Paulus nsurat soranyar ma ka rtate nir salar
13:1-10
1 Wangur,
yakw ktwi kukmat a kmi lain du lo.
Ma lere ye kose ma ktwi kukmat a kmi a nbal fen lain tel.
Na Kitap Lelerap dalam rarengi farye,
“Farlan tomwatar rfasale tomwatar sa,
ka tomwatar fen du nre tel ma reluk mangtungan ber i betno bise ma rtetak ni ngrie ne.”
2 Noak ma kukmat a kmi lain du a ne,
yakw kswurat tomwatar ma rose sale rof luryain a ne ma ka rtate desar nir salar.
Yakw kswurat farane ber tomwat walyetar a nbal.
Ma lere ye to kor a kmi nempa yakw kfwalak a nbal ma ka minremi feti keta kukun desar sir ma to rtate nir salar a ne.
Ma keta kukun desar sir noak ma kukmat a kmi fen lain tel.
3 Tomwatar ketnir nof a kmi a ne rmpeang ma kfwatutu feti safe ma kfwalak a ne iane nof ninr Ray Silai,
mpa la msyalan.
Noak ma I natanuk e,
keta to nmalas nempa keta nukun a kmi nor Ni kuase fali dedesar ma myose sale.
4 Botuan feti noak ma rsangwalu I,
tomwatar rsalan e tenany nmafun,
nempa lere ye Ratu Ni kuase ma nafmorip a nbali I.
Ma kam e,
dalmyamar lese mor ninr Ray Silai lo,
mpa kam matanuk e,
malas feleles farlan I.
Nempa noak ma makmat a kmi e,
keta mfatutu Ratu Ni kuase ma nal ber kam,
farlan ma nal ber ninr Ray Silai ne.
Ma iane fen mir ngamone.
5 Wangur,
ka mitenak na dalmir feti milele botuan ninr Ray Silai nre tate.
Farlan myose farane keta mifai botuan feti Yesus ninr Ray Silai ye dedesar ma nor a kmi.
Ma farlan I to nor a kmi e,
iane nfatutu feti safe ma milele ne to ubany sasaf.
6 Yakw kulele feti noak ma msyalan kam fen ngamone keta kmi mifai desar feti kam ye ma meluk Yesus ninr Ray Silai Ni mangsiduk botuan.
7 Kam msampayang ma mtak Ratu ma ntulung a kmi nema kete myose kabain yatkar.
Kam to msampayang farane ma mfatutu feti kam ye ninr Ray Silai Ni mangsiduk botuan.
Nempa kam msampayang farane nema kmi bise ma myose kabain ngamonar.
Ma boloka tomwatar ketnir to ryoding feti kam ye meluk Yesus ninr Ray Silai Ni mangsiduk iane to sasaf,
lan feti dedesar ma myose kabain ngamonar.
8 Fali kam to bise ma mbangal anftutw botunar nempa kam mose mlarat lan anftutw botunar a ne.
9 Boloka tomwatar rdaun feti kam to mamkoran iane to sasaf,
lan feti kmi dedesar ma mimkoran ma milele Ratu.
Ma kam msampayang ber Ratu nema mtyafal ma myorip a mlyarat Ratu Ni mpempeang.
10 Iane nwayat ma to kukmat a kmi a fuky e,
yakw kurengi surat ye baluan ber a kmi,
nema farlan kmwa e,
to kal ningw kuase la kfwengarat a kmi.
Fali Ratu nal kuase ber kam ma mose ma mimkoran ma milele I,
ma to mose ma mimsoal I.
Salam Penutup
13:11-13
11 Mpa wangur,
ka mdyengar fen ngamone safe ma kfwalak ye.
Yakw ktwak ma weni dalmir a rsenang.
Ma ka mireke ma myorip a mlyarat Ratu Ni mpempeang.
Ma ka myorip e dalmir lese,
ma mingamon myor tomwatar.
Farlan tose farane,
keta Ratu nkamis kit,
ma nose ma tmorip e tangamon tor tomwatar,
ma keta I nor kit dedesar.
12 Ma myose salam ber soranyar monuk na iane ma miomat lim myor sir la mfyatutu feti dalmir lese.a
13 Soranyar monuk ma ramin ye rkirim salam ber a kmi.
Ka weni Yesus ninr Ray Silai ma neluk ninr Mangnrure ne nfatutu Ni dalamy ngamone ber a kmi.
Ma ka weni Ratu nkamis a kmi ma Ni Smwangtany nose ma dalmir lese myor I.
Salam nof yakw,
Paulus.