Lasarus mati lalu diidupatn agiꞌ
11:1-44
11
Ada saurakng nang badama Lasarus tagah sakit, nang badiapm kaꞌ kampokng Betania man kadua sodaranya nangbini nang badama Maria man Marta.a 2 Maria nian nang naꞌenya minyakiꞌ paha Yesus man binyak wangi lalu ngasatnya man buꞌuknya, Lasarus nang tagah sakit koa adiꞌ baradiꞌnya.b 3 Jaji Maria man Marta nyuruh urakng untuꞌ madahiꞌ Yesus: “Tuhan, ayukng Kitaꞌ nang Kitaꞌ ngasihiꞌ tagah sakit.” 4 Takaꞌ Yesus nangngar kabar koa, Ia bakata: “Panyakit koa inaꞌ ngincakngngaꞌ kaꞌ kamatiatn, tapi madahatnnaꞌ kamuliaatn Allah, biar lewat panyakit koa Anak Allah dimuliaatn.” 5 Yesus kasih kaꞌ Marta, Maria man Lasarus. 6 Jaji takaꞌ Yesus nangngar kabar kadeꞌ Lasarus sakit, Ia inaꞌ langsung ampus kaꞌ kampokng Maria man Marta. Ia singaja badiapm kaꞌ tampat-Nya dua ari agiꞌ. 7 Tapi lakaꞌ dua ari koa Ia bakata agiꞌ kaꞌ murit-murit-Nya: “Injeꞌ diriꞌ mulakng agiꞌ kaꞌ Yudea.” 8 Sahut murit-murit-Nya: “Paꞌ Guru, baruꞌ jaꞌ urakng Yahudi maoꞌ nabakiꞌ Kitaꞌ man batu, man ampeatn Kitaꞌ mulakngngaꞌ agiꞌ kaꞌ koa?” 9 Sahut Yesus: “Inaꞌ keꞌ saari dua balas jam? Sae nang bajalatn kaꞌ siakng ari, pahanya inaꞌ tapilantoꞌ barang ia neleꞌ tarakng dunia nian. 10 Tapi sae nang bajalatn kaꞌ malam ari pahanya tapilantoꞌ, barang inaꞌ ada tarakng kaꞌ diriꞌnya.” 11 Lekoalah kata Yesus. Lakaꞌ koa Ia bakata agiꞌ: “Ayukng diriꞌ Lasarus dah tidur, tapi Aku ampus kaꞌ naun ngalumpatatnnaꞌ ia dari tidurnya.” 12 Lalu kata murit-murit-Nya: “Tuhan kadeꞌ ia tidur, ia samuhaꞌ.” 13 Tapi nang Yesus maksut tidur koa kamatiatn Lasarus, ia kaꞌ koa nyangka Yesus bakata tidur koa ratinya biasa. 14 Jaji Yesus bakata tarus tarang kaꞌ ia kaꞌ koa: “Lasarus dah mati, 15 tapi untuꞌ kapantingan kitaꞌ, Aku basukur inaꞌ ada kaꞌ waꞌtu koa, barang labih edoꞌ biar kitaꞌ baya pucayaꞌ. Injeꞌlah diriꞌ ampus ampeatn kaꞌ naun.” 16 Lalu Tomas nang ugaꞌ dinalah Didimus, bakata kaꞌ ayukng-ayukngnya, murit-murit nang lain: “Injeꞌ diriꞌ ampus ugaꞌ untuꞌ mati man Ia!”17 Takaꞌ Yesus namus kaꞌ kampokng Betania, Lasarus dah ampat ari kaꞌ dalapm subur. 18 Kampokng Betania koa samak man Yerusalem, kira-kira talu kilometer jauhnya. 19 Rami urakng Yahudi dah atakng naboꞌ Marta man Maria untuꞌ ngibur ia kaꞌ koa gara-gara kamatiatn sodaranya koa. 20 Takaꞌ Marta nangngar Yesus atakng, ia kaluar untuꞌ nyambut Yesus, tapi Maria badiapm kaꞌ rumah. 21 Lalu kata Marta: “Tuhan, sakiraꞌnya Kitaꞌ ada kaꞌ dian sodaraku koa pasti inaꞌ mati. 22 Tapi ampeatn aku pun nauꞌan kadeꞌ Allah mareꞌaꞌ kaꞌ Kitaꞌ ahe jaꞌ nang Kitaꞌ mintaꞌ kaꞌ Ia.” 23 Kata Yesus kaꞌ Marta: “Sodaranyu mulakngngaꞌ idup agiꞌ.” 24 Sahut Marta: “Aku nauꞌan kadeꞌ ia mulakngngaꞌ idup agiꞌ waꞌtu urakng-urakng mati mulakng idup kaꞌ ari pangabisatn dunia.” 