Wangur,
kam mkarya mor Ratu,
mpa ka mtak desar ma mdyengar safe ma kam mfalak ye:
Ratu nfatutu Ni dalamy ngamone ber kmi lo,
mpa kete myose mir adat ma nwayat ma Ni dalamy ngamone ne to ubany sasaf na mir momorip.
2 Fali na Kitap Lelerap dalam,
Ratu nfalak:
“Ni tewat ma kmpweang ma kdwengar mir sampangar e,
keta kdwengar
ma ni tewat ma kfwair a kmi e,
keta ktwulung a kmi.”*
Mdyengar fen ngamone!
Lere ye ni tewat lo ma Ratu nfair Ni tomwatar nof nir salar.
Paulus nkoman suse iane nfatutu feti Ratu Ni mangkaryae ber i
6:3-10
3 Kam mareke desar ma mose mamy wewelmpampan ngamone nema kete neluk farangal ber tomwatar.
Kam mose farane nema tomwatar kete rarikan mamy karyayar.
4 Ma na safe-safe monuk ma mose ne,
kam mfatutu feti kam ye Ratu Ni mangkaryayar.
Ma kam dedesar ma msabar,
noak ma tomwatar rose suse kam nre mkoman susar felnir mpane.
5 Kam dedesar ma msabar noak ma tomwatar rsil a rbabal kam,
rnau kam a na sel,
ma rose mimiri noak ma kam mafwibar Ibar Ngamone.
Kam mkarya ma mat a mlai desar,
to marwa mal,
ma far mpene ne e mamlafar.*
6 Boloka farane kam dedesar ma mfatutu feti Ratu Ni mangkaryae ber kam.
Tomwatar bise ma rsalan kam farane rof dalmyamar lelerap,
mamy andaun ngamone,
msabar,
ma dalmyamar rangamon.
Ma lan Ratu Smwangtany ma nkarya na dalmyamar,
ma mkamis tomwatar mor dalmyamar kateman.
7 Kam maftutu feti Ratu Ni mangkaryae ber kam nof ma mfalak kabain botunar na Ratu Ni ngribatnir.
Ma kam mafwibar Ratu Ni ngribatnir a ne mor Ni kuase.
Ma kam mose safe-safe monuk a ne mor malonri.
Kam morip farane iane farlan minak ma mpaki la mbangal tomwatar ma to rmpeang kam.
Kam morip farane iane neluk teteri ber kam a nbal la majake kam.
8 Noak ma kam mafwibar Ibar Ngamone,
tomwatar ketnir ralang kam,
ma ketnir e rarikan kam.
Tomwatar ketnir rdangin kam,
ma ketnir a nbal e,
rafmweat kam.
Tomwatar rfalak feti kam mlepusuk safo kam dedesar ma mfalak kabain botunar.
9 Tomwatar ketnir to ryoding feti kam ye Ratu Ni mangkaryae safo tomwatar yadin na mpenempen rafai kam.
Kam ketla mat,
nempa lolone morip.
Boloka tomwatar rsil a rbabal kam nempa kam to mat.
10 Boloka dalmyamar suse nempa dedesar ma msenang.
Ma kam mawatan nempa kam maftutu tomwatar yadin nema Ratu nal berkat yadin ber sir terik ma dedesar.
Tomwatar rsalan e,
to mamy sasaf nempa ni botuan e mamy safe-safe monuk a ne ramin.
11 Wangur ma mimin Korintus!
Safe-safe monuk a ne kam mfalak ber a kmi lo ma to mamudim sasaf.
Ma mkamis resi kmi.
12 Kam mkamis a kmi mor dalmyamar kateman nempa kmi e,
mkyamis kam myor dalmir tubun motak.
13 Yakw kutanuk ber a kmi farlan ma kutanuk ber angkur ma kwamis resi sir a ne.
Mpa yakw ktwak ma mkyamis kam myor dalmir kateman farlan ma mkamis a kmi a ne.
Ka kete dalminrar lese tor tomwatar ma to ralele Yesus ninr Ray Silai
6:14-18
14 Wangur,
ka kete dalmir lese myor tomwatar ma to ralele Yesus ninr Mangnrure fali miktem mir andaun to feleles.
Ni botuan e,
tomwat ngamonar ma tomwat yatkar to bise ma rabut sir ma lese.
Iane feleles farlan tomwatar ma ramin makrokap dalam,
ma tomwatar ma ramin ngaodir dalam to bise ma rabut sir a nbal.
15 Ma ninr Ray Silai ma smwangat yatkar nir ulun a ne to bise ma nir andaun lese.
Iane farlan tomwatar ma ralele Yesus,
ma tomwatar ma to ralele I,
keta to bise ma dalmir lese nbal.
16 Tomwatar to rnau waltwar a na Ratu Ni Das Silai fali to naordeng.
Ma kit ye farlan Ratu Ni Das Silai fali I namin dalminrar lo.
Ma Ratu ma namin dalminrar a ne iane Ratu ma nmorip dedesar.*
Ratu koko I a nfalak na Kitap Lelerap dalam farye:
“Yakw keta kor sir,
ma kmworip kor sir,
ma keta Yakw kweluk Ratu ber sir
ma sir reluk Ningw tomwatar.
17 *Iane nwayat ma Ratu nfalak a nbal:
ka mtyi a mtyate tomwatar ma to ralele Ratu,
ma kete mlyosir sir.
Ka kete myose desar kabain yatkar mbyalak sir,
nema Yakw klwangun a kmi.
18 *Ma keta Yakw kweluk Ame ber a kmi,
ma kmi myeluk anakw batar ma merwanar.
Iane Ratu Mangkuase Ni Ngribatnir.”