Tomwatar ma ralele Yesus rabutin doit ber soranyar na kote Yerusalem
8:1-15
1 Wangur,
kam mpeang ma mafbotin ber a kmi na Ratu Ni dalamy ngamone ma nfatutu ber soranyar ma ralele Yesus na kotar mpane ma ramin propinsi Makedonia.
2 Boloka sir rkoman susar yadin nempa sir dedesar ma dalmir a rsenang resi.
Ma boloka sir rawatan desar nempa dalmir rangamon ma rabutin doit la rtulung soranyar walyetar.
3 Yakw kswalan desar feti sir ral nir dotyar a ne rlarat safe ma namin sir,
to lan iane nempa ral a rlengan nof a ne nbal.
4 Sir dedesar ma rtak kam nema koko sir a nbal e bise ma ral nir wayat la rtulung Ratu Ni tomwatar na Yerusalem.a
5 Kam mafliak feti keta sir ral nir dotyar a ne lan rufuky,
safo sir ral a rlengan nof safe ma kam mdaun.
Ma sir ral nir momorip baluan ber Ratu ninr Mangnrure ma rose rlarat Ni mpempeang.
Iane nwayat ma sir rose rlarat safe ma kam mfalak ber sir a nbal.
6 Titus ma nsayak baluan ma mibutin doit la mtyulung soranyar walyetar mpa mibutin doit noak a ne lo.
Iane nwayat ma kam mtak desar i ma nti nakmat a kmi,
nema ntulung a kmi ma miloran mir karya ngamone ne.
7 Ratu nal kabain ngamonar yadin ber a kmi lo.
Iane feti:
I nose ma kmi mtyafal ma mimkoran ma milele Yesus.
Ma I nose ma mkyaul myal Ratu Ni anftutw botunar nwayat ma mifai resi ma mfyalyole ber tomwat walyetar.
I nose nbal ma kmi mtyulung tomwat walyetar myor dalmir kateman,
ma nose ma mkyamis desar kam.
Safe-safe monuk ma kmi myose ne nangafel mpa kam mtak ma mfyatutu mir dalam ngamone nbal la mtyulung soranyar walyetar na Yerusalem.
8 Yakw kfwalak farane iane to feti kfwarete kmi.
Nempa kmpweang lan ma mifai feti soranyar na Makedonia rtulung soranyar walyetar ror dalmir kateman lo.
Mpa farlan myose farane keta kufai desar feti kmi mkyamis soranyar walyetar a ne myor dalmir kateman a nbal.
9 Kmi mifai feti Yesus ninr Mangnrure ma neluk ninr Ray Silai ne nfatutu Ni dalamy ngamone ber kit lo.
I naoskai nempa nose felany farlan tomwatar sa ma nawatan la ntebus a kmi.
I nose farane nema nof Ni watany a ne,
kmi bise ma mioskai na Ratu sounlury.
10-11 Ngarak dalam ma nsapat a ne,
kmi mpyeang ma mtyulung soranyar walyetar na Yerusalem.
Mpa kmi baluan desar ma mibutin doit la mtyulung sir fali mpyeang ma mtyulung sir farane.
Ma yakw kdwaun feti ka msyoru ma mibutin doit far ma myose luryain a ne fali iane ma ubany ber a kmi.
Ma ka myose farane myor dalmir kateman mlyarat safe ma namin a kmi a ne.
12 Farlan kmi myal ber tomwatar myor dalmir kateman,
keta Ratu nmpeang safe ma myose ne.
Ratu to ntak safe-safe ma to namin a kmi,
nempa I ntak safe-safe ma namin kmi a ne.
13 Kam to mpeang ma kmi myal a mlyengan myof safe ma namin a kmi ma tomwat walyetar e,
to ral sasaf.
Tate to farane.
Nempa yakw kfwalak farane nema safe-safe ma tperlu a ne dengan ber kit monuk.
14 Lere ye mir safe-safe ma namin a kmi a ne nlie nlengan desar mpa ka mtyulung sir ma to nir sasaf a ne.
Mpe keta noak ma to mir sasaf e,
sir bise ma ral nir kabanir ma nres la rtulung mir perluar a nbal.
Farlan mitulung a kmi farane keta safe-safe ma tperlu a ne dengan ber kit monuk.
15 Iane farlan ma rarengi na Kitap Lelerap dalam farye:
“Tomwatar ma ronri yadin keta to nres.
Ma sir ma ronri lan rufuky keta to omp.” *
Paulus nsiduk Titus nor tbwarnir du ma rti Korintus
8:16-24
16 Yakw kose alang ber Ratu fali I nkarya na Titus dalamy nwayat ma i nsenang ma ntulung a kmi.
Ma i nsenang ma ntulung a kmi feleles farlan ma kam mtulung a kmi a nbal.
17 Noak ma kam mtak i ma nti nakmat a kmi e,
i nsenang resi.
Ma ni botuan e,
kam to mtak i a fuky e,
koko i a nmpeang ma nti nakmat a kmi lo.
18 Ma kam to mluan ma koko i a nti nakmat a kmi nempa nor waninrar sa.
Waninrar a ne ma soranyar monuk na mpenempen ralang i fali nkarya ma nmat a nlai desar ma nafwibar Ibar Ngamone.
19 To lan iane,
nempa soranyar walyetar ma ramin mpenempen a ne rfil i a nbal ma maktem a monr dotyar far Yerusalem.
Kam mose farane nema tomwatar rdangin Ratu ninr Mangnrure,
ma bise ma rsalan feti kam mpeang desar ma mtulung soranyar walyetar mor dalmyamar kateman.
20 Kam msiduk waninrar ye ma rlarat Titus a nbal nema najake kam ma kete tomwatar rsoi lamain kam feti kam mpaki dotyar ketnir mof doit arwaluk a ne.
21 Fali kam mpeang ma mose kabanir mor malonri,
ma Ratu nafai dalmyamar.
Ma kam mpeang a nbal ma tomwatar monuk rsalan farane.
22 Kam mluan tomwatar sa nbal ma ratel Titus a rti.
Kam msalan i lain fir ye lo feti i dedesar ma nsenang ma ntulung soranyar walyetar.
Ma lere ye i ntafal ma nmpeang ma ntulung a kmi fali nalele desar feti keta mibutin mir dotyar la mtyulung soranyar walyetar.
23 Ma farlan tomwatar ketnir renrat Titus e,
ka mfyalak feti i a ne ma maktem a mkarya la mtulung kmi.
Ma waninrar du ma raktem Titus a ne ma soranyar rof mpenempen ma rsiduk sir.
Ma nof nir karyayar a ne tomwatar rdangin ninr Ray Silai.
24 Mpa kam mtak ma ka mfyatutu feti mkyamis desar sir.
Kmi myose farane nema soranyar na mpenempen bise ma rafai feti safe-safe ma mfalak la mdangin kmi a ne botuan.