4
चाँख़'उसी जोक्खा ख़ीरी
1 येसुस फिन गलिलेया समुदर ही पिंडी नू सिखाब'आ हेलरस। आसी चरियो तरा कोहाँ गोंहड़ा ख़ॊंड़रा केरा। ख़ने आस समुदर नू इज्जका ओन्टा डोंगा नू अरगियस ती उक्कियस, इदगे का गोंहड़ा आसिन अम्बो थोकबोकामब'आ, अरा आस आरिन ब'आ ओंगोस। उर्मी गोंहड़ा समुदर ही पिंडी नू रहचा।† 2 अरा आस आरिन जोक्खा ख़ीरी ती कैनो गोट कत्थन सिखाबाचस। अरा तंग्है सिखाब'अना नू एन्ने बाचस, 3 “मेना! ओन्टा चाँख़'उस ख़ल्ल नू बिहनी चाँख़'आ गे उरखस। 4 आस तंग्है ख़ल्ल नू बिहनी चाँख़'ओ बारी, जोक्को बिहनी डहरे नू खत्तरा, अदन ऒड़ा बरचा ती मोक्खा चिच्चा। 5 जोक्को बिहनी पखनोरी ख़ॆख़ेल नू खत्तरा, असन ख़ज्जो बग्गे मल रहचा, होले बिहनी लॆम कुन्दिया। 6 अरा बीड़ी सेकचा, ख़ने आद चड़मिया ती ख़इय्या केरा, एन्देरगेका अदही पादा गड्डी मल इत्तकी रहचा। 7 जोक्को बिहनी अच्च-ख़ोप्पा मझी नू खत्तरा, बिहनी परदिया अरा अच्च-ख़ोप्पा हूँ परदिया, ख़ने अदन अरबिया चिच्चा, अरा आद ख़ंज'आ पोल्ला। 8 लिकिन जोक्को बिहनी उपजा ख़ॆख़ेल नू खत्तरा, अरा आद कुन्दिया परदिया अरा ख़ंजा अरा जोक्को तीस गुना ख़ंजा अरा जोक्को साट गुना ख़ंजा अरा जोक्को सौ गुना ख़ंजा।” 9 ख़नेम येसुस गोंहड़न बाचस, “नॆका मेना गे मने र'ई, आस मेन्दस ती बुझुरदस नेकअन।”
जोक्खा ख़ीरी तेंगना ही चड्डे
10 गोंहड़ा ही असते किर्रिम बिच्चका ख़ॊख़ा येसुस ओर्ते लेका रहचस ख़ने, आसी बारो चेलर अरा आसी गने र'उर हूँ आस ती ई जोक्खा ख़ीरी ही पत्त नू मेंजर। 11 आस आरिन बाचस, “धर्मेस आलर ही उज्जना नू राजी नन्ना ही पत्त नू आलर मुन्द मल बुझ्रर। ऎन निमा गे अदन अख़'आ गे अरा बुझुर'आ गे नन्दन। लिकिन नॆ तम्है उज्जनन धर्मेसिन राजी नना मल चि'अनर आर गे ऎन उर्मी कत्थन जोक्खा ख़ीरी रूपे लेका ब'अदन। 12 औंगे नेम्हा पुथी ता कत्था आलर ही उज्जना नू पूरा मनी का,
‘ऎन नन्दन अदिन ऎरदर,
लिकिन अत्रु ती एन्द्रा हूँ मल सिख्र'ओर,
ऎन ब'अदन अदिन मेन्दर,
लिकिन अदही माने मल बुझुर'ओर,
मला होले आर पाप नन्नन अम्बोर ती धर्मेस गुसन किर्रोर
अरा धर्मेस हूँ आरिन छमा ननोस।’”†
येसुस चाँख़'उसी जोक्खा ख़ीरी ही माने चेलारिन तेंगदस
