लूका 22

यीशु रे खिलाफ षड्यंत्र

( मती 26 :1 -5; मरकुस 14 :1 , 2 ;यूहन्ना 11 :45 -53 )

1 अखमीरी रोटी रा पर्व जासु वै फसह बोला , नेड तिही । 2 होर प्रधान , होर याजक होर गला लोडदे लागेदे तिही , कि यह कैई सावै मारे , पर त्याह लोका का डरा तिही ।

यहूदा रा विश्वासघात

( मती 26 :14 -16 ;मरकुस 14 :10 , 11 )

3 जब शतन यहूदा में नथअ जासु वै इस्क्ररीयोती बोला , होर सह बारह हू चेले में एक , । 4 तेउ प्रधान याजका होर सारीे दरे संघे गला करी की यह कई सवै ढकणअ । 5 त्याह खुश होई होर बोलू तेवा हे म एताक ढवै दीण। 6 तेउ मानु , होर मोक लोडअ लागअ की जेबरे एऊ संघे लोका नांई होले तेवरे मांह यह ढाकी करे त्या रे हाथे दीणअ।

चेले संघे फसह रा अन्तिम भोज

( मती 26 :17 -25 ;मरकुस 14 :12 -21 ;युहन्ना 13 :21 -30 )

7 तेवा अखमीरी रोटी रे पर्वा रा धियाडा आउया , जासू में फसहे रे गाभु री बली दिणी जरूरी साहा । 8 होर यीशुये पतरस होर यूहन्ना यह बोली करे भेजी : “नाशी करे मेरे खाने वै फसह तैयार करा ।” 9 त्याये तेउ का पुछु , “तुह कैह चाहंदा कि हामे कैह तैयार करे ?” 10 तेउये तया का बोलू , “हेरा नगरे नाहंदे ही तमा एक मणश भेटण जासू पांणी रअ घडअ चुआकूदअ हुण ;जासू घरे सह नाहल तमे तेउ पीछ नाशे , 11 होर तेउ घरा रे स्वामी का बोले कि : गुरु ताहा का बोला कि सह घर कही साहा जासू में हांऊं आपणे चेले संघा फसह खाऊ ? 12 तेउ तमा वै एक सजी धजी दी बड़ेी अटारी रीहाऊणी ;तखी तैयारी करे । 13 त्याहे नशी करे , जेहडा त्याह का बोलू , तेहडा ही भेटा होर फसह तैयार करी ।

दईबा रा भोज

( मती 26 :26 -30 ;मरकुस 14 :22 -26 ;1 कुरन्थियों 11 :23 -25 )

14 ज़ेबा टाइमे आउआ , तेवा सह आपण प्रेरित संघे रोटी खान्दअ बैठअ । 15 होर तेउ त्याह का बोलू , “माह बखे इच्छा तिही ,कि दुखा उठाउणे का पहिले तमा संघे फसहे खांऊ । 16 किवेकी हांऊं तमा का बोला कि ज़ेबरे तणी सह दईबा रे राज्य में पूरे नाईं होले तेवरे तणी सह मांह सह नाईं खाणा ।” 17 तेवा तेउये कटोर लई करे धन्यावाद करू , “एता निआ होर आपु में बांडा । 18 किबेकि हांऊं तमा वै बोला की जेबरे तक दईबा रा राज नांई ईला तेवरे तक मांह दाखरस कधी नांई झुटण। 19 तेउकी तेउऐ रोटी आणी , होर धन्यवाद संघे चोडी , होर त्या वै एता बोली करे दिनी की यह मेरी देह साहा ज़ोह थारी तणी चोडी। 20 एई सावै तेउ रोटी बाद कटोर भी आणु होर बोलू यह कटोर मेरे तेउ लोहू में साहा ज़ोह तमे वै नई वाचा में दीणादा साहा । 21 पर हेरा , मांह ढाकणे आल़े रे हाथ माए संघे साहा । 22 किबेकि मणश रे शोहरु वै जेड़ा तेउ संघे हुणा , सह तो हुणा , पर हाय तेउ मणशा पेंदे जासके हाथे सह ढाकणे । 23 तेवा चेले आपु में बोलदे लागे कि , हांमा में का सह कुणअ साहा जासू यह काम करणा ।

