसिन नासरेत ता आलर मईन मल नन्नर
1 येसुस कफरनहूम नगरेन अम्बरकी तंग्है परदका अड्डा नू बरचस। अरा आसी चेलर हूँ आसी गने केरर। 2 ख़न्न ऎख़ना उल्ला नू आस गोड़हा एड़पा नू सिखाब'आ हेलरस। बग्गे आलर अदन मेंजर ती अनचकरर केरर अरा जोक्को आलर ब'आलियर, “ईस गे एन्ने लूर ही कत्था, अरा एन्ने अकबक नलख नना गे सवंग एसलेक ख़क्खरा? 3 ईस बढ़ाईस मलदस का?, नाम अख़दत का ईस गा मरियम ही तंग्दस, अरा ईसी तंग्ड़िबगर याकॊब अरा यॊसॆस अरा यूदस अरा सिमॊन हिकनर। अरा ईसी बहिनोर हूँ नम्है पद्दा नू र'अनर।” एन्ने बाचर ती आर आसिन एन्ने मईन मल नंजर।
4 येसुस आरिन बाचस, “धर्मेसी कत्था तिंगुस गे तंग्है नगरे नू अरा तंग्है पाहियर नू अरा तंग्है एड़पा नू लेका मईन माल मनी।”† 5 आस असन बग्गे अकबक नलख मल नंजस। एन्देरगेका नासरेत पद्दा ता आलर मल पत्ताचर का आस मसीस हिकदस। ख़ने आस जोक्को रोगियर मइय्याँ लेका तंग्है ख़ेक्खा उइय्यरकी आरिन कोड़े नंजस। 6 आर आसिन मल पत्ताचर इदन आस ऎररकी अकबकरस केरस।
येसुस तंग्है बारा तइरकारिन पद्दा नू तइय्दस
अरा येसुस तंग्है चेलर गने पद्दा पद्दा नू कालरकी आलारिन सिखाब'आलियस। 7 उन्दुल आस बारो चेलारिन तंग्है गुसन मीख़ियस, अरा आरिन ऎंड़ ऎंड़ ननरकी नन्ना नन्ना पद्दा नू आलारिन सिखाब'आ गे तइय्या हेलरस। अरा आरिन तइय्ना ही मुन्द आस आर गे मलदौ बॊलतन आलर ती ओथ्र'आ गे आकुस चिच्चस। 8-9 आस आरिन पॆसस, “नीम डहरे ऎको बारी खरपा गुट्ठी अत्ता अरा सोट्टा लेका हो'आ, अरा एन्द्रा हूँ अमा हो'आ, मंडी हूँ मला, झोला हूँ मला, थइला नू रुपया हूँ मला, अगरहा किचरी हूँ अमा धर'आ।”† 10 अरा आस अउरिम आरिन बाचस, “नीम पद्दा नू कालो बारी एका एड़पा नू कोर'ओर आ एड़पा नू आ पद्दा ती उरखना गूटी ओकोरके। 11 नीम एकअम अड्डा नू कादर, असला आलर निमन मल परघ'अनर अरा निम्हैन मल मेन्नर होले, नीम असलेक उरखो बारिम निम्है ख़ेड्डे ता रीड़ोन ख़ेत्तके चि'अके। ईद आर गे निम्है चेताब'अना मनो।”†
12 ख़ने चेलर नन्ना नन्ना पद्दा कालरकी आलारिन धर्मेसी कत्थन मेन्त'आलियर का आर गे जियन किर्त'अना दिम मनो। 13 अरा आर बग्गे नादन ओथ्र'आलियर, अरा बग्गे रोगियर गे जैतून इसुंग टूड़रकी आरिन कोड़े ननालियर।†
यॊहन नूड़रत'उसिन पिटना
