यीशु रा पुनरुत्थान
( मती 28 :1 -10 ;मरकुस 16 :1 -8 ;युहन्ना 20 :1 -10 )
24
1 पर हपते री पहिली धिहाडी दोती त्याह त्या बासी आल़ी चिजा ज़ोह त्याहे तैयार करीदी तिही , आणी करे कब्रा वै आई । 2 त्याहे कब्रा का पाथर सकेऊद हेरू , 3 पर मितारे दईबा यीशु रअ शफ़ नाईं भेटअ । 4 जेबा त्याह एसा गला का हैरान हुन्दी लागी तिही , तेवा दुई मर्द झलकते झिकड़े बानी करे खड़ होई । 5 ज़ेबा त्याह डरी होर धरती फेरा वै झुकी करे रही ;तेवा त्याहे त्याह का बोलु , “ तमे जिउंदे मणशा में मुयेदे किबे लोडा ? 6 सह अखे नाईं , पर जिउंद होऊ । याद करा तेउ गला में तमा का कैह बोलू , 7 जरूरी साहा कि मणश रअ शोहरू पापियों रे हाथे ढाकण , होर क्रुसा पेंदे चडाउण , होर चिहुणे धिहाडे जिउंण । 8 तेवा तेउरी गला याद आई । 9 होर क्रब्रा का इछी करे त्याहे त्या ग्यारहा वै , होर होरी सभी वै , या गल्ला खोजी । 10 जासूये प्रेरिता वै याह गला खोजी त्या मरियम मगदलीनी होर योअन्ना होर याकूब री आम्मा मरियम होर तेसा संघे होरा वेटढी भी तिही । 11 पर त्या री गला त्याह एकी कहानी जेडी लागी , होर त्याह त्या री गला रा बुशाह नाईं होऊ । 12 तेवा पतरस उठी करे कब्रा वै ठुरु , होर झुकी करे सीधी झिकड़े पड़ीदे हेरी , होर ज़ोह होऊ तिही , तेता हैरानी होई होर आपण घरे वै नाठअ ।इम्माऊस री वाता चेले संघे
( मरकुस 16 :12 , 13 )
13 तेसी धियाड़ी दुई मंश इम्माउसा ना रे एकी ग्रां वै नांहदे लगेदे तिही , ज़ोह यरुशलेमा का सात मील दूरे तिही । 14 होर त्याह या सभी गला पेंदे ज़ोह होऊ तिही , आपु में गला करदे नाह्दे लागेदे तिही । 15 होर ज़ेबा त्याह आपु में गला करदे होर पूछदे लागेदे तिही , तेवा यीशु आपे सेटा इच्छी करे त्याहा संघे हाण्डदअ लाग । 16 पर त्याह री आछी एडी बंद करी कि त्याह पछेणी नाईं सका । 17 तेउये त्या का पुछु , “यह कैह गला साहा , ज़ोह तमे हाण्डदे- हाण्डदे आपु में करदे लागेदे ?त्याह चुप खड़ी । 18 एता शुणी करे किल्युपास ना रे एकी मणशे बोलू , “कैह तुह यरूशलेमा में अकेल परदेसी साहा , ज़ोह नाईं जांदअ कि याह धियाड़ी त्खे कैह- कैह होऊ दा साहा ।” 19 तेउ त्याह का पुछु , कुणा गला ? त्याहे तेउ का बोलू यीशु नासरी रे बारे में ज़ोह दईबा होर सभी लोका सेटा काम होर बचना में सामर्थी , भविष्यबकता तिही । 20 होर प्रधान याजक होर हमारे सरदारे सह ढाकु कि तेउ वै मृत्यु री आज्ञा दे । होर तेउकी सह क्रुसा पेंदे चड़ाऊ । 21 पर हामा आशा , कि एउ इस्राएल वै छुटकरा दिणा , याह सभी गला रे सिबाये आज चिउणा धियाडा साहा । 22 होर हामे मेंजा का कई वेटढी भी हामे हैरान करी ज़ोह दोती कब्रा वै नाठीदी तिही । 23 होर ज़ेबा तेउ रअ शव नाईं भेटअ तेवा एता बोल्दी आई कि हामें सरगा दूत हेरी , जासुये बोलू कि सह जिउंदअ साहा । 24 तेवा हमारे कईये साथी कब्रा वै नाठे , होर जेहडा त्याह वेटढी बोलू , तेडा पाऊ ;पर त्याहे सह नाईं हेरू । 