Paulus ntak soranyar na Korintus ma rabutin doit ma ral ber soranyar na Yerusalem
9:1-5
1 Wangur,
ni botuan e to kpwerlu ma kurengi na ningw surat dalam na dotyar ma keta myal ber Ratu Ni tomwatar na Yerusalem a ne.
2 Yakw kufai feti kmi msyenang ma mtyulung soranyar walyetar mpa kdwangin a kmi ber soranyar ma ralele Yesus na Makedonia.
Yakw kfwalak ber sir feti ngarak ma nsapat a ne waninrar na Korintus na propinsi Akhaya rabutin doit lo ma rtulung soranyar walyetar.
Iane nwayat ma tomwatar yadin na Makedonia rtafal ma rsenang ma rabutin doit.
3 Nempa lere ye yakw klwuan Titus nor waninrar du ma ralele Yesus ma rti rakmat a kmi.
Yakw kmpweang ma mibutin monuk dotyar a ne ma mnyau farlan ma kfwalak ber sir a ne.
Kmi myose farane la mfyatutu feti safe ma mfalak la mdangin a kmi a ne to mlepusuk.
4 Yakw kfwalak farane fali nre kete tomwat Makedoniar ketnir rlarat yakw ma mti makmat a kmi.
Ma farlan rsalan feti to mibutin dotyar a fuky keta kam meat desar.
Mpe keta kmi myeat a nbal fali safe ma kam mfalak la mdangin kmi a ne,
iane kam mfalak motak.
5 Iane nwayat ma yakw klwuan Titus ma waninrar du a ne ma rti rakmat a kmi baluan,
nema rurus dotyar ma myoding a ne.
Yakw kose farane nema noak ma kwait e,
dotyar monuk a ne mibutin lo.
Kmi myose farane la mfyatutu feti kmi myal dotyar a ne myor dalmir senange ma kam to mribut a kmi.
Ka mibutin dotyar ber soranyar myor dalmir senange
9:6-15
6 Ka minremi!
Tomwate ma nyefar finyar lan rufuky keta nonri isnir lan rufuky.
Ma tomwate ma nyefar finyar yadin keta nonri isnir yadin a nbal.
7 Tomwatar mpane ka ral dotyar ber tomwat walyetar rlarat nir mpempeang.
Ma kete ral ror dalmir tubun,
nre ral fali tomwatar ribut sir.
Fali Ratu nkamis tomwatar ma ral ber tomwat walyetar ror dalmir senange.
8 Ratu Ni kuase ma nal berkat ma nlie nlengan ber a kmi nema safe-safe ma mpyerlu a ne dengan ber a kmi.
Ma nof mir berkat ma nres a ne bise ma myose kabain ngamonar la mtyulung tomwat walyetar.
9 Iane farlan ma rarengi na Kitap Lelerap dalam,
“Tomwate ma dalam nangamon ma nal berkat ber tomwatar ma rawatan,
ma kabain ngamonar ma i nose ne keta sir ranremi terik ma dedesar.”*
10 Ratu nal finyar ber mangosboar nema bise ma rtanam,
ma I naisi let isnir nema bise ma rtame.
I keta nal berkat ber kmi ma nose nbal ma mir berkat a ne ntafal ma yadin.
I nose farane nema kmi bise ma mtyulung tomwat walyetar na nir perluar,
nema nti a nti e mtyafal ma myose kabain ngamonar ber tomwat walyetar.
11 Ratu nal safe safe kabain ma nlie nlengan ber a kmi nema dalmir rangamon a nbal ma myal ber tomwat walyetar.
Ma noak ma kam monr safe-safe kabain ma mibutin a ne,
iane nwayat ma keta tomwatar yadin rose alang ber Ratu.
12 Safe ma myal la mtyulung tomwatar ma ralele Yesus na Yerusalem a ne keta nose ma nir perluar a ne dengan.
To lan iane nempa nwayat ma tomwatar yadin rose alang ber Ratu nbal.
13 Noak ma tomwatar na Yerusalem ronri safe ma kmi myal e,
sir rdangin Ratu.
Sir rdangin Ratu fali rsalan feti kmi milele Ibar Ngamone na Yesus ninr Ray Silai,
ma myose mlyarat safe ma I nfalak a ne myor dalmir kateman.
Ma sir rdangin Ratu nbal fali msyaman mir safe kabain ber sir ma ber tomwat walyetar myor dalmir kateman.
14 Ma sir dedesar ma ranremi kmi ma rsampayang ber a kmi a nbal.
Sir ranremi kmi a na nir sampangar fali Ratu nfatutu Ni dalamy ngamone ma nlie nlengan ber a kmi ma nkarya na dalmir.
15 Mpa wangur,
mya ma taktem a tose alang ber Ratu fali Ni berkat ma nlie nlengan ber kit a ne.