14 हॆरॊदॆस अंटिपस बॆलस येसुसी हलन मेंजस, एन्देरगेका अजम आलर आसी पत्त नू कछनख्र'आलियर। जोक्कोर ब'आलियर, “यॊहन नूड़रत'उस केचका ती उज्जा चॊदतारकादस, आस इसन किर्रकादस, औंगेम ईस गे इबड़ा अकबक नलख नना गे धर्मेसी सवंग र'ई।”† 15 अरा जोक्कोर ब'आलियर, “ईस चिरान ता धर्मेसी कत्था तिंगू एलियस हवे।” अरा नन्नर ब'आलियर, “ईस पच्चा परिया नू रहचका धर्मेसी कत्था तिंगुर लेक्खा ओन्टा धर्मेसी कत्था तिंगुस हिकदस।”
16 हॆरॊदॆस अंटिपस बॆलस येसुसी पत्त नू आलर ही ब'अनन मेंजस ती ब'आलियस, “अबड़ा अकबक ही नलख गुट्ठी ननुस यॊहनस हवे, ऎन यॊहनसी कुक्कन खंड़ताचकन, लिकिन आस उज्जा चॊचस।”
17-18 एन्देरगेका जोक्क उल्ला ही मुन्द हॆरॊदॆस बॆलस हॆरॊदिया आबोन उइय्काचस, एकाद हॆरॊदॆसी भइय्योस फिलिप्पोसी मुक्का रहचा। हॆरॊदॆस फिलिप्पोसी उज्जनुम अदिन उइयस। यॊहनस हॆरॊदॆसिन घड़ी घड़ी ब'आलियस, “निंगा निंग्ड़िसी मुक्कन उइय्ना धर्मेसी नॆग ती बिड़दो र'ई।” ख़ने हॆरॊदिया हॆरॊदॆस ती बिद्दिया का यॊहनसिन जेहेल नू सजताना र'ई। ई चड्डे हॆरॊदॆस यॊहनसिन गुड़'आ गे सैनारिन तइय्का रहचस, अरा आसिन धर'अरकी जेहेल नू सजताचकाचस।† 19 लिकिन हॆरॊदिया यॊहनसिन अउरिम बदला हो'आ गे पिटत'आ बिद्दिया, लिकिन अदही ती एन्ने मना पोल्ला। एन्देरगेका हॆरॊदॆस आसिन जेहेल नू बछाब'अरकी उइय्यस। 20 हॆरॊदॆस इदिन नंजस एन्देरगेका आस यॊहनसिन इल्चियस अरा आस अक्खस का यॊहनस ओन्टा उजगो अरा नेम्हा आलस रहचस। बॆलस बल्लालियस का ऎन एन्देर ननोन, लिकिन आसी कत्थन मेना बिद्दियस।
21 मुन्दा हॆरॊदिया गे हॆरॊदॆसी कुन्दुर उल्ला नू यॊहनसिन पिटा गे ठौका बेड़ा ख़क्खरा। हॆरॊदॆस तंग्है कुन्दुर उल्ला मन्ना नू तंग्है गढ़िया ता मुध आलर अरा फउद ही मुद्धर अरा गलिलेया जिला ता मुध आलर गे कोहाँ मंडी चिच्चस। 22 एकाबारी आर जम्मेर ओनालियर हॆरॊदिया ही तंग्दा आ कुठली ही उला बरचा ती नलिया। ईद हॆरॊदॆस अरा आसी उर्मी पाहियारिन रिझाबाचा। ख़ने बॆलस आ कुकेन बाचस, “नीन एन्द्रिइम ने'अय, ऎन निंगा गे अदिन चि'ओन।” 23 अरा आस अदही गने किरिया हूँ मोक्खस, “एन्द्रा ने'ओय अदिनिम चि'ओन, एंग्है अधा राजिन ने'ओय होले हूँ अदन ऎन चि'ओन।”
24 ख़ने लॆम आद आ कुठली ती बहरी कालरकी तंग्योन मेंजा, “ऎन एन्द्रा ने'ओन?” तंग्यो अदिन बाचा, “यॊहन नूड़रत'उसी कुक्कन ने'अय।”
25 लॆम आ कुकोय किर्रिया ती बॆलस गुसते एन्ने नॆचा, “एंगा गे अक्कुन यॊहन नूड़रत'उसी कुक्कन ओन्टा थरिया नू चि'आ।”