25 तेवा तेउये त्या का बोलू , हे निर्बुधियो ; होर भविष्यवकतओ री सभी गल्ला पेंदे बुशाह करणे में मन्दमतियो ! 26 कैह जरूरी नाईं , कि मसीह एउ दुखा चुआकि करे आपणी महिमा में इछे ?” 27 तेवा तेउये मूसा का होर सभी भविष्यबक्ता का शुरू करी सारीे पवित्र शशत्र मेजा का आपणे बारे में लिखिदी गल्ला रअ अर्थ त्याह वै समझाऊ । 28 तेतारे में त्याह तेउ ग्रा सेटा पूजे जखा वै त्याह चालीदे , होर त्याह आगे नाहणा चाह्न्दा । 29 पर त्याहे सह एडा बोली करे रोकू , “हामे संघे रहे , किबेकि निहारा हुणे आल्ल साहा होर तेउकी सह त्याहे संघे मितरा वै नाठअ 30 ज़ेबा सह त्याह हे संघे रोटी खान्दअ बैठअ , तेउ रोटी ढाकी करे धन्यावाद करू , होर तेसा चोडी करे त्याह वै दिनी । 31 तेवा त्याह हेरी आछी खुली ;होर त्याहे सह पछेणू , होर तेउकी सह त्याह हेरी आछी में गोजु । 32 त्याये आपु में बोलू , “ज़ेबा सह वाता हामा का गल्ला करा तिही , होर पवित्र शस्त्रा रा अर्थ हामा वै समझाऊदा तिही , तेवा हामें आपणे मने किबे नाईं सोचु ?” 33 त्याह तेवारी उठी करे यरूशलेमा वै आये , होर त्याह त्या ग्यारहा होर त्याह रे संघी कठे भेटे । 34 त्या बोल्दा , “दईब सची जिउंदअ होऊ , होर शमोन भी हेरूदअ साहा ।” 35 तेवा त्याहे वाता री सारीी गल्ला खोजी होर यह भी कि त्याहे सह रोटी चोडदअ कैडे पछेणू ।
यीशु रे चेले वै हेरान
36 सह याह गला खोजदअ ही लागद , की सह आपे ही त्याह मंझे खडअ होऊ , होर त्याह वै बोलू तमा शान्ति भेटे ।” 37 पर त्याह डरी होर घवराई , होर समझू कि हामें कासु भूता हेरे लागदे साहा । 38 तेउये त्याह का बोलू , “किबे घबराऊंदा ? थारे मन शक किवै उठू ?
39 मेरे हाथा होर जाघा हेरा कि हांऊं सहे साहा माह छुई करे हेरा , किवेकि आत्मा री हडडी होर मांस नाईं हुंदा जेहडा मांह में हेरा ।” 40 एडा बोली करे तेउ आपणे हाथ जांघा रिहाई । 41 तेवा त्या बखे खुश होई करे , होर बखे हेरान होई , तेवा तेउ त्याह का पुछु , “कैह तमा जैह कुछ खाणे वै साहा ?” 42 त्याहे तेउ वै माछी रअ भुजू दअ एक पिस दिनअ । 43 तेउ नि करे त्याही जेह खाऊ । 44 तेउकी तेउये त्या का बोलू , “या मेरी त्याह गल्ला साहा ज़ोह मांई तमे संघे रहदे टाइमे खोजीदी तिही , कि जरूरी साहा कि जेतरी गल्ला मांई तमे संघे रहंदा करी , त्याह मूसा री व्यवस्था होर भविष्यवक्ता होर भजना री कितावा में मेरे बारे में लिखिदी साहा , 45 तेवा तेउ पवित्र शशत्रा जाणवे त्याह री समझ खोली , 46 होर त्याह वै बोलू , “यह लिखुद साहा मसीहा दुःख चुआकणा होर चीये धियाड़े मरी करे तेउ जिउंणा । 47 होर यरुशलेमा का लई करे भी जाति में मन फरेऊणे वै होर पापा री क्षमा री तणी प्रचार , तेउ रे ना का करणा 48 तमे या सभी गला रे गुआही साहा । 49 होर हेरा , जासकी प्रतिज्ञा मेरे बापू करीदी साहा , मांह सह तमा पेंदे उतारणी होर जेब्रे तणी स्बर्गा का सामर्थ नाईं पाऊले , तेवरे तणी तमे एउ नगरे ठहरी रहे ।"
यीशु रा स्वर्गारोहण
( मरकुस 16:19 , 20;प्रेरिता 1:9-11 )