25 Kata Yesus kaꞌ Marta: “Akulah nang mareꞌ idup man manjawat urakng mati mulakng idup. Urakng nang pucayaꞌ kaꞌ Aku idupaꞌ agiꞌ, biarpun ia dah mati. 26 Man urakng nang idup nang pucayaꞌ kaꞌ Aku pasti inaꞌ matiaꞌ salama-lamanya. Pucayaꞌ keꞌ kao kaꞌ hal nian?” 27 Sahut Marta: “Tuhan, aku pucayaꞌ kadeꞌ Kitaꞌ Anak Allah, Raja Panyalamat nang atakngaꞌ kaꞌ dunia nian.” 28 Dah lakaꞌ bakata lekoa ia ampus nyaruꞌ sodaranya Maria man babisik kaꞌ ia: “Paꞌ Guru ada kaꞌ dian, Ia nyaruꞌ kao.” 29 Nangngar hal koa, Maria ganceh lumpat lalu ampus namuiꞌ Yesus. 30 Tapi waꞌtu koa, Yesus napeꞌ sampe kaꞌ kampokng. Ia masih kaꞌ tampat Marta namuiꞌ-Nya. 31 Takaꞌ urakng-urakng Yahudi nang sama-sama man Maria kaꞌ rumah koa untuꞌ ngiburnya, neleꞌ kadeꞌ Maria ganceh-ganceh lumpat man kaluar; jaji ia kaꞌ koa ampus nunaꞌannya, barang ia kaꞌ koa nyangka kadeꞌ Maria ampus kaꞌ subur Lasarus untuꞌ ngeakiaꞌnya. 32 Waꞌtu Maria sampe kaꞌ tampat Yesus man neleꞌ-Nya, balututlah Maria kaꞌ depan paha-Nya man bakata: “Tuhan sakiraꞌnya Kitaꞌ ada kaꞌ dian, pasti adiꞌ ku koa inaꞌ mati.”
33 Takaꞌ Yesus neleꞌ Maria nangngis, man urakng-urakng Yahudi nang atakng barage man ia ikut nangngis ugaꞌ, Yesus pun sidi miah kasal ati-Nya. 34 Ia batanyaꞌ kaꞌ Maria man Marta: “Kaꞌ mae kitaꞌ nyuburnya?” Sahut nya kaꞌ koa: “Tuhan injeꞌ tunaꞌanlah, man teleꞌlah babaro!” 35 Yesus pun ngeak. 36 Kata urakng-urakng Yahudi: “Teleꞌlah, Ia sidi kasih kaꞌ Lasarus!” 37 Tapi kaꞌ antaranya kaꞌ koa ada nang bakata: “Ia manjawat urakng butaꞌ jaji neleꞌ, ngahe Ia inaꞌ bisa mantoꞌ man ngalamputn sengat Lasarus biar ia inaꞌ mati?” 38 Yesus sakali agiꞌ sidi miah kasal atinya, lalu Ia ampus kaꞌ subur koa. Subur koa sabuah goa nang dinutup man batu. 39 Kata Yesus kaꞌ ia kaꞌ koa: “Geser batu koa!” Marta, sodara urakng nang dah mati koa, bakata kaꞌ Yesus: “Tuhan, ia dah babau, barang dah ampat ari ia dinyubur!” 40 Sahut Yesus: “Keꞌ dah Ku-ngataatn kaꞌ kao, kadeꞌ kao pucayaꞌ kao neleꞌaꞌ koasa Allah nang luar biasa!” 41 Ia kaꞌ koa pun ngeser batu koa. Lalu Yesus ningkadah kaꞌ atas man bakata: “Apaꞌ, Aku basukur batarimaꞌkasih kaꞌ Kitaꞌ barang Kitaꞌ dah nangngaratn Aku. 42 Aku nauꞌan, kadeꞌ Kitaꞌ gia nangngaratn Aku, tapi gara-gara urakng rami nang badiri kaꞌ dian ngulilikngiꞌ Aku, jaji Aku ngataatnnya nian, biar ia kaꞌ koa pucayaꞌ, kadeꞌ Kitaꞌlah nang dah ngiripm Aku.” 43 Lakaꞌ bakata lekoa, Yesus ngampak nang nyarikng: “Lasarus, kaluarlah!” 44 Urakng nang dah mati koa kaluar, paha man kokotnya masih babungkus man kaen putih man muhanya tatutup man kaen panutup muha. Kata Yesus kaꞌ urakng-urakng kaꞌ koa: “Bukaꞌlah kaen kapannya koa biar ia baya bajalatn.”
