Galatia i

Paulus ni surat ber soranyar na

Galatia

Ngribatin Luryain

Paulus narengi surat ye ber soranyar ma ralele Yesus na propinsi Galatia. Galatia ne ma lere ye rtar feti Turki. Tomwatar yadin ma rof Galatia ne to Yahudi sir. Ma sir to rsatngur ber Ratu nempa rsatngur ber dewayar. Paulus nti iano ma nafwibar Ibar Ngamone. Ma i nti iano fen lain tel e lo ma nafwibar Ibar Ngamone. Iane nwayat ma tomwatar ketnir ralele Yesus ma reluk soranyar na Galatia. Nempa tomwatar ketnir rma ma raftutu feti farlan tomwatar ralele Yesus e iane to dengan a fuky. Nempa ka rsunat sir ma rose rlarat tetetkar ma Ratu nal ber Musa nema Ratu nafdiat sir.

Paulus narengi ni surat ber soranyar na Galatia ye la ntulung tomwatar ma rmpan sale fali rlarat anftutw lepuskwar a ne, nema ka rbali sir ma rose rlarat anftutw botunar. Paulus nafdiat feti i ye Yesus ninr Ray Silai Ni mangsiduk fali Ratu ma nfil i ma tomwatar tate. I nfalak a nbal feti Ratu nsiduk i ber tomwatar ma nlengan e ber tomwatar ma to Yahudi sir (1; 2). Paulus nfalyole feti tomwatar bise ma rangamon a rbali ror Ratu farlan ralele I (3; 4). Na pasal famudyar na kitap ye (5; 6), Paulus naftutu feti soranyar a ne bise ma rakamis sir fali ralele Yesus ninr Ray Silai. Iane nwayat ma soranyar a ne nir adat nangamon ma bise ma rose kabain ngamonar.

Surat ye isiny

1:1-10 Paulus ni ngribatin luryain

1:11; 2:21 Paulus nafdiat feti i ye Yesus Ni mangsiduk

3:1; 4:31 Ibar Ngamone na Ratu nfatutu Ni dalamy ngamone

5:1; 6:10 Tomwatar ma ralele Yesus ka dedesar ma rose safe na nir momorip

6:11-18 Penutup.