13
ख़ॆख़ेल मुंज्रना ही चिन्हा
1 येसुस अरा आसी चेलर धर्मेसी मन्दिर ती उरखालियर, ख़ने आसी चेलर ती ओर्तोस बाचस, “अना गुरु! ऎरा, एका कोहाँ पखना! अरा एका नापे मन्दिर!” 2 येसुस आसिन बाचस, “नीम एन्ने ब'अदर का ई धर्मेसी मन्दिर एका नापे र'ई, लिकिन उन्दुल ई मन्दिर उर्मी दिम धसतार'ओ कालो अरा उर्मी पखना अक्कुन र'ई आ अड्डा नू मल र'ओ।”
3 एन्ने बाचका ख़ॊख़ा येसुस चेलर गने जैतून परता केरस अरा असन धर्मेसी मन्दिर ही मुन्दहारे उक्कियस। ख़ने पतरस अरा याकॊब अरा यॊहन अरा अन्द्रेयस भिनेम कालरकी येसुसिन मेंजर, 4 “एमन तेंगा, इबड़ा कत्था इकला मनो?, इबड़ा कत्था जम्मा मन्ना र'ई, इदन अख़'आ गे एन्देर चिन्हा मनो?”
5 येसुस आरिन तेंगा हेलरस, “चिहुंक र'आ, निमन नीकईम अम्बोर ठक'आ। 6 नगदे आलर एंग्है नामे ती बर'अरकी ब'ओर, ‘ऎन मसी हिकदन’ एन्ने ब'अरकी आर नगदे आलारिन ठक'ओर। 7 इकला नीम लड़ाई अरा लड़ाई ही हलन मेनोर होले अमके बयार'आ। एन्देरगेका इबड़ा कत्था मन्ना चाड़ र'ई, लिकिन मुंज्रना बेड़ा लॆम मल बर'ओ। 8 ओन्टा जातियर नन्ना जातियर ही बिड़दो नू, अरा ओन्टा राजी नन्ना राजी ही बिड़दो नू लड़ाई गे चो'ओ। ख़ॆख़ेल नू कैनो अड्डा नू ख़ॆख़ेल नुकुरना मनो, अरा एन्ने ख़ॆख़ेल नू अड्डा अड्डा अकाल मनो। लिकिन ईद गा खिलपत ही ऒरे मन्ना लेका हवे अरा अउरिम कोड़हे सस्ती बरना र'ई।
9 लिकिन इकला इबड़ा मनो नीम चिहुंक ती र'अके। आलर निमन हें'ओर हो'ओर, अरा पंचायत नू चि'ओर, अरा नीम गोड़हा एड़पा नू लौर'ओर। नीम एंग्है चड्डे राजीख़ापुर अरा बॆलर ही मुन्द इजतार'ओर। एन्देरगेका नीम एंग्है गने चॊंख़्र'उर हिकदर। लिकिन ईद निमा गे एंग्है पत्त नू आरिन तेंगना ही मोका मनो।† 10 लिकिन ख़ॆख़ेल ही मुंज्रना ती मुन्द दौ कत्था उर्मी जातियर गे मेन्त'अना र'ई। 11 इकला निमन हें'अरकी पंचायत नू सोंप'ओर, होले नीम मुन्द ती अमके सोच'आ का ऎम एन्देर ब'ओम। लिकिन निमन एन्देर ब'अना र'ई अदिन आ बारिम तेंगतार'ओ, अदिन नीम ब'अके। एन्देरगेका ब'ऊ नीम मला नेम्हा बॊलतस हवे।
12 आलर तम्है भइय्योर अरा बहिनोरिन नट'ओर अरा पिटर'ओर, एन्देरगेका आर एंग्है गने चॊंख़्रर। अरा अयंग-बंग तम्है ख़द्द-ख़र्रारिन एन्नेम ननोर। अरा ख़द्द-ख़र्रर तम्है अयंग-बंगर ही बिड़दो चो'अरकी पिटत'ओर चि'ओर। 13 नगदे आलर निमन बिड़दो ननोर एन्देरगेका नीम एंग्है गने चॊंख़्रकर। लिकिन नॆ तम्है उज्जना ही मुंज्रना गूटी सह'ओर आरिम जनमजुग ही दंडे ती बछर'ओर।†
