Paulus to nmpeang ma soranyar na Korintus rlarat tomwatar ma raftutu anftutw lepuskwar
11:1-15
1 Wangur,
yakw kmpweang ma kufdas yakw ber a kmi,
mpa ktwak ma ka msyabar ma mdyengar safe ma kfwalak ye.
Boloka kutanuk ma kufdas yakw farye e,
iane farlan tomwat modar.
2 Wangur,
yakw kwamis a kmi farlan ma Ratu nkamis a kmi,
mpa to kwinrang ma tomwatar rfule kmi ma nwayat ma to myose mlyarat Ratu Ni anftutwar a nbal.
Kmi farlan batdarar sa ma merwane to nkoil i a fuky.
Ma yakw ye farlan amany ma kyoding i lo ma keta nafsau nor merwanar sa.
Merwane ne iane Yesus ninr Ray Silai.
3 Nempa dalangw suse feti nre kete tomwatar rfule mir andanwar nwayat ma to mlyarat Yesus ninr Ray Silai myor dalmir kateman lo.
Ma iane feleles farlan ma luryain e,
kasi nfule Eva nor ni ngribatin ngamonar.
4 Tomwatar ketnir rma ma rakmat a kmi ma raftutu kmi na Yesus ma to feleles farlan ma maftutu ber a kmi a ne,
nempa kmi mlyangun sir myor dalmir senange.
Kmi a nbal mlyangun smwangat walyetar ma to feleles nor Ratu Smwangtany.
Ma kmi mlyangun a nbal ibar walyetar ma to feleles nor Ibar Ngamone ma maftutu ber a kmi a ne.
5 Kmi mdyaun feti sir a ne,
“Mangsiduk silayar.”
Nempa yakw kdwaun feti sir a ne to rlengan rof yakw.
6 Boloka to kufai ma kutanuk nempa kufai resi safe ma kuftutu ber a kmi a ne.
Ma kam mose safe-safe monuk la maftutu anftutwar a ne ber a kmi nof luryain lo.
7 Noak ma kufwibar Ibar Ngamone nof Ratu yakw to ktwak sewe fen rufuky kof a kmi a nbal,
nempa koko yakw kwarya la kswalan ningw perluar.
Yakw kose felangw farlan mangkaryayar sa,
nema tomwatar ralang a kmi.
Farlan yakw kose farane iane sale e?
Tate nre!
8 Noak ma kuftutu kmi e,
soranyar rof kote walyetar ral doit ber yakw.
Iane farlan ma kumnang nir dotyar nema bise ma ktwulung a kmi ma kufwibar Ibar Ngamone.
9 Noak ma kor a kmi ma to ningw sasaf e,
yakw to kose suse kmi.
Nempa wangur rof Makedonia ma rtulung yakw na ningw perluar a ne.
Ma kujake yakw desar ma kete kose suse kmi na safe-safe motak.
Ma keta kose farane dedesar.
10 Safe ma yakw kfwalak a ne botuan fali anftutw botunar na Yesus ninr Ray Silai dedesar ma namin dalangw.
Mpa farlan kufdas yakw na kabanir a ne ka kete tomwate fen lese na propinsi Akhaya ma nose nteri yakw.
Fali yakw to ktwak sasaf kof tomwat Korintusar a kmi.
11 Safema yakw to kmpweang ma ktwak dotyar kof a kmi la mtyulung yakw?
Nre kete kmi mifliak feti to kwamis a kmi?
To farane!
Ma Ratu nafai feti kwamis a kmi.
12 Ma safe ma yakw kose lere ye keta dedesar ma yakw kose.
Mangsiduk walyetar rtak sewe rof a kmi nempa yakw e tate.
Yakw kose farane nema to let ber sir ma rafdas sir feti nir karyae feleles nor kam.
13 Yakw kfwalak farane fali tomwatar a ne mangsiduk lepuskwar.
Sir rose felnir far Yesus ninr Ray Silai Ni mangsidkwar safo sir rlepusuk tomwatar na nir karyae.
14 Ma farlan rose farane ka kete tampriang,
fali smwangat yatkar nir ulun bise ma nose felany farlan Ratu Ni malaekat ma ni snyain idak a nbal.
15 Mpa kit to tampriang farlan smwangat yatkar nir ulun ni mangkaryayar ne rose felnir farlan Ratu Ni mangkaryayar ma ramlonry.
Ma keta famudi e,
Ratu nukun sir a nlarat safe ma sir rose ne.
Paulus nasaur ni susar ma ni karyayar la nfatutu feti Ratu Ni mangsiduk botuan i
11:16-33
16 Wangur,
yakw kfwalak a nbal ber a kmi ma ka kete mdyaun feti yakw farlan tomwat mode ma natanuk la nafdas i.