Rancana munuhaꞌ Yesus
11:45-57
(Mat. 26:1-5; Mrk. 14:1-2; Luk. 22:1-2)
45 Manyak kaꞌ antara urakng-urakng Yahudi nang atakng naboꞌ Maria man nang neleꞌ babaro ahe nang dah di Yesus manjawat, jaji pucayaꞌ kaꞌ Ia. 46 Tapi ada kaꞌ antara urakng-urakng Yahudi nang ampus kaꞌ urakng-urakng Parisi man ngesahatn kaꞌ ia kaꞌ koa ahe nang dah di Yesus manjawat. 47 Lalu imam-imam kapalaꞌ man urakng-urakng Parisi nyaruꞌ Dewan Agama Yahudi untuꞌ bakomoꞌ man Ia kaꞌ koa bakata: “Ahe nang arus diriꞌ panjawat? Jukut Urakng koa manjawat manyak hal-hal ajaip! 48 Kadeꞌ diriꞌ biaratn Ia, samua urakng pucayaꞌaꞌ kaꞌ Ia. Man urakng-urakng Roma atakngngaꞌ man ngancuratn tampat suci diriꞌ man bangsa diriꞌ.” 49 Tapi saurakng kaꞌ antara nya kaꞌ koa nang badama Kayapas, Imam Agung kaꞌ tahutn koa, bakata kaꞌ ia kaꞌ koa: “Kitaꞌ inaꞌ nauꞌan ahe-ahe, 50 coba pikir, kadeꞌ samua bangsa Yahudi binasa, labih edoꞌ saurakng nang mati demi bangsa diriꞌ.” 51 Sabatolnya Kayapas ngomongkatn koa, bukeꞌ dari pikirannya babaro. Tapi gara-gara ia Imam Agung kaꞌ tahutn koa, ia madahiꞌ doloꞌ kadeꞌ Yesus matiaꞌ untuꞌ bangsa Yahudi. 52 Man bukeꞌ untuꞌ bangsa Yahudi ihan, tapi ugaꞌ untuꞌ ngomoꞌan man nyoteꞌatn anak-anak Allah nang badiapm kaꞌ kea kaꞌ naun. 53 Mulaiꞌ ari koa pamimpin-pamimpin Yahudi bapakat untuꞌ munuh Yesus.
54 Jaji Yesus inaꞌ agiꞌ tarang-tarangan kaꞌ urakng rami man kaꞌ antara urakng-urakng Yahudi. Ia ningalatn Yudea, lalu ampus kaꞌ kota nang badama Epraim samak abut nang bapaser luas man babatu-batu. Kaꞌ diꞌkoa Ia badiapm man murit-murit-Nya.
55 Kaꞌ waꞌtu koa dah samak ari raya Paska Yahudi. Rami urakng dari desa-desa dah ampus kaꞌ Yerusalem untuꞌ nyalantatn upacara adat panyuciatn sanapeꞌ ari raya koa. 56 Ia kaꞌ koa ngagoꞌiꞌ Yesus, man waꞌtu bakomoꞌ kaꞌ alaman Rumah Allah, ia kaꞌ koa bakata sekoꞌ man nang lain: “Lemae pandapatnyu? Atakngaꞌ keꞌ wah Ia kaꞌ ari raya nian?” 57 Samintara koa imam-imam kapalaꞌ man urakng-urakng Parisi dah ngaluaratn parentah kadeꞌ ada nang nauꞌan Yesus kaꞌ mae, arus dipadahatn biar baya ditangkap.