13 फिन आस आरिन बाचस, “नीम ई जोक्खा ख़ीरिन मल बुझुरदर का? होले नीम नन्ना उर्मी जोक्खा ख़ीरी गुट्ठिन एकासे बुझुर'ओर? 14 चाँख़'उस एन्ने लेक्खा आलस र'अदस एका ओर्तस धर्मेसी कत्थन मेन्त'अदस। 15 बिहनी खत्रका डहरे लेक्खा जोक्क आलर हिकनर। आर कत्थन मेन्नर, लिकिन लॆम सैतान बर'अरकी आर ही मेंजका कत्थन मॊधर'आ गे ननी। 16 बिहनी खत्रका पखनोरी ख़ॆख़ेल लेक्खा जोक्क आलर हिकनर। आर कत्थन मेन्नर ती अदिन लॆम खुसमारनुम इंझ्रनर, 17 लिकिन तम्है जिया नू गड्डी गूटी कत्था मल खुपना चड्डे आर जुक्किम उल्ला गे कत्थन पत्त'अनर। अरा सस्ती महले कत्थन पत्त'अना ही चड्डे आर मइय्याँ सतारना बरना बेड़ा आर कत्था ती पत्त'अनन लॆम अम्बनर। 18 जोक्क आलर अच्च-ख़ोप्पा नू बिहनी खत्रका ख़ॆख़ेल लेक्खा हिकनर। अन्नु हूँ आर धर्मेसी कत्थन मेन्नर, 19 लिकिन आर उरुब मना गे अरा बग्गे खुर्जी ख़क्खा बेद्दनर अरा आर ख़ॆख़ेल ता जिनिस ही लेका फिकिर नन्नर। औंगे इबड़ा जम्मा धर्मेसी कत्थन मॊधर'आ गे ननी। औंगे धर्मेस आरिन एन्देर नन्ना र'ई एन्ने बेद्ददस अदिन आर मल नन्नर। 20 लिकिन जोक्क आलर उपजा ख़ॆख़ेल लेक्खा हिकनर। आर धर्मेसी कत्थन मेन्नर अरा इंझ्रनर ती आर एन्देर नना गे धर्मेस बेद्ददस अदिन नन्नर। आर बॆस ख़ोप्पा लेक्खा तीस गुना अरा साट गुना अरा सौ गुना ख़ंजपा चि'अनर।”
बिल्ली ही जोक्खा ख़ीरी
(लूक 8:16-18)
21 येसुस आरिन अउर ओन्टा जोक्खा ख़ीरी तिंगियस,† “आलर बिल्लिन लघा ब'अनर ओन्द्रनर ती ढक्की ती मल कुल्लनर महले खटी किइय्या मल उइय्नर, लिकिन बिल्लिन पक्खा नू उइय्नर। 22 एन्नेम धर्मेसी कत्था ती जोक्क कत्था गुट्ठिन आलर बलनर। लिकिन अक्कुन ई नूख़्रका लेक्खा ई कत्थन आलर अख़'आ गे धर्मेस बेद्ददस।† 23 नीम इदन बुझुर'आ बेद्ददर होले एन्देर मेंजकर अदिन चिहुंक लगाय सोच'आ।”
24 फिन आस आरिन बाचस, “नीम एंग्है ती एन्देर मेन्दर अदही पत्त नू चिहुंक लगय सोच'आ। एन्देरगेका नीम एका बग्गे चिहुंक लगय सोचदर, आ बग्गे बुझुर'आ गे धर्मेस निमन संगरा ननोस, अरा इदिन ती बग्गे हूँ बुझुर'आ गे आस निमा गे संगरा ननोस।† 25 नॆ एंग्है सिखाब'अना ही पत्त नू चिहुंक लगे सोचनर आर गे बग्गे बुझुर'आ गे धर्मेस संगरा ननोस, लिकिन नॆ एंग्है सिखाब'अना ही पत्त नू चिहुंक लगे मल सोचनर, आर ही बुझुरका जोक्क कत्था गुट्ठिन हूँ धर्मेस मॊधरत'ओस चि'ओस।”†