Nempa farlan mdyaun farane yakw ktwak ma ka mlyangun yakw a nbal farlan ma mlyangun tomwat walyetar ma rmod a ne,
nema bise ma kutanuk ma kufdas yakw a nbal.
17 Mpa yakw kmpweang ma kutanuk ma kufdas yakw nempa safe ma kfwalak ye to nof ninr Mangnrur Silai.
Noak ma kutanuk ma kufdas yakw e,
iane yakw kose kbwalak tomwat mode ma natanuk ma nafdas i.
18 Tomwatar yadin ratanuk la rafdas sir na nir karyayar na saryamprenar.
Mpa kmpweang ma kufdas yakw kbwalak sir a nbal.
19 Kmi mdyaun feti mifai resi nwayat ma msyenang ma mdyengar tomwat modar a ne ma ratanuk.
20 Tomwatar ketnir rakawar a kmi,
nempa mlyangun motak sir.
Ma ketnir a nbal e,
rane mir yatin kotkir,
rkuase kmi,
rafdas sir ma rarikan a kmi,
nempa msyabar motak ma mlyangun sir.
21 Yakw kmweat ma kfwalak ngriar ye fali kam to mbaran ma mose farane.
Nempa farlan tomwat walyetar rafdas sir keta kufdas yakw nbal.
Ma farlan yakw kose farane iane kose kbwalak tomwat modar a ne.
22 Ma farlan rfalak feti tomwat Ibrani sir e,
keta kfwalak feti tomwat Ibrani yakw nbal nre!
Farlan rfalak feti tomwat Israelar sir ma Ratu nfil sir e,
keta kfwalak feti tomwat Israel yakw a nbal nre!
Ma farlan rfalak feti Abraham empuny nusiny ber sir e,
keta kfwalak feti Abraham empuny nusiny ber yakw nbal.
23 Farlan sir rfalak feti rkarya ber Yesus ninr Ray Silai e,
keta kfwalak feti yakw kwarya ma kmwat a klwai klwengan kof sir a nbal.
(Yakw kfwalak farye ye iane farlan tomwat fukat ma natanuk) nempa iane botuan feti yakw kwarya klwengan kof sir monuk.
Ma lain yadin ma tomwatar rnau yakw na sel,
ma ketnir a nbal e dedesar ma rsil a rbabal yakw.
Ma lain yadin a nbal ma kwoman suse ma ketla kmwat.
24 Tomwat Yahudyar rukun yakw lain lim.
Noak ma rukun yakw lain lese e,
rsil rbabal yakw terik lain buty tel resin siu.a
25 Tomwat Romar ral katutun la rbabal yakw lain tel.
Ma tomwatar rakjai yakw ror bati lain lese ma rareke ma rfen yakw.
Ma yakw kutloram kor kabal lain tel e lo,
ma kuyeban lere lese ma nronram lese.
26 Noak ma ktwi kufwibar Ibar Ngamone na mpenempen e,
yakw ktwungan susar yadin ma rose ma ketla kmwat.
Kjaip nayeban yakw,
mangamnangar rose ma rfen yakw,
tomwat Yahudyar ma tomwatar ma to Yahudi sir rose yatak yakw.
Noak ma kumin kote,
ain letkape,
ma kumin dol e,
dedesar ma kwoman suse ma ketla kmwat.
Ma tomwatar ketnir ma rose felnir far tomwatar ma ralele Ratu ne,
rose suse yakw nbal.
27 Yakw kwarya ma kmwat a klwai desar.
Far mpene ne to kurwa kal,
kumlafar ma to ktwame kwenum.
Far mpene ne kwoman manririn ma to ningw rabit.
28 To lan iane nempa lerar e,
dalangw suse nbal ma kdwaun feti ka kose farpe la ktwulung soranyar monuk na mpenempen.
29 Fali farlan kdwengar feti waninrar sa to namkoran ma nalele Yesus ninr Ray Silai,
yakw dalangw suse.
Ma farlan tomwatar sa nose ma tomwat walyetar rfufw far sale dalam,
keta kures desar.
30 Mpa farlan ka kufdas yakw,
keta kufdas yakw na safe ma to boangw kal ma kose.
31 Ratu ye Yesus ninr Mangnrure ne Amany.
Ma I nafai feti to klwepusuk.
Ka weni tomwatar monuk rdangin Ratu ngarany terik ma dedesar.
32 Noak ma kumin kote Damsyik a ne,
rai Aretas nfatutu tomwatar sa ma neluk gubernur.
Tomwate ne ma nluan suldadwar ma rajake kote ne ni finru matan,
nema bise ma romat yakw.
33 Nempa tomwatar ketnir rnau yakw na keranjang sa,
ma rtolar yakw rof tembok ne ni dianele far burit.
Mpa bise ma kufla kof gubernur ma ni suldadwar ma rose ma romat yakw ne.