26 इदन मेंजस ती बॆलस अजम हेन्दो मंजस। लिकिन आस तंग्है मोक्का किरिया, अरा आसी पाहियर चड्डे आस अदही ने'अनन टाँड़'आ पोल्लस। 27 ख़ने बॆलस लॆम ओन्टा जल्लादसिन यॊहनसी कुक्कन खंडा ओन्द्र'आ गे आनियस ती जेहेल नू तइय्यस। आस जेहेल नू कालरकी यॊहनसी कुक्कन इड़बियस। 28 तहाँ आसी कुक्कन ओन्टा थरिया नू ओन्द्रस, अरा अदन आ कुकोय गे चिच्चस, अरा आद तंग्यो गे चिच्चा। 29 एन्देर मंजा अदिन यॊहन नूड़रत'उसी चेलर मेंजर ती बरचर, अरा आसी मॆदन हो'अरकी ओन्टा माड़ा नू मंडियर।
पाँच हजार आलारिन ओन्त'अना
30 बारा तइरकर येसुस आरिन तइय्काचस असलेक ती आस गुसन किर्रियर। अरा आर एन्देर एन्देर नलख नंजकाचर अरा सिखाबाचर अबड़ा उर्मिन आसिन तिंगियर। 31 असन येसुस गुसन बग्गे आलर काला बर'आलियर। ई चड्डे आर गे मंडी ओना गे हूँ बेड़ा मल ख़क्खरा। औंगेम आस आरिन आनियस, “एंग्है गने बरा, नाम एकअम उछिन्द अड्डा नू कालरकी कटिक ख़न्न ऎख़्र'ओत।”
32 ख़ने आर ओन्टा डोंगा नू अरगरकी ओन्टा उछिन्द अड्डा केरर। 33 लिकिन बग्गे आलर आर ही कानन ईरियर ती आरिन चिन्हचर अरा अक्खर का येसुस अरा आसी चेलर एक्सन कालनर। अरा आर हेद्दे हेद्दे ता उर्मी पद्दा ती ख़ॊंड़ररकी आर ती मुन्द असन बोंग अंड़सियर। 34 येसुस डोंगा ती इत्तियस ख़ने पिंडी नू कोहाँ गोंहड़न ईरियस। आस गे आर ही मइय्याँ सोग्गे लग्गिया, एन्देरगेका आर ख़ापुर मलका भेंडो लेक्खा रहचर। ख़ने आस आरिन कैनो गोटंग कत्था ही पत्त नू सिखाब'आ हेलरस।†
35 बीड़ीपुत बारी चेलर बरचर ती येसुसिन बाचर, “ईद उछिन्द अड्डा हवे, अरा ईद बीड़ीपुतना बेड़ा हवे। 36 औंगे ईरिन तइय्या चि'आ। होले ईर ओनबेंड़र'आ खूरी अरा पद्दा नू कालरकी तमा ओना मॊख़ा गे इन्द्रिइम ख़ेन्दा ओंगोर।”
37 लिकिन आस आरिन किर्त'अर बाचस, “मला! नीमिम ईर गे ओना मॊख़ा गे इन्द्रिइम चि'आ।” आर आसिन किर्त'अर बाचर, “इबड़ा ओर्मर गे ओना मॊख़ा गे ख़ॆन्दोम होले, ओर्तोसी ऎंड़ सौ उल्ला ता भुती ही रुपया ती हूँ माल मनी।” 38 लिकिन आस आरिन किर्त'अर बाचस, “कला, निम्है गुसन ऎ बग्गे असमा र'ई? अदन बेद्दे ऎरा” आर कालरकी बिद्दियर ख़ने आसिन बाचर, “एम्है गुसन पांच असमा अरा ऎंड़ इंजो लेका र'ई”
