Ibar Ngamone ne farlan kabanir ma kotkir ma rnau na ngusi dalam
4:1-15
1 Wangur,
fali Ratu Ni dalam ngamone mpa I nal karyae ye ber kam.
Iane nwayat ma to msue kam ma mafwibar Ni Yoyoding Beberi ne ber tomwatar.
2 Ma kam mtetak lo ma to mose kabanir ma tomwatar rose ramudim la rafmweat kit a ne.
Kam to mlepusuk,
to mfule Ratu Ni ngribatnir,
ma noak ma mfalyole kabain botunar e,
to mamudim sasaf.
Kam mose farane nema tomwatar monuk rafai feti safe ma kam mafwibar a ne botuan ma Ratu nafai dalmyamar.
3 Tomwatar ketnir to rkaul ral Ibar Ngamone ma kam mafwibar a ne.
Sir ma to rkaul ral a ne lan tomwatar ma keta Ratu nukun sir ma rmat dedesar.
Sir a ne ma kabanir sa lolone nose nteri nir andanwar nwayat ma to ralele safe ma kam mafwibar a ne.
4 Sir to ralele safe ma kam mafwibar a ne,
fali smwangat yatkar nir ulun ma nkuase saryamprene ye,
nose ma nir andanwar a ratngup.
I nose farane nema to rkaul ral Ibar Ngamone ni kuase.
Iane nwayat ma sir to rafai ninr Ray Silai Ni kuase ma feleles farlan Ratu.*
5 Kam to mafwibar ibar na kam,
nempa mafwibar ibar na Yesus.
Yesus ye ninr Ray Silai ma neluk Mangnrure ber tomwatar monuk.
Ma kam mlarat Ni mpempeang ma meluk mangkaryae ma ber a kmi.
6 Ratu nfalak na Kitap Lelerap dalam,
“Yakw kose ma Ningw snyain idak na makrokap dalam.”
Ma Ratu nose nbal ma Ni snyain a ne nodir dalminrar.
I nose farane,
la nbanril ninr andanwar nema bise ma tkaul tal Ratu Ni kuase ma nlie nlengan a ne.
Kit bise ma tsalan Ratu Ni kuase ma nlie nlengan a ne tof safe ma Yesus ninr Ray Silai nfatutu ber kit.*
7 Ibar Ngamone ma kam mafwibar a ne farlan kabanir ma kotkir desar.
Nempa kabanir ma kotkir desar a ne rnau na ngusi ma rose rof ompak.
Ma kam ye tomwat biase motak farlan ngusi ne.
I nose farane nema tomwatar monuk rsalan desar feti kuase ma nlie nlengan ma mpaki na mamy karyayar a ne,
iane nof Ratu ma to nof kam.
8 Boloka tomwatar rtean kam ror matan ribun nempa kabanir a ne to rfarangal kam na mamy karyayar.
Ma far mpene ne ye kam to mafai feti mose safe nempa to msue kam.
9 Tomwatar rsil a rbabal kam nempa Ratu to nsalan lonri kam.
Ma boloka tomwatar rbabal rafyatak kam nempa kam to mat.
10 Kam mti mpenempen motak e,
tomwatar dedesar ma rose ma rfen kam.
Iane farlan ma luryain e,
tomwatar rose ma rfen Yesus.
Ma iane diat kam nema tomwatar bise ma rsalan Yesus ma nmorip ma dedesar e,
ntulung kam a ne.
11 Na kam mamy momorip e,
tomwatar rose ma rfen kam dedesar fali mkarya ber Yesus.
Iane diat kam nema tomwatar bise ma rsalan Yesus Ni momorip na tenmyamar ma keta rmat ye.
12 Mpa boloka tomwatar rose ma rfen kam dedesar,
iane to sasaf fali safe ma kam mkaryae ne nose ma kmi myonri momorip dedesar.
13 Na Kitap Lelerap dalam rarengi farye,
“Yakw kulele Ratu mpa keta kfwalak ber tomwatar feti safe ma kulele I.”*
Iane farlan kam a nbal.
Kam malele Ratu,
mpa keta mfalak ber tomwatar feti safe nwayat ma malele I.
14 Kam mfalak farane fali mafai feti Ratu nafmorip a nbali Yesus ninr Mangnrure ne.
Ma keta I nafmorip kam a nbal fali dalminrar lese tor Yesus lo.
Ma keta Ratu nafburat kam a ma kmi,
nema taktem a tamdir a na I sounlury.
15 Susar monuk ma kam mkoman a ne,
iane fen mir ngamone.
Ma iane diat kam nema Ratu nfatutu Ni dalamy ngamone ber tomwatar yadin.
Ma iane nwayat ma tomwatar ma rose alang ma rdangin I a ne rtafal ma yadin a nbal.
Noak ma tkoman suse ka dedesar ma tamkoran ma talele Ratu
4:16-18
16 Wangur,
iane nwayat ma to msue kam na mamy karyayar.
Boloka nti a nti e,
tenmyamar rtafal ma rmafun,
nempa lerar mpane e,
dalmyamar rtafal ma ramkoran.
17 Boloka lere ye kam mkoman suse ma maberat nempa keta to dodo.
Ma kam mdaun feti susar ma kam mkoman a ne biase motak fali malele feti keta monri dadangin ma nlie nlengan ma to terik.
Dadangin ma keta monri ne nlie nlengan nof susar monuk ma kam mkoman a ne.
18 Kam to mdaun susar monuk ma tomwatar bise ma rsalan a ne,
nempa mdaun lan kabanir ma to rsalan.
Fali safe ma tomwatar rsalan a ne keta to dodo,
nempa safe ma to rsalan a ne keta ramin dedesar,
iane kabain ngamonar na surga.