महान कुण ? एता पेंदे बिचार

24 त्याहा में याह गल्ला भी होई की त्याह हामा बडअ कासु समझे । 25 तेउ त्याह का बोलू , “अन्यजाति रे राजा त्याह पेंदे राज करे ;होर ज़ोह त्याह पेंदे अधिकार डाहदा , त्या उपकारक कहलाऊंदा । 26 पर तमे एडे नाईं होए ;पर ज़ोह तमा का बडअ साहा , सह होच्छे बराबर होर ज़ोह प्रधान साहा , सह सेवका बराबर साहा । 27 किबेकि बडअ कुण साहा सह ज़ोह रोटी खांदअ बैठदअ , या सह ज़ोह सेवा करदा ?कैह सह नांईं ज़ोह रोटी खांदअ साहा ?पर हांऊं तमा मेंजे सेवका साही साहा । 28 “ पर तमे त्या साहा , ज़ोह मेरी परीक्षा में मांई संघे लगातार रही ; 29 होर जेहडा मेरे बापू मांह वै एक राज्य डाहुदा साहा , तेडा हांऊं तमा वै भी एक राज्य डाहुदा साहा । 30 पर तमे मेरे राज्य में मांई संघे मेरी मेजा पेंदे खाये पर सिहासना पेंदे वैशी करे इस्राएल रे बारह गोत्रा रा न्याय करे ।

पतरस रे नाईं करणे री भविष्यवाणी

( मती 26 :31 -35 ;मरकुस 14 :27 -31 ;युहन्ना 13 :36 -38 )

31 "शमोन, हे शमोन ! हे रे , शैताने तमे मांह का मांगीदे साहा कि तमा सह गिहू साही पटके , 32 पर मांई ताह वै विनती करी कि तेरा बुशाह नाठा नाईं लोढ़ी ;होर ज़ेबरे तुहे फिरे तेवरे आपणे भाई पेंदे सिथर रहे " 33 तेउये तेउ का बोलू "हे दईबा हांऊं तांई संघे जेले नाहणे होर मरणे वै भी तैयार साहा ।” 34 तेउ बोलू , “हे पतरस हांऊं ताह का बोला कि आज मुर्गे बाष्णे का पहिले ताह चिण बारी नाईं करणा कि तुह मांहे नाईं जांणद ।

बटु झोली होर तलवार

35 तेउकी तेउये त्याहा का बोलू , “जेब्रे माई तमे विना झोली , बूट होर विना बटुये भेजी तिही , तेवरे तमे कीजी सा री कामी होई तिही , ?”त्याहे बोलू , "किजि सा री नाईं " 36 तेउये त्याह का बोलू , “पर एवा जासू सेटा बटु साहा त्याह तेउ निआ तेडे ही झोली भी , होर जासू सेटा तलवार नाईं साहा त्या आपणे झिकड़े बेची करे लई आणा । 37 किवेकी हांऊं तमा का बोला कि यह ज़ोह लिखूदा साहा : सह अपराधी संघे गिणू दा साहा , किबेकि तेतका पूर हुणा जरुरी साहा ;किबेकि मेरे बारे में लिखीदी गला पूरी हुणे आल़ी साहा ।” 38 त्याहे बोलू , “हे दईबा अखे हेरा अखे दुई तलबारा साहा ।”तेउये त्याह का बोलू , बखे बहू साहा ।”

जैतुन रे पहाड़ा पेंदे यीशु री प्रार्थना

( मती 26 :36 -46 मरकुस 14 :32 -42 )

39 तेवा सह वागे निख्ली करे आपणी रीती रे साबे जैतुना रे पहाडा पेंदे नाठअ , होर चेले तेउ पीछ नाठे । 40 त्खे पूजी करे तेउ त्याह का बोलू , “प्रार्थना करा की तमे परीक्षा में नांईं पड़े ।” 41 होर सह त्याहा का दूरे नाशी करे घुटने पे वैशी करे प्रार्थना करदअ लागअ , 42 “हे पिता , अगर तुह चाहे तो एउ कटोर मांह सेटा का दूर कर , तेवा भी मेरी इच्छा नांईं तेरी इच्छा पूरी हो ।” 43 तेवा तेउ सरगा का एक दूत हेरू ज़ोह तेउ वै सामर्थ्य दिंदा तिही , । 44 सह बखे संकट मेंज़ा का होई करे प्रार्थना करदअ लागअ होर तेउ रे पसीने माना जेहडा लोहू साही बड़ेे - बड़ेे टीपू साही धरती पेंदे पड़दे लागे , । 45 तेवा सह प्रार्थना का उठू होर तेउ आपणे चेले सुते दे पाई । 46 होर तेउ बोलू , “किवै सुता ?उठा प्रार्थना करा कि तमे परीक्षा में नांईं पड़ी लोढ़ी ।

यीशु धोख संघे ढाकण

( मती 26 :47 -46 ;मरकुस 14 :43 -50 ;युहन्ना 18 :3 -12 )

