Boloka kit tmat, nempa Ratu keta nafmorip a nbali kit ma nal teninrar beberi
5:1-10
1 Wangur,
kit teninrar na saryamprene ye farlan befkar sa ma tamin.
Kit tamin befak a ne to dodo fali befak a ne keta namprak,
iane feti tmat.
Nempa Ratu keta nal teninrar beberi ber kit na surga.
Ma teninrar beberi ne farlan das ma to bise nayatak fali tomwatar to rose nempa Ratu koko I a nose.
Das a ne iane teninrar beberi ma keta namin dedesar.
2 Noak ma tamin befak na saryamprene ye dalminrar suse nwayat ma tmpeang desar ma tamin das beberi na surga,
iane teninrar beberi.
3 Noak ma kit tmat e,
keta Ratu nal teninrar beberi na surga.
Ma keta smwangtinrar ramin teninrar beberi ne terik ma dedesar.
4 Noak ma tamin befak na saryamprene ye dalminrar suse fali tabare suse silai.
Iane to feti tmpeang ma tmat nema tnau kalin befak saryamprene ye.
Nempa tmpeang ma weni Ratu nal das beberi ma tamin.
I nose farane nema nlikur teninrar ma keta rmat ye nor teninrar beberi ma keta rmorip dedesar.
5 Ratu koko I ma nasusan safe-safe monuk a ne ber kit nema keta kit tonri teninrar beberi.
Ma I nal Smwangtany ber kit ma nfatutu feti la tonri monuk safe-safe ma nyoding a ne.
6 Iane nwayat ma dalminrar dedesar ma ramkoran.
Ma kit tafai nbal feti teninrar ye farlan befak ma kit tamin a na saryamprene,
mpa noak ma lolone tmorip a na saryamprene ye kit to bise ma tmorip tor ninr Mangnrure Silai na surga fuky.
7 Noak ma morip na saryamprene ye kam morip a mlarat safe ma kam malele na Yesus ninr Ray Silai,
ma kam to morip a mlarat safe ma kam msalan.
8 Iane nwayat ma dalmyamar dedesar ma ramkoran.
Ma nlengan nof a ne kam mpeang ma mat nema morip mor ninr Mangnrur Silai na surga.
9 Mpa kam mareke desar ma mafsenange Ratu dalamy boloka lolone morip a na saryamprene nre noak ma morip mor I a na surga.
10 Fali keta nait ni tewat e,
ka tamin ninr Ray Silai sounlury nema I ntetak tomwatar na saryamprene ye nir ngriar.
Ma keta I nbalas ber tomwatar monuk nlarat safe ma sir rose na nir momorip boloka rose yatak nre ngamone.*
Tomwatar bise rangamon a rbali ror Ratu nof ma dalmir lese ror ninr Ray Silai
5:11-21
11 Wangur,
kam mamtaut ma mose kabanir ma Ratu to nmpeang fali kit tafai lo feti to dodo a nbal e,
ntetak tomwatar monuk nir ngriar.
Mpa kam mareke ma mose safe-safe motak nema tomwatar ralele ninr Mangnrur Silai.
Ratu nafai dalmyamar mpa yakw kulele feti kmi a nbal e,
mifai dalmyamar.
12 Kam mfalak farane iane to feti kam mpeang ma mdangin kam,
nempa mpeang ma kmi mdyangin kam.
Ma kam mfalak farane nema kmi mifai ma mbyali tomwatar ma rfasale kam a ne.
Sir a ne ma rafdas sir na safe-safe ma tomwatar rsalan na tenir burit,
nempa to rsalan safe-safe ma namin dalmir.
13 Ma farlan tomwatar rdaun feti kam mafwibar Ibar Ngamone ne kam mfukat,
iane to sasaf,
fali kam mlarat Ratu Ni mpempeang.
Nempa farlan tomwatar rdaun feti kam to mfukat iane nangafel,
fali iane la mtulung a kmi ma mtyafal ma milele Yesus.
14 Fali ninr Ray Silai Ni ankamis ma nkuase mamy momorip mpa kam bise ma mose kabanir a ne.
Ma kam malele feti farlan I nmat ma nlitan tomwatar monuk nir salar,
iane feleles farlan ninr momorip wangim ne rmat lo.
15 Ma ninr Ray Silai nmat la nlitan tomwatar monuk,
nema na ninr momorip e,
to tdaun lan teninrar.
Nempa ka tmorip e tafsenange ninr Ray Silai.
I a ne ma nmat ma nmorip a nbali ber kit.
16 Iane nwayat ma lere ye kam to msalan tomwatar rof nir ngamone ma yatak rof kabanir ma sir rose na tenir burit.
Botuan feti luryain e,
kam msalan ninr Ray Silai mlarat tomwatar ma to ralele Ratu ne nir andanwar,
nempa lere ye to mose farane lo.
17 Fali tomwate ma dalam lese nor ninr Ray Silai,
Ratu nafbweberi ni momorip lo.
Ma ni momorip wangim nlai lo ma lere ye i nmorip a na momorip beberi.
18 Ratu koko I ma nafbweberi tomwatar nir momorip.
Ma nof ninr Ray Silai Ni mamate,
Ratu nose ma kit tangamon a tbali tor I.
Ma I nsiduk kam a nbal ma mafwibar Ibar Ngamone ber tomwatar nema rangamon a rbali ror I.
19 Safe ma kam mfalak a ne isiny farye:
Ratu nose ma tomwatar monuk rangamon a rbali ror I nof safe ma ninr Ray Silai nose.
Farlan sir rangamon a rbali ror Ratu keta to nanremi nir salar lo.
Ma I nsiduk kam lo ma mafwibar ber tomwatar nema rangamon a rbali ror I.
20 Kam ye ninr Ray Silai Ni mangsiduk.
I nal kuase ber kam la msurat a kmi.
Mpa kam mtak desar mor ninr Ray Silai ngarany ma mlyarat motak ma mingamon a mbyali myor Ratu,
fali nmpeang ma mingamon a mbyali myor I.
21 Yesus ninr Ray Silai ne to Ni sal,
nempa Ratu nose ma I nabare kit monuk ninr salar.
Ratu nose farane nema bise ma tangamon a tbali tor I fali dalminrar lese tor ninr Ray Silai lo.