Paulus nafdiat i ma nfalyole feti i ye Ratu Ni Mangsiduk botuan
10:1-18
1 Wangur,
tomwatar ketnir rof a kmi a ne rfalak feti,
noak ma yakw Paulus kor a kmi e,
to kbwaran ma liringw mengarat a kmi.
Sir rfalak feti to kor a kmi betno kbwaran ma liringw mengarat a kmi.
Nempa yakw to farane fali kswabar ma kmpweang ma kutanuk e,
kmwalas ber a kmi farlan Yesus ninr Ray Silai.
2 Mpa yakw ktwak desar kof a kmi ma kete mpyaksa ma liringw mengarat a kmi.
Fali noak ma kukmat a kmi e,
keta kose ma kfwengarat desar tomwatar ketnir nof a kmi a ne.
Sir a ne ma rfalak feti mamy adat ye farlan tomwat saryamprenar.
3 Botuan feti kam lolone morip a na saryamprene.
Nempa kam to mlarat tomwat saryamprenar nir adat ma mafufu tomwatar ma rbangal Ratu Ni anftutw botunar.
4 Kam ye farlan suldadu ma npaki minak la naprang.
Nempa minak ma kam mpaki la mbangal tomwatar ma rbangal Ratu Ni anftutw botunar a ne,
to nof saryamprene.
Fali Ratu nal kuase ber kam ma mose ma tomwatar ma rbangal Ratu Ni anftutw botunar a ne ma to bise rfalak sasaf desar.
Kuase ma Ratu nal ber kam a ne farlan minak ma suldadwar rpaki la rafyatak muswar nir lalangnar.
5 Kam mpaki Ratu Ni kuase ne la mbangal anftutw lepuskwar nof sir ma rbangal Ratu Ni anftutw botunar a ne.
Ma kam mbangal tomwatar nir andanwar a nbal.
Sir a ne ma rafdas sir.
Sir ratanuk farane la rose rteri tomwatar nema kete rafai Ratu.
Ma kam mose ma sir to rdaun safe-safe motak rlarat nir andanwar lo,
nempa rdaun lan ma rose rlarat Yesus ninr Ray Silai Ni mpempeang.
6 Farlan mfyatutu feti myose mlyarat Yesus ninr Ray Silai Ni faretar monuk,
betno kam mukun sir ma to ralarat liry.
7 Wangur,
safe ma msyalan a ne lan kabanir ma ramin tomwatar tenir burit,
ma dalmir tate!
Ise motak ma nfalak feti Yesus ninr Ray Silai Ni tomwate ber i,
ka nanremi feti kam ye Yesus Ni tomwate ber kam a nbal farlan i.
8 Boloka kutanuk ma nres la kufdas yakw na kuase ma Yesus ninr Ray Silai nal ber kam a ne,
yakw to kmweat.
Fali kuase ma nal ber kam a ne to nose ma mimsoal I,
nempa nose ma mimkoran ma milele I.
9 Yakw kfwalak farane fali nre kete mdyaun feti yakw kurengi surat ye la kuftaut a kmi.
10 Tomwatar ketnir rfalak,
“Paulus a ne nfengarat soranyar na ni surat dalam motak.
Nempa noak ma nor sir e,
sir rfalak feti natanuk e,
nmalas ma ni ngribatnir a ne rti letkape motak.”
11 Tomwate ma nfalak farane ka ndaun fen ngamone safe ma nfalak a ne.
Fali noak ma mti makmat a kmi e,
keta mose feleles farlan safe ma marengi na surtar ber a kmi a ne.
12 Tomwatar ma rbangal yakw ne dedesar ma rafdas sir.
Ma kam to mbaran ma mfalak feti kam feleles mor sir.
Ni botuan e,
sir rmod fali koko sir a rpaki yayatrwar ma sir rose ne la rsar a rbali sir.
13 Ma kam to mpeang ma matanuk ma nres la mafdas kam na karyae ma Ratu to nal ber kam.
Nempa mpeang lan ma mafdas kam na karyae ma Ratu nal ber kam.
Kam mafmpwane mamy karyae ne mti mait a kmi a na Korintus a nbal.
14 Mpa farlan kam mait a kmi a na Korintus e,
kam mater lan iane.
Iane feti kam to mlanre snyap ma Ratu ntetak ber kam a ne.
Ma ni botuan e,
kam ye ma mafwibar baluan Ibar Ngamone na Yesus ninr Ray Silai ti nait a kmi.
15 Kam to mafdas kam na tomwat walyetar nir karyae fali iane ain ma Ratu to ntetak ber kam.
Nempa kam malele feti noak ma mtyafal ma milele Yesus ninr Ray Silai,
keta Ibar Ngamone ma mafwibar ber a kmi a ne ntafal ma nsor mpenempen nlarat Ratu Ni mpempeang.
16 Iane nwayat ma kam bise ma mti mafwibar Ibar Ngamone na Yesus ninr Ray Silai na pnu walyetar ma dodo nof mir a pnue.
Mpa kam to mpeang ma mafdas kam na tomwatar nir karyae na ain walyetar ma Ratu ntetak ber sir a ne.