Wangur ma kwamis a kmi,
Ratu nose Ni yoyoding a ne ber kit lo,
mpa ka taflerap dalminrar ma teninrar nof kabain yatkar monuk.
Farlan tose farane iane feti talang Ratu,
ma tmorip ber lan I nema nti a nti e tanglerap a tbalak I.
Soranyar na Korintus rose ma Paulus nsenang resi
7:2-16
2 Wangur,
yakw ktwak ma mlyangun kam myor dalmir kateman.
Fali kam to mose sale ber tomwate fen lese,
to mlepusuk tomwate fen lese,
ma to manriak doit mof tomwate fen lese nbal.
3 Yakw kfwalak farane to feti kfwasale kmi.
Fali yakw kfwalak lo feti mkamis resi kmi,
mpa boloka mat nre morip e,
dedesar ma taktem.
4 Yakw kulele desar a kmi ma kdwangin a kmi na safe ma kmi myose.
Ma boloka mkoman suse yadin nempa mifkoran dalmyamar,
mpa yakw kswenang resi.
5 Noak ma kam betno mait Makedonia,
to let desar ber kam ma msanar.
Ma kam mti mpenempen motak e,
kam dedesar ma mkoman suse,
mpa kam to mafai feti nof mpe ma dalmyamar suse na kmi,
ma nof mpe ma mbali tomwat walyetar ma rbangal kam.
6 Nempa Ratu dedesar ma nafkoran tomwatar ma dalmir suse,
mpa I nafkoran dalmyamar a nbal nof ma nsiduk Titus ma nakmat kam.
7 Botuan feti noak ma Titus nma ma nakmat kam e,
kam msenang.
Nempa kam msenang a nbal fali nasaur ber kam feti noak ma i nor a kmi e,
myose ma dalamy a nsenang.
Ma nfalak a nbal feti kmi mpyeang desar ma mitungan myor yakw,
ma mfyenai mbyali safe ma myose ne lo,
ma kmi mpyeang ma myor yakw ma taktem a tkarya.
Iane nose ma mtafal ma msenang resi.
8 Noak ma kurengi surat a ne ber a kmi e,
yakw kdwaun desar fali ngribatnir na surat a ne nose ma dalmir suse.
Botuan feti noak a ne kdwaun desar surat a ne,
nempa lere ye to kdwaun lo.
Yakw kufai feti boloka surat a ne nose ma dalmir suse nempa to dodo.
9 Botuan feti lere ye yakw kswenang,
nempa kete mdyaun feti yakw kswenang fali kose ma dalmir suse lo.
Yakw kswenang fali dalmir suse ne nwayat ma mtyate mir salar.
Ma dalmir suse fali mlyarat Ratu Ni mpempeang,
mpa kam to mose sasaf desar la mose suse kmi.
10 Farlan dalminrar suse tlarat Ratu Ni mpempeang,
iane nwayat ma tate ninr salar mpa Ratu to nukun kit.
Ma keta to tdaun dalminrar suse ma farane.
Nempa farlan dalminrar suse fali tlarat tomwat saryamprenar nir mpempeang,
iane to nwayat ma tate ninr salar mpa keta tmat dedesar.
11 No msyalan,
noak ma dalmir suse mlyarat Ratu Ni mpempeang e,
iane fen mir ngamone.
Fali dalmir suse ne nose ma mlyarat Ratu myor dalmir kateman.
Kmi mireke desar ma myose mbyali ma ngarmir a rangafel myof mir adat yatkar ma rafmpusuk ngarmir a ne.
Kmi to mpyeang ma myose kabain yatkar,
ma mimtaut ma myose kabain yatkar a nbal.
Kmi mpyeang ma mitungan myor yakw,
nwayat ma dedesar ma myose mlyarat safe ma kfwalak.
To lan iane nempa noak ma tomwatar sa nose sale e,
myukun desar i.
Safe ma kmi myose ne la mfyatutu feti to mir sal na kabanir monuk a ne.
12 Ni botuan e,
yakw to kurengi surat a ne ber a kmi,
la myukun tomwatar ma rose kabain yatkar.
Ma yakw to kurengi surat a ne nbal la mtyulung tomwat walyetar ma dalmir suse fali kabain yatkar ma tomwatar rose ber sir.
Nempa yakw kurengi surat a ne nema koko kmi a mifai feti kmi mkyamis desar kam,
ma Ratu nafai feti iane botuan.
13 Safe ma kmi myose ne,
nose ma dalmyamar ramkoran.
To lan iane nempa noak ma mdengar feti Titus dalamy a nsenang,
dalmyamar ntafal ma rsenang a nbal fali kmi myose ma dalam a namkoran.
14 Noak ma Titus to nti nakmat a kmi e,
yakw kdwangin a kmi ber i lo.
Ma noak ma nor a kmi e,
i nsalan desar feti safe ma kfwalak na kmi a ne botuan,
mpa to mifmweat yakw.
Ma safe-safe ma mfalak na kmi a ne botuan,
ma iane feleles farlan ma mfalak ber Titus.
15 Ma lere ye i ntafal ma nkamis a kmi,
fali nanremi feti noak a ne kmi mlyangun ma myalang i,
ma dedesar ma myose mlyarat safe ma nfalak a ne.
16 Yakw kswenang resi fali bise ma kulele kmi a na safe-safe motak.