मरकुस 5

येसुस मलदौ बॊलता धरचकासिन कोड़े नन्दस

(मत्ता 8:28-34; लूक 8:26-39)

¹ येसुस अरा आसी चेलर समुदर ही आ पक्‍खे गेरासॆनोस राजी नू अंड़सियर। ² तहाँ आर डोंगा ती इत्तियर, ख़ने ओन्‍टा मलदौ बॊलता धरतारका आलस मरघटी ती उरखरकी येसुसिन भेंटार'आ गे बरचस। ³ ई आलस सगरघड़ी मसड़ा नू र'आलियस, आसिन एका ओर्तर हूँ सिकड़ी ती हूँ खुट'आ पोल्‍लर। ⁴ एन्‍देरगेका आस घड़ी घड़ी बिड़ी अरा सिकड़ी ती हॆंतारका रहचस। लिकिन आस सिकड़िन ख़च्‍चियस, अरा बिड़िन टुटका टुटका नंजका रहचस। नॆका हूँ आसिन तम्‍है आकुस नू नना गे सवंग मल रहचा। ⁵ आस उल्‍ला अरा माख़ा बारी हूँ आस मसड़ा गुट्ठी अरा परता ही मझी नू र'अरकी चिच्चि‍यार'आलियस, अरा तान तानिम धारे पखना ती मोचर'आलियस।

⁶ आस येसुसिन गेच्‍छा तिम ऎररकी भेंटार'आ गे बोंगस ती आसी मुन्‍दहारे ख़ेडमूली खत्तर'अरकी मोंजरा नंजस। ^7-8 ख़ने येसुस आसिन बाचस, “हे मलदौ बॊलता, ई आलस ती उरखय बरय।” ख़ने आस चिच्चि‍यारनुम बाचस, “हे येसु! उर्मी ती कोहाँ धर्मेसी ख़द्दायो, एंग्‍है गने निंगा एन्‍देर नलख? ऎन धर्मेसी नामे ती किरया मॊख़दन का एंगन दुक्‍खे अमा चि'आ।”

⁹ येसुस आसिन मेंजस, “निंग्‍है एन्‍देर नामे?” आस येसुसिन बाचस, “एंग्‍है नामे लेगिऒन, एन्‍देरगेका ऎम बग्‍गे र'अदम।” ¹⁰ अउरिम मलदौ बॊलता येसुसिन घड़ी घड़ी गोहरार'आ, का एमन ई सिवान ती गेच्‍छा अमा त‍इय्‍या।

¹¹ असन हेद्दे परता नू किस्‍सी ही ओन्‍टा कोहाँ खरखा मेनालिया। ¹² अबड़ा मलदौ बॊलता आसिन गोहरार'आ, “एमन अबड़ा किस्‍सी नू त‍इय्‍या, होले ऎम अबड़ा नू कोर'आ ओंगोम।” ¹³ ख़ने येसुस अबड़न काला गे बाचस, अबड़ा मलदौ बॊलता बहरी उरखरकी अबड़ा किस्‍सी नू समसारा। आ किस्‍सी खरखा नू मलागूटी ऎंड़ हजार किस्‍सी रहचा। अरा अबड़ा किस्‍सी दलखा ती किइय्या बोंगा, अरा समुदर नू मुलख़िया केच्‍चा।

¹⁴ किस्‍सी ख़ापुर बोंगरकी हेद्दे ता पद्दा अरा अड्डे-बेड्डे टोंका ता आलारिन तिंगियर। ख़ने आलर एन्‍देर मंजकी रहचा अदिन ऎरा गे केरर। ¹⁵ अरा आलर येसुस गुसन बर'अरकी ख़ॊंड़रर, अरा आ आलासिन ईरियर, नॆ नाद ती धरतारका रहचस। आस असन किचरी अत्तरकी तंग्‍है सुरता नू उक्‍का रहचस। ख़ने आर इल्चियर केरर। ¹⁶ नाद धरतारका आलस अरा किस्‍सी गे एन्‍देर मंजा, अदन नॆ ईरका रहचर, आर असन बरचका आलारिन तिंगियर। ¹⁷ ख़ने आर येसुसिन गोहरार'आ हेलरर, “नीन ई सिवान ती किर्रिमबि'आ।”

¹⁸ येसुस डोंगा नू अरगियस, ख़ने नाद ती धरतारका रहचस आस येसुसिन गोहरारते र'आलियस, “ऎन हूँ निंग्‍है गने बर'ओन।” ¹⁹ लिकिन येसुस आसिन बर'आ गे मल चिच्‍चस, अरा आसिन बाचस, “नीन निंग्‍है एड़पा कालरकी निंग्‍है एड़पातारिन तेंगा, उर्बस निंग्‍है म‍इय्‍याँ एका कोहाँ नलख नंजकादस, अरा आस निंग्‍है म‍इय्‍याँ ऎ बग्‍गे सोग्‍गे ईरकादस।” ²⁰ ख़ने आस केरस अरा देकापोली चकभार नू तेंगा हेलरस, का येसुस तंग्‍गा गे एका कोहाँ नलख नंजकाचस। अदिन मेनरकी ओर्मर अकबकरर।

येसुस केचका कुकोय आबोन उजतादस अरा रोगे आलिन कोड़े नन्‍दस

(मत्ता 9:18-26; लूक 8:40-56)

