पिलतुसा जेह यीशु
( मती 27 :1 , 2 , 11 -14 ;मरकुस 14 :55 -64 ;यूहन्ना 18 :28 -38 )
23
1 तेवा सारीी सभा उठी करे पिलतुस सेटा वै निउ । 2 होर त्याहा एडा बोली करे तेउ पेंदे दोषा लाऊ ; “हामे यह लोका वेहकाउदअ हेरू कैसरा वै कर नाईं दिणा होर आपणे आपा वै मसीहा रअ राजा बोल्दअ शुन्णु ।” 3 पिलातुसे तेउ का पुछु , “कैहे तुह यहूदी रअ राजा साहा ?”तेउ उतर दिना, “तुह आपे ही बोला ।” 4 तेवा पिलातुसे प्रधाना याजक होर लोका वै बोलू , “हांऊं एउ मणशा में किछे दोष नाईं पाऊंदअ ।” 5 पर त्याह होर दृढ़ता संघे बोलदे लागे , “यह गलीला अखे तणी , सारीे यहूदी में उपदेश देई करे लोका भडकाउंदा ।” 6 एडा शुणी करे पिलातुसे पुछु , “कैह यह मणश गलीली साहा ?” 7 होर एडा जाणी करे कि सह हेरोदेसा रे राज्य रे साहा , सह हेरोदेस सेटा भेजू , किवेकी त्याह धिहाडी सह भी येरूशलेम में तिही , ।हेरोदेसा जेह यीशु
8 हेरोदेस यीशु हेरी करे बखे खुश होऊ , किवेकी सह बहु धियाड़े ओरी तेउ हेरणा चांहदा तिही , किबेकि तेउ रे बारे में शुन्णु दा तिही , होर तेउ का एखा चिन्हा हेरणे री आशा चांहदा तिही । 9 सह तेउ का बहू गल्ला पुछदअ रहू , पर तेउ कीछे उतारे नाईं दिना । 10 प्रधान याजक होर शाश्त्री तेउ पेंदे दोषा लाऊदे लागे । 11 तेवा हेरोदेस आपणे सिपाई संघे तेउ रे ठठे करदे लागे होर तेउकी सह भी पिलतुस जेह भेजू 12 तेसा धियाड़ी पिलतुस होर हेरोदेस आपु में दोस्त बणी ; , एता पहिले त्याह हआपु में दुश्मण तिही , ।
पिलतुसे दिनी यीशु वै मृत्यु दण्ड
( मती 27 :15 -26 ;मरकुस 15 :6 -15 ;युहन्ना 18 :39 -19 :16 )
13 पिलतुस प्रधान याजक होर सरदार होर लोका शादी करे त्याह का बोलू 14 “तमे एउ मणश लोका भडकाऊण आल़ ठहराइ करे , मांह सेटा वै आणू , होर हेरा मांई तमा सेटा एउ री जाँच करी , जासू गल्ला रा तमे एउ पेंदे दोष लाऊंदा त्याह गल्ला में मांई कीछे दोष नांईं पाऊ । 15 नांह हेरोदेसे , किवेकी तेउये यह हामा सेटा वै भजूदअ साहा होर हेरा , एडा किछेए नांईं होऊ कि एउ वै मृत्यु दण्ड दे । 16 तेवा हांऊं एउ चिकि करे छाडा ।” 17 पिलातुस पर्वा री धियाड़ी त्याह वै एकी कैदी छाड़ने वै मजबूर तिही । 18 तेवा त्याहे सभी मीली करे बोलू , एउ नांईं छाडे एउ री जागहा बरअब्ब छाड़ । 19 सह कासु झगड़े रे कारण जोह नगरा में होऊदा तिही , होर हत्या रे कारण जेले पाउदअ तिही , । 20 पर पिलातुसे यीशु छाड़ने री तणी लोका भी भिया का समझाई । 21 पर त्याह जोरे -जोरे बोलू एउ क्रुसा पेंदे चड़ा एउ क्रुसा पेंदे चड़ा । 22 तेउ चिऊणी बारी त्याह का बोलू ," किवै तेउ कैहे बुराई करीदी साहा ? मांई तेउ में मरने री तणी कीछे गल्ला नांईं पाई ।तेवा हांऊं तेउ चिकि करे छाडदा । 23 पर त्याह जोरे- जोरे बोली करे तेउ पीछे पड़ी की तेउ क्रुसा पेंदे चड़ा होर त्याहा रा चिलाऊण बडू । 24 तेवा पिलतुसे आज्ञा दिनी कि जेहडा या चाहंदा तेडा ही होऊ लोढ़ी । 25 तेउये सह मणश ज़ोह बलवे होर हत्या री बजहा का जेले पाउदअ तिही , होर जासू त्याह मांगा तिही , सह छाडी दिनअ; होर यीशु त्याह री इच्छा पेंदे छाड़ी दिनअ ।
यीशु रा क्रुसा पेंदे चड़ाउणा
( मती 27 :32 -44 ;मरकुस 15 :21 -32 ;युहन्ना 19 :17 -27 )