39 ख़ने येसुस चेलारिन गोंहड़न हरियर लट्टी नू खोंड़हा खोंड़हा ओक्त'आ गे आनियस। 40 अन्नेम आर सौ सौ अरा पचास पचास खोंड़हा नू उक्कियर। 41 येसुस अबड़ा पांच असमन अरा ऎंड़ इंजोन होच्चस, अरा मेर्ख़ा तरा ऎररकी आद गे धर्मेसिन धन्यवाद नंजस, अरा असमन अरा इंजोन किच्चियस ती अदिन ख़ट्टा गे चेलर गे चिच्चस। चेलर ओर्मर गे अबड़न ख़ट्टियर। 42 आर ओर्मर मॊख़रकी उड़चर केरर। 43 अरा चेलर बारा डउड़ा एंगरका टुटका असमन अरा इंजोन ख़ॊंड़चर। 44 असमा अरा इंजोन मोक्कर ही गन्ती मलागूटी पांच हजार मॆतर अरा आर ही एड़पातर हूँ रहचर।
येसुस समुदर नू ऎकदस
45 लॆम येसुस चेलारिन डोंगा नू अरग'अरकी तंग्है ती मुन्द बॆतसैदा नगरे काला गे आनियस। येसुस गोंहड़न उडर'अना गूटी असन रहचस। 46 आरिन उडराचका ख़ॊख़ा आस परता नू बिन्ती नना गे केरस।
47 इकला बीड़ी पुत्तिया ख़ने चेलर ही काना डोंगा समुदर ही मझी नू रहचा अरा येसुस पिंडी नू ओर्ते लेका रहचस। 48 आस ईरियस का चेलर गे डोंगन हंकनुम हंकनुम नगदे बैसन मंजा केरा, एन्देरगेका ताका आर ही मुन्द तरती धुक'आलिया। ख़ॆर चींख़ना माख़ा येसुस समुदर नू ऎकरकी आर गुसन केरस। आस आरिन कट्टा बेद्दालियस ख़ने, 49 आर आसिन समुदर नू ऎकनन ऎररकी, आसिन ओन्टा नाद ब'अरकी चिच्चियारर। 50 एन्देरगेका आर आसिन ऎररकी इल्चियर केरर। लिकिन आस लॆम आर ही गने कछनख्रस, “डिढ नना! ऎन हिकदन, अमा एल्चा।” 51 फिन आस डोंगा नू अरगियस ती आर गने उक्कियस। ख़ने ताका मड़चा केरा। अरा आर अजम अकबकरर केरर। 52 एन्देरगेका आस असमन किच्चरकी बग्गे आलारिन मॊख़ताचस, अदिन आर ईरियर, अन्नु हूँ आस एवन्दा सवंगिय र'अदस अदिन आर मल बुझ्रर। आर इदिन चिहुंक लगे मल सोच्चर।
येसुस गेन्नॆसरेत नगरे नू रोगियारिन कोड़े नन्दस
(मत्ता 14:34–36)
53 आर अउर हूँ गलिलेया समुदर नू कालरकी गेन्नॆसरेत नगरे अंड़सियर, अरा डोंगन घाट नू इजताचर। 54 आर डोंगा ती इत्तियर ख़ने, असला आलर लॆम येसुसिन चिन्हचर। 55 अरा येसुस इसन र'अदस अदिन तेंगा गे आर आ चक ही उर्मी अड्डा नू बोंगर। येसुस एसन एसन रहचस एन्ने आर मेंजर असन असन आर रोगियारिन खटी नू चेड़'अरकी ओन्द्रर बरचर। 56 आस पद्दा महले नगरे महले खूरी नू एक्सअनिम केरस, आलर रोगियारिन बजार टोंका नू ओन्द्रर बरचर। अरा आर आसिन तंगन महले तंग्है किचरी ही अंचरन रोगियारिन ऎसड़'आ चि'आ गे गोहरारर। अरा ऎ बग्गे आलर आसिन महले आसी किचरिन ऎसड़र आर ओर्मर कोड़े मंजर केरर।