14 (पढ़'उर बुझुर'आ हो'आ ऎन एन्देर लिख'आलदन) नीम इकला आ उझड़'अना भंगड़भट्ठ ख़ाँड़ना आलॊन धर्मेसी मन्दिर ही नेम्हा अड्डा नू इज्जका ऎरोर एसन अदगे मल इजना रहचा। ई चड्डे आलर धर्मेसी मन्दिरन अम्बोर चि'ओर। अउलम यूदेया जिला नू र'उर परता मइय्याँ बोंके कालके।† 15 अरा एड़पा मेसगा नू र'उर इन्द्रिइम ओन्द्र'आ गे एड़पा भितरी अम्बोर काला।† 16 ख़ल्ल नू नलख ननुर तम्है किचरिन हो'आ गे एड़पा अम्बोर किर्रा। 17 अबड़ा उल्ला नू ओत्था ऎख़ अरा ख़दमाख़ो मुक्कर गे नगदे सस्ती मनो। 18 बिन्ती नना का ईद पइय्याँ उल्ला नू अम्बन मना। 19 एन्देरगेका अबड़ा उल्ला नू नगदे सस्ती मनो का धर्मेस ख़ॆख़ेलन गढ़चका उल्ला ती इन्ना गूटी अन्ने मल्ला मंजका, अरा ख़ॊख़ा हूँ अन्ने सस्ती मल मनो।† 20 उर्बस अबड़ा उल्लन मल घटा ब'अना होले, नॆ हूँ मल बछर'ओर दने। लिकिन तंग्है चज्जिका आलर ही चड्डे आस अबड़ा उल्लन घटा बाचकादस।
21 फिन नीकईम निमन, ‘ऎरा, मसीस इसन र'अदस महले असन र'अदस’ एन्ने ब'अदस होले, आसी कत्थन अमके पत्त'आ। 22 एन्देरगेका जोक्कोर फसकट'ओर ती ऎन मसी हिकदन ब'ओर अरा जोक्कोर फसकट'ओर ती ऎन धर्मेसी कत्था तिंगुर ब'ओर। अरा बेड़ाब'आ गे आर चिन्हा अरा अजगुत नलख गुट्ठिन ऎद'ओर, मना ओंगो होले धर्मेसी चज्जरका आलारिन हूँ बेड़ाब'ओर चि'ओर। 23 औंगे नीम चिहुंक र'आ। ऎन मन्ना उर्मी कत्थन निमन मुन्द तिम तेंगालदन।
येसुस आसी ख़ॆख़ेल नू किर्रना ही पत्त नू तेंगदस
‘बीड़ी अरा चन्दो मल रफ'ओ,
अरा धर्मेस मेर्ख़ा नू र'ऊ उर्मी आलॊन नुक'ओस।’
26 फिन उर्मी आलर मनवा ख़द्दन एंगन बदाली नू ती बरनन ऎरोर। अरा आ बारी ऎन ख़ॆख़ेल ता आलारिन बॆलस लेक्खा आकुस गने राजी ननोन।† 27 फिन ऎन एंग्है पैकारिन तइय्योन ती सौंसे ख़ॆख़ेल ती एंग्है चज्जिका आलारिन ख़ॊंड़'ओन।
येसुस अंजीर मन्न ही जोक्खा ख़ीरी ती सिखाब'अदस
28 अंजीर मन्न ती ई कत्थन सिख्र'आ। अदही गुफरी मनी अरा अतख़ा ख़ॊरा हिलर'ई होले, नीम अख़दर का बिड़ना उल्ला हेद्दे र'ई। 29 इकला नीम इबड़ा कत्थन एन्ने मन्नुम ऎरोर, निमा अख़ना र'ई का एंग्है बरना हेद्दे र'ई। 30 ऎन निमन मानिम ब'अदन, एका गूटी इबड़ा उर्मी कत्था मनो आ गूटी ई परिया ता जोक्को आलर उज्जोर। 31 मेर्ख़ा अरा ख़ॆख़ेल छपर'ओ कालो, लिकिन एंग्है कत्था इकला हूँ मल बदलार'ओ।
येसुसी बरना ही पाब ऎरना नू सपड़ारका र'अना
(मत्ता 24:36–44)
32 एंग्है बरना उल्ला ही पत्त नू धर्मे बंगासिन अम्बरकी नॆ हूँ बलनर। ऎन ख़द्दन अरा मेर्ख़ा ता पैकर हूँ आ बेड़न बलदम।† 33 नीम एंग्है बरना बेड़न बलदर, औंगे नीम एंग्है बरना ही पाब ऎरना नू सपड़ारका र'आ।
34 ई उदाहरन आबोन मेना। ओन्टा आलस रहचस। आस उन्दुल डहरे ईक्कियस। आस एड़पा ती काना ती मुन्द तंग्है जॊंख़र सिरे एड़पा ही उर्मी नलख अम्बियस चिच्चस। तहाँ आस बली ख़ापुसिन जॊहचका र'आ गे आनियस।† 35 अन्नेम नीम एंग्है बरनन जॊहचका र'आ। नेख़ओन ऎन पुतबारी महले अधरात माख़ा नू महले ख़ॆर चींख़ो बारी महले बिजबेड़ा नू बर'ओन। 36 उर्मी बारी सपड़ारका र'आ, मला होले ऎन आचका बर'अरकी निंगन बिगर सपड़ारका ख़क्खोन। 37 ऎन एकदन निमन ब'अदन, अदिन ओर्मारिन ब'अदन, ‘एंग्है बरना ही पाब ऎरना नू सपड़ारका र'आ’।”