26 जेबा त्याह यीशु नींदे लागेदे तिही , तेवा त्याह शमोन ना रअ एकी कुरेनी वै ज़ोह ग्रा का ईंदअ लागदअ तिही , त्याहे तेउ वै क्रुस चुआकणे वै दिनअ की सह यीशु रे पीछ - पीछ हांडे । 27 लोका री बड़ेी भीड़ तेउ पीछे हांडदी लागी , होर त्याह में बहू वेटढी ज़ोह तेउ संघे होर छाती टोकदी होर लेरदी लागीदी तिही , 28 यीशुये त्याह फेरे वै फिरी करे बोलू , हे येरूशलेम री वैटियों मेरी तणी नांई लेरे आंधी ; पर आपणी होर आपणे बालका री तणी लेरा । 29 किवेकी त्याह धिहाडी इछणी , जासू में लोका बोलणा , “धन्य साहा सह बांझ होर सह गर्भ ज़ोह नाईं जन्मी होर त्याह रे स्तन जासू दूध नाईं पिलाऊ ।” 30 तेउ टाईमें त्याह पहाडा का बोलणा कि हामा पेंदे पड़े होर टीला का हामा ढोप । 31 किबेकि जेब्रे हरे बूटे संघे एडा करे तेवा कैह शुके संघे किछे नांईं करणा ?” 32 त्या होर दुई मणश भी ज़ोह कुकर्मी तिही , त्याह संघे नि । 33 ज़ेबा त्याह तेसा जागाह पूजे जासू वै खोपड़ी बोलदा पूजे, तेवा त्याह तेउ त्खे होरा त्याह कुकर्मी भी एक दांए होर दूजअ बांए क्रुसा पेंदे चड़ाइ । 34 तेवा यीशु बोलू , “हे पिता याह क्षमा कर , कीबेकी या नाईं जानदे कि या कैह करणा लाऊदा साहा ।”होर त्याहे चिट्ठी पाई करे तेउ रे झिकड़े बांढी । 35 लोका खड़े- खड़े हेरदे लागेदे , होर सरदार भी ठठा करी करे बोलदे लागे , एउये दूजे बचाई , अगर यह दईबा रअ शोहरु मसीह साहा होर तेउ रअ चुनु दअ साहा , तेवा आपणे आपा वै बचे " 36 सिपाई भी नेड इछी करे होर सिरका देई करे तेउ रा ठठे करी करे बोला तिही । 37 “अगर तुहे यहूदी रअ राजा साहा तेवा आपण आप वै बचा !” 38 होर तेउ पेंदे एक दोष पत्र भीं लाऊ , यह यहूदी रअ राजा साहा ।”
मन फिराऊणा आल़े कुकर्मी
39 ज़ोह कुकर्मी त्खे लटकाई दे तिही , त्याह में एकी तेउ री निन्दा करी करे बोलू , “कैहे तुह मसीहा नाईं ?तेवा आपणे आपु होर हामा बचा । 40 एता पेंदे तेउ दूजे बोलू , “कैह तुह दईबा का नाईं डरदअ ?तुह भी तंदे दंडा पाऊदअ लागदअ साहा , 41 होर हमे तो न्याय रे साभे दंडा पाउदे लागेदे , किबेकि हामे आपण कामा रे साभे फल्ल पाऊंदे लागेदे ; पर एउ किछे एडा अनुचित काम नाईं करू ।” 42 तेवा तेउ बोलू , “हे यीशु ज़ेबा तुहे आपणे राज्य में इछे तेवा मेरी सुधी ले ।” 43 तेउये त्याह का बोलू , “हांऊं तमा का सची बोल्दा कि आज तुह मांई संघे स्बर्गे हुणे ।
यीशु रा मरणा
(मती 27 :45 -46 ;मरकुस 16 :1 -8 ;युहन्ना 20 :1 -10 )
44 होर लगभग दोपहरा का चिउणे दोपहरे तणी सारीे देशे निहारा होऊ , 45 होर धिहाडे रा प्रियाषा नांहदा रहू , होर देऊरे रा परदा बीचा का फुटअ । 46 होर यीशु जोरे बोलू , “ हे पिता हांऊं आपणी आत्मा तेरे हाथे दिंदा ।” होर एता बोली करे आपणे प्राण त्यागी । 47 सूवैदारे ज़ोह होऊ , हेरी करे दईबा री बड़ेाइ करी करे बोलू , “जरुर यह मणश धर्मी तिही , ।” 48 होर ज़ोह भीड़ हेरणे वै कठी होई , एता हेरी करे लेरदे- लेरदे बापिस नाठी । 49 पर तउरे सारीे जाणण आल़े , होर ज़ोह वेटढी गलीला का तेउ संघे आई तिही , दूरे खड़ी होई करे हेरदी लागीदी तिही , ।
यीशु दवाऊणा
( मती 27 :57 -61 ;मरकुस 15 :42 -47 ;युहन्ना 19 :38 -42 )
50 होर त्खे युसफ ना रअ महासभा रअ एक सदस्य तिही , ज़ोह धर्मी होर सज्जन मणश तिही । 51 होर तेउ री एसा योजन होर एउ काम का खुश नाईं तिही ; । होर सह यहूदी रे नगरा अरिमतियह रअ रहणे आल्ल़अ होर दईबा रे राज्य री प्रतीक्षा करा तिही । 52 तेउ पिलातुसा जेह नाशी करे यीशु रअ शव मांगू ; 53 होर तेउ काडी करे मलमला री चादरी में पल़ेटू , होर एकी कबरा में डाहु , ज़ोह पत्थरे में बणाइदी , ;होर तेता में कोहे नाईं डाहुदअ , । 54 सह तैयारी रअ धियाड , होर स्ब्ता रे धिहाडी शुरू होई , । 55 त्याह वेटढी ज़ोह गलीला का आई तिही , पीछ-पीछ नाशी करे कब्रा हेरी होर यह भी कि तेउ रअ कैडे सावे डाहुदअ साहा । 56 तेवा त्याह इच्ही करे बडिया बासी आल़ी चिजा होर इत्रे तैयार करू ;होर स्ब्ता री धियाड़ी त्याह आज्ञा रे सावै आराम करू ।