Paulus natrufe kabar sa ma Ratu nal ber i
12:1-10
1 Wangur,
ni botuan e,
tafdas kit a ne to ubany.
Boloka farane yakw kmpweang ma kufdas yakw.
Yakw kmpweang ma kusaur trufar sa ber a kmi ma ninr Mangnrur Silai nfatutu ber yakw.
2 Yakw kufai tomwatar sa ma dalam lese nor Yesus ninr Ray Silai.
Ngarak buti resin fat ma nsapat a ne,
Ratu nfair i far ain ma medase desar na surga.
Nempa to kufai feti nfair tenany nre nfair lan smwangtany.a
Lan Ratu ma nafai.
3-4 Ma yakw kufai feti Ratu nfair i far ain ngamone sa ngarany Firdaus.
Boloka farane to kufai feti Ratu nfair tenany nre tate.
Lan Ratu ma nafai.
Na iano i ndengar kabain ngamonar ma tomwatar to bise ma rlang,
mpa to tomwate fen lese ma bise nfalak kabanir a ne.
5 Yakw keta kufdas tomwate ma natrufe farane,
nempa to kutanuk la kufdas a kbwali yakw.
Ma ni ngafele e,
kufdas yakw na kabanir ma to boangw kal.
6 Ni botuan e,
bise ma kufdas yakw na kabanir yadin ma kose ne,
nempa to kose farane.
Ma to kmpweang ma kufdas yakw kbwalak tomwat modar,
fali safe ma kfwalak a ne lan kabain botunar.
Mpa kumlin motak nema tomwatar kete rafdas yakw ma nlengan nof safe ma yakw kose ne.
Ma kmpweang ma tomwatar rsalan ningw ngamone nof safe ma kose,
ma nof ma rdengar safe ma kfwalak.
7 Botuan feti Ratu nfatutu trufar yadin ma rangamon desar ber yakw.
Nempa I to nmpeang ma kufdas yakw na kabanir a ne.
Iane nwayat ma I nal maninik silayar sa ber yakw nema kete kufdas yakw.
Maninik a ne farlan duryar sa ma namin tenangw,
ma iane smwangat yatkar nir ulun ni mangsiduk ma nsiksa yakw dedesar.
8 Yakw kswampayang botuan desar ber ninr Mangnrure Silai lain tel lo,
nema nalin kalin maninik ye nof yakw.
9 Nempa Ratu nfalak,
“Yakw dedesar ma kfwatutu dalangw ngamone ber ko ma iane dengan lo.
Fali noak ma to mose mal sasaf keta Ningw kuase ma nafkoran ko ma boam mal ma mose safe-safe ne.”
Iane nwayat ma kswenang resi ma kufdas yakw na kabanir ma to boangw kal,
nema Yesus ninr Ray Silai Ni kuase nafkoran yakw.
10 Mpa boloka to bise ma kose kal sasaf,
tomwatar rsiksa yakw ma rsil a rbabal yakw nempa dalangw a nsenang.
Ma dalangw a nsenang a nbal noak ma to ningw sasaf ma kwoman suse.
Fali noak ma to kose kal sasaf keta Yesus ninr Ray Silai nafkoran yakw ma boangw kal ma kose safe-safe ne.
Paulus dalamy suse na soranyar na Korintus
12:11-21
11 Wangur,
kmi ye ma myose ma kutanuk ma kufdas yakw farlan tomwat modar.
Ni botuan e noak ma tomwatar rarikan yakw e,
kmi ye ma ka mifdas yakw ma to lan koko yakw.
Boloka tomwatar ketnir rfalak feti yakw ye to ubangw sasaf nempa to kswue yakw kof mangsidkwar ma mfyalak feti mangsiduk silayar sir a ne.
12 Noak ma kor a kmi e,
yakw kose kabanir yadin lo.
Ma kabanir a ne yakw kose ma kfwatutu feti yakw ye Yesus ninr Ray Silai Ni mangsiduk.
Yakw kose kabain mpasalnar ma fanikar la kfwatutu Ratu Ni kuase.
Boloka kabanir yadin rfarangal yakw nempa kswabar motak ma kose kabanir a ne.
13 To sasaf ma to kose ber a kmi.
Safe-safe monuk a ne yakw kose ber a kmi lo ma ber soranyar na kote walyetar a nbal.
Ma lan lese ma to kose ber a kmi iane feti to kmpweang ma kose suse kmi ma to ktwak a kmi ma mibutin doit la mtyulung yakw na ningw perluar.
Mpa mdyaun feti safe ma kose ne sale e?
Tate nre!b
14 Wangur,
yakw ktwi kukmat a kmi lain du lo.
Ma lere ye kose ma ktwi kukmat a kmi a nbal fen lain tel.
Ma to kmpweang ma kose suse kmi,
nre kunriak ma myal mir kabanir ber yakw,
fali yakw kmwa ma ktwulung a kmi.
Ma kal a kmi a kweluk angkur,
ma kangkir a ne to ranriak doit la rpiare enir amnir nempa enir amnir ka rpiare sir.
15 Iane nwayat ma kmpweang ma kal monuk ningw safe-safe ma ber a kmi,
ma nlengan a nbal e,
kal ningw momorip la ktwulung a kmi.
Yakw kose farane fali kwamis resi kmi.
Nempa safema kmi mkyamis yakw myor dalmir tubun motak?
16 Ma kmi monuk mifai feti noak ma kor a kmi a ne to lain sa ma kose suse kmi na ninr perluar.
Nempa tomwatar ketnir rfalak feti yakw klwepusuk a kmi ma kfwule kmi la kunriak mir dotyar.
17 Kmi mdyaun feti yakw kose farane desar ber a kmi e?
Tate nre!
To kunriak mir dotyar.
Ma nof tomwatar ma klwuan sir ber a kmi a ne,
to fen lese nbal ma ktwak sir ma rti ral mir dotyar ma ber yakw.
18 Botuan feti noak a ne yakw klwuan Titus nor waninrar sa ma nalele Yesus ma rti rsalan a kmi.
Noak ma Titus nor a kmi e,
i nlepusuk a kmi ma nanriak doit nof a kmi e?
Tate nre!
Kmi mifai feti kam madu Titus ye dalmyamar lese ma mamy adat feleles.
19 Wangur,
nre kete mdyaun feti safe ma marengi na surat ber a kmi ye la mafdiat kam.
Tate nre!
Ratu nafai dalmyamar feti mkamis resi kmi ma safe ma kam mfalak a ne mlarat Yesus ninr Ray Silai Ni mpempeang.
Ma safe-safe monuk ma kam mfalak ma mose ne nema kmi mtyafal ma milele Yesus.
20 Yakw dalangw suse feti nre kete noak ma ktwi kukmat a kmi e,
yakw to kswenang ma kswalan mir adat.
Mpe keta kmi to msyenang a nbal na safe ma yakw kose ber a kmi.
Yakw dalangw suse feti nre kete noak ma kmwa e,
kswalan ma mibangal a kmi,
mimkeus tomwat walyetar nir kabanir,
mires rut,
mdyaun lan tenmir,
mirikan tomwatar,
misompun,
mifdas a kmi,
ma myose mimiri.
21 Ma yakw dalangw suse feti nre kete noak ma kukmat a kmi e,
mir adat a ne nose ma yakw kmweat na Ratu ma klwangun I a ne sounlury.
Ma nre kete kmwa e,
keta ktwasing fali tomwatar yadin nof a kmi a ne lolone ranronr,
raosangri bolar ma rose rlarat lan nir makeus.
Sir rose farane nof luryain ma to rtate nir salar a ne fuky.