कुन्दना बिहनी
26 फिन येसुस बाचस, “धर्मेसी राजी एन्ने र'ई, ओन्टा आलस तंग्है टोंका नू बिहनी चाँख़स। 27 आस उल्ला माख़ा ख़न्द्रस, अरा जगचस। आ बारिम बिहनी कुन्दिया ती परदिया, लिकिन आस बुझुर'आ पोल्लस ईद एकासे मंजा। 28 ख़ॆख़ेल तान तानिम गछिन परदा अरा दना चि'आ गे नंजा। मुन्द गछी, फिन बईल, अरा फिन बईल नू पंजका दनन चिच्चा। 29 दना पंजा ख़ने आस अदन ख़ॊस्सस, एन्देरगेका ईद ख़ॊयना बेड़ा रहचा।”†
मनी बिहनी ही जोक्खा ख़ीरी
30 फिन येसुस बाचस, “ऎन निमन तेंगोन नाम धर्मेसी राजिन एन्देर गने जोक्ख'ओत। ऎन निमन ई जोक्खा ख़ीरिन तेंगोन। 31 आद मनी बिहनी लेक्खा र'ई। आद ख़ॆख़ेल नू चाँख़'ऊ उर्मी बिहनी ती सन्नी मनी। 32 लिकिन चाँख़तार'ई ख़ने, आद उर्मी बटकी ख़ोप्पा गुट्ठी ती कोहाँ परदी, अरा अदही एन्ने कोहाँ डाड़ा मनी, का ऒड़ा गुट्ठी अदही ऎख़ नू बसा अरा खोता गुट्ठी नना ऊंगी।”
33 आस आरिन ई मदहे ही कैनो जोक्खा ख़ीरी तेंगरकी आर ही बुझुर'आ ओंगना लेक्खा सिखाबाचस। 34 अरा बिगर जोक्खा ख़ीरी बाचका आस आरिन एन्द्रा हूँ मल तिंगियस। लिकिन आस तंग्है चेलर गने तामलेका र'ओ बारी आरिन उर्मी जोक्खा ख़ीरिन बुझाबाचस।
येसुस घटा आबोन मड़ाब'अदस
35 अउलम बीड़ी पुत्त बारी येसुस तंग्है चेलारिन बाचस, “बरा, नाम समुदर ही आ पक्खे कट्टोत।” 36 औंगे गोंहड़न अम्बियर ती आर एका डोंगा नू येसुस रहचस अइय्या अरगियर। अरा नन्ना आलर हूँ आर ही गने नन्ना डोंगा गुट्ठी नू केरर। 37 ख़ने कोहाँ घटा बरचा, अरा लहरा डोंगा नू बर'आ हेलरा, अरा डोंगा अम्मु ती नीदा हेलरा। 38 येसुस डोंगा नू ख़ॊख़ा तरा तक्किया नू कुक्कु नंजस ती ख़न्द्र'आ लगियस। ख़ने चेलर आसिन एज्जर ती बाचर, “हे गुरु! निंगा इदही फिकिर मल्ला का, नाम मुल्ख़ा खे'आ बेद्दालगदत?”
39 ख़ने येसुस चो'अरकी ताकन केप्पस अरा लहरन बाचस, “मड़'अय कलय! अमय गरजार'अय।” ख़ने ताका मड़चा अरा समुदर छछिन्द मंजा। 40 आस तंग्है चेलारिन बाचस, “नीम एन्देरगे एन्ने एलचदर? नीम अक्कुन गूटी हूँ मल पत्त'अदर का ऎन निमन सम्ड़ह'आ ओंग्दन?”
41 ख़ने आर अउरिम नगदे इल्चियर ती ताम ताम नू बाचर, “ईस एकासे आलस हिकदस? नाद लेका मला लिकिन ताका अरा लहरा हूँ ईसहीन पॆस्र'ई।”