²¹ फिन येसुस डोंगा नू अरगियस, अरा समुदर ही आ पक्‍खे केरस। ख़ने आस गुसन पिंडी नू ओन्‍टा नगदे कोहाँ गोंहड़ा ख़ॊंड़रा। ²² ख़नेम याईर नामे ओन्‍टा गोड़हा एड़पा ता ओन्‍टा मुद्धस असन बरचस। अरा आस येसुसिन ऎररकी आसी ख़ेडमूली खत्तरस, ²³ अरा गोहर'अरकी आसिन बाचस, “सन्नी एंग्‍दा खे'आ बेद्दाली, नीन बर'अरकी अदही म‍इय्‍याँ ख़ेक्खा उइय्‍या अरा कोड़े नना, होले आद मल खे'ओ।” ²⁴ ख़ने येसुस आसी गने केरस। अरा ओन्‍टा कोहाँ गोंहड़ा खत्तरना काना बेसे आसी ख़ॊख़ा केरा।

²⁵ असन ओन्‍टा आली रहचा। आद बारा बछर ती ख़ॆंस काना रोगे ती लिं‍ड़िरकीचा। ²⁶ आद बग्‍गे बैधर गुसन कमत'अना ती दुक्‍खे चॊद'अरकी उर्मी खुर्जिन मुंजिया चिच्‍चा। अन्नु हूँ कोड़े मल मंजा। लिकिन रोगे बग्‍गे जित्तरा केरा। ^27-28 आद येसुसी हलन मेंजा ती एन्ने सो‍च'आलिया, “ऎन आसी किचरिन ऎंवसड़'ओन होले हूँ ऎन कोड़े मनोन।” औंगे आद गोंहड़ा नू आसी ख़ॊख़ा तरती बर'अरकी आसी किचरिन ऎंवसड़ा। ²⁹ ख़ने लेथेम आद ही ख़ॆंस काना ठकरा केरा। अरा आद तंग्‍है मॆद नू अक्‍खा, का आद तंग्‍है रोगे ती उजगारा।

³⁰ येसुस लॆम अक्‍खस का तंग्‍है सवंग नॆकअनिम उजगाचा। ख़ने आस ख़ॊख़ा किर्ररकी गोंहड़न थिथवाँ ईरियस ती मेंजस, “एंग्‍है किचरिन नॆ ऎंवसड़ा?”

³¹ ख़ने आसी चेलर आसिन बाचर, “ऎरा, गोंहड़ा निंग्‍है चरियो तरा खत्तरना बेसे र'ई, अन्नु हूँ नीन ब'अदय, ‘एंगन नॆ ऎंवसड़ा?’”

³² लिकिन येसुस नॆ तंग्‍है किचरिन ऎंवसड़ा, अदन अख़'आ गे चरियो तरा ऎरालियस। ³³ ख़ने तंग्‍है नू कोड़े मंजकन अक्‍खा आ आली इल्‍चिनुम अरा असरनुम आस गुसन बरचा। अरा आद आसिन तंग्‍है नंजका उर्मी कत्‍थन फरीफरी तिंगिया। ³⁴ ख़ने आस अदिन बाचस, “ख़द्दे, नीन एंगन पत्ताचकी का ऎन निंगन उजग'आ ओंग्दन, आदिम निंगन उजगाचा, दौ गने किर्रिमबि'अय, अरा नीन ई रोगे ती उजगार'अय।”

³⁵ येसुस इदन कछनख्र'आलियस, ख़नेम गोड़हा एड़पा ता मुद्धस याईरसी एड़पा ती जोक्को आलर बरचर। अरा आर याईरसिन बाचर, “निंग्‍है ख़द्द गा केच्‍चा केरा। अक्‍कुन गुरुसिन अकबकामब'अना ही चाड़ मल्‍ला।”

³⁶ आर तिंगियर अदिन येसुस मल मेना भेंसरस, अरा गोड़हा एड़पा ता मुद्धासिन बाचस, “अमा एल्चा! एंग्‍है म‍इय्याँ पत्त'अनन लेका उइय्‍या।”

³⁷ अरा आस पतरस अरा याकॊब अरा याकॊबसी भइय्योस यॊहनसिन अम्‍बर नॆकन हूँ तंग्‍है गने बर'आ मल चिच्‍चस। ³⁸ तहाँ आर गोड़हा एड़पा ता मुद्धासी एड़पा नू अंड़सियर। ख़ने आस नगदे आलर ही कांवकांव अरा चींख़ना ओलख़नन अरा अउवारनन ईरियस। ³⁹ अरा आस उला कालरकी बाचस, “नीम एन्‍देरगे कांवकांव मन्‍दर अरा चींख़दर?, ख़द्द मल्‍ला केचका, आद गा ख़न्‍द्र'आली।”

⁴⁰ इदन मेनरकी आर आसिन ख़िल्‍ली नना हेलरर। लिकिन आस आरिन बहरी ओथ्रस। फिन आस कुक्‍के ही तंग्यो तम्‍बन अरा तंग्‍है तिनियों चेलर गने कुठली नू कुक्‍के चूतालिया असन केरस। ⁴¹ तहाँ आस कुक्‍के ही ख़ेक्खन धर'अरकी अदिन अरामी भखा नू बाचस, “तलिता कूम” एकदा ही माने “सन्नी कुक्‍के ऎन निंगन ब'अदन, चो'अय”। ⁴² लॆम आ कुक्‍के चो'अरकी कुद्दा नुंगा हेलरा। (आद बारा बछर ही रहचा।) असन रहचर आर ओर्मर नगदे अकबकरर। ⁴³ फिन आस आरिन चेताबाचस, का ई कत्‍था इसन मंजा इदन नॆकन हूँ अमके तेंगा, अरा बाचस इदगे मॊख़ा गे एन्‍द्रिइम लो चि'आ।