47 सह एता बोलदअ ही लागअ , कि एक भीड़ आई , होर त्याहा बारहा में का जासका ना यहूदा तिही , त्याह जेह - जेह आउअ तिही , सह यीशु सेटा आउअ होर सह चुमू । 48 यीशु तेउ वै बोलू , “ यहूदा कैह तुह चूमी करे मणश रे शोहरु ढाके ?” 49 तेउरे साथी ज़ेबरे हेरू कि कैह हुणे आल्लअ साहा , तेवा बोलू , “ दईबा कैह हामें तलवार चलाये ?” 50 होर त्याहा मेंजा एकी महायाजका रे दासा पेंदे तलवार चलाई करे तेउ रअ दाहिनअ कनेट काटू । 51 एता पेंदे यीशु बोलू , “एवा बस कर ।”होर तेउ रअ कनेट छुई करे ठीक करू । 52 तेवा यीशु प्रधान याजक होर देऊरे रे पेहरे रे सरदार होर त्खले रहणे आल़े ज़ोह त्खे आयेदे तीही बोलू , ”कैहे तमे मांह डाकू जानवर समझी करे तलवार होर लाठी आणी करे आऊदे ? 53 जेबा हांऊं देहुरे में रोज तमे संघे तिही ।तेवा तमे मांहे वै किछे नांईं करू ; पर यह थारे टाइम साहा होर निहारे रा अधिकार साहा ।”

पतरसा रा नांईं करणा

( मती 26 :57 , 58 , 69 -75 ;मरकुस 14 :53 , 54 , 66 -72 ;युहन्ना 18: 12-18 , 25 -27 )

54 तेवा तेउ ढाकी करे चली , होर महायाजक रे घरे निउ । पतरस दूर- दूर तेउ पीछे नाठअ , 55 होर ज़ेबा त्याह आँगने आगि छिपते बैठे तेवा पतरसे भी त्याहा बीचे बैठअ । 56 तेवा एकसा दासी आगि रे प्रियाशे बैठदअ हेरी करे तेउ फेरा वै हेरी करे बोलू , “यह भी तेउ संघे तिही ।” 57 पर तेउये एडा बोली करे नाईं करू , “हे नारी , हांऊं तेउ नाईं जांणदअ ।” 58 थोड़ी देरी बाद कासु होरी तेउ हेरी करे बोलू , “तुहे भी त्याह मंजा का एक साहा ।”पतरसे बोलू , “हे मणशा हांऊं नांईं साहा ।” 59 एकी घंटे वाद एकी होरी मणशे बोलू , “जरुर तुह त्याहे संघे तिही किवेकी तुह गलीली साहा ।” 60 पतरसे बोलू , हे मणशा हांऊं नाईं जान्दअ कि तुहे कैह बोल्दा सह बोलदअ ही लागअ , कि मुर्गे बाठअ । 61 तेवा दईबे तेउ पतरसा फेरा वै हेरू होर पतरसा दईबा री सह गलअ याद आई ज़ोह तेउ बोली तिही "आज मुर्गे बाष्णे का पहिले ताह मेरा चिण बारी नाईं करणा ।” 62 होर सह बागे निख्ली करे जोरे- जोरे लेरु ।

यीशु री वैइजती

( मती 26 :67 , 68 ;मरकुस 14 :65 )

63 जुणी मणशे यीशु ढाकुदअ तिही त्याह तेउ ठठे करदे लागे ; 64 होर तेउरी आंछी बंद करी करे तेउ का पुछु , “भविष्यवाणी करी करे खोजू ताह कुणी बाही ।” 65 होर त्याह बहू होर एडी निन्दा करी होर तेउरे बिरोधा में बोली ।

महासभा ज़ेह यीशु

( मती 26 :56 -66 मरकुस 14 :55 -64 ;युहन्ना 18 :19 -24 )

66 ज़ेबा धियाड होई तेवा लोका रे पुरनियो होर प्रधान याजक होर शाश्त्री कठे होई , होर तेउ आपणी महासभा में आणी करे पुछु , 67 “अगर तुह मसीहा साहा , तेवा हामा का बोला !”तेउ त्याहा का बोलू "अगर हांऊं तमा का बोलू , तमे मेरी गल्ला रा बुशहे नाईं करणा । 68 होर अगर पुछु ,तेवा उतर नांईं दिणा । 69 पर एवरे पोरी मणशा रअ शोहरु सभी का शक्तिशली दईबा री धुरा फेरे वैशण ।” 70 एता पेंदे सभी बोलू , “तेवा कैह तुहे दईबा रअ शोहरु साहा ?”तेउये त्याह का बोलू , “ तमे आपे ही बोला , किबेकि हांऊं साहा ।” 71 तेवा त्याहे बोलू , “एवा हांमा गुआही री कैह जरूरत साहा , किबेकि हांमें आपणे मुहा का आपे ही शुणू ।”