Ratu nafbweberi safe ma nyoding ber Ni tomwatar
3:1-6
1 Wangur,
nre kete mdyaun feti kam mfalak farane,
iane feti kam mose ma mafdas kam a nbal.
Kam to mperlu ma monr surtar sa nof tomwat walyetar ma rdangin kam ber a kmi nema mlyangun kam.
Ma kam to mperlu a nbal ma monr surtar sa nof a kmi noak ma mti mpenempen.
Tomwat walyetar biase ma rose farane nempa kam e tate.
2 Ni botuan e,
kmi a ne farlan surat ma rarengi la rdangin mamy karyayar ber Ratu.
Ma surat a ne Ratu Smwangtany narengi na dalmyamar.
Mpa noak ma mti mpenempen motak e,
tomwatar monuk rafai feti kmi mlyangun Ibar Ngamone ma kam mafwibar a ne.
3 *Tomwatar bise ma rsalan desar feti Yesus ninr Ray Silai nkarya na dalmir,
ma iane nfatutu nbal feti Ratu ma nsiduk kam ma mafwibar Ni ngribatnir ber a kmi.
Mpa mir momorip a ne farlan surat ma nof ninr Ray Silai.
I narengi surat a ne nor Ratu ma nmorip dedesar a ne Ni Smwangtany ma to narengi nor tinta.
Ma I narengi surat a ne na tomwatar dalmir ma to narengi na bati das (farlan tetetkar ma luryain e Ratu nal ber Musa.)
4 Kam mbaran ma mfalak na mamy karya ngamonar ber a kmi a ne fali dalmyamar lese mor ninr Ray Silai mpa mamkoran ma malele Ratu.
5 Kam to mfalak feti bise ma mkaryae karyayar a ne mor mamy fakoran.
Nempa lan Ratu ma nal fakoran ma mkaryae karyayar a ne.
6 I nose nbal ma bomyamar mal ma meluk Ni mangkaryae ma mafbotin Ni Yoyoding Beberi ma I nose ber tomwatar.
Ratu Ni Yoyoding Beberi ne to rarengi farlan tetetkar ma nal ber Musa.
Yoyoding Beberi ne,
iane feti Ratu Smwangtany nal momorip beberi ber kit.
Fali luryain e,
ka tose tlarat monuk tetetkar ma Ratu nal ber Musa,
ma farlan kit to tose farane e,
tmat.
Nempa lere ye tlarat Yoyoding Beberi ma I nose ber tomwatar mpa Ni Smwangtany a ne nose ma tmorip dedesar.*
Ratu Ni Yoyoding Beberi ma nose ber kit nangafel a nlengan nof Ni Yoyoding Wangim ma nose ber Musa
3:7-18
7 Tetetkar ma luryain e Ratu nal ber Musa ne rarengi na baty dasyar.
Ma farlan tomwatar to rose rlarat tetetkar a ne keta rmat.
Noak ma Ratu nal tetetkar a ne ber Musa,
I nfatutu Ni kuase ber Musa nwayat ma souny idak resi mpa tomwat Israelar to bise ma rsalan i.
Nempa nti a nti e,
snyain a ne nlai nof souny.*
8 Tetetkar ma nose ma tomwatar rmat motak e,
Ratu nfatutu Ni snyain ma idak resi.
Ma Ratu Ni Yoyoding Beberi ma Ratu Smwangtany nal ber kit a ne keta I nfatutu Ni kuase ma snyain ma idak nlengan nof a ne nbal.
9 Tetetkar ma Ratu nal ber Musa luryain a ne nose ma Ratu nukun tomwatar.
Noak ma Ratu nal tetetkar a ne,
nfatutu Ni snyain ma idak resi.
Ma Ni Yoyoding Beberi ma nose ma tomwatar rangamon a rbali ror I e,
keta ni snyain idak nlengan nof a ne nbal.
10 Noak ma Ratu nal tetetkar ber Musa luryain a ne I nal nor Ni kuase.
Nempa farlan tal la tpasal tor Ratu Ni Yoyoding Beberi ma nose ber tomwatar lere ye,
ni botuan e,
tetetkar a ne to ni kuase lo,
fali Ratu nose Ni Yoyoding Beberi ne nor Ni kuase ma nlie nlengan.
11 Tetetkar ma Ratu nal ber Musa ne nti a nti e,
ni kuase nlai lo.
Nempa Ratu Ni Yoyoding Beberi ne ni kuase nlie nlengan ma idak dedesar.
12 Kam malele feti Ratu Ni Yoyoding Beberi ne nangafel a nlengan nof tetetkar ma nal ber Musa,
mpa mbaran ma mafwibar Ratu Ni Yoyoding Beberi ne ber tomwatar.
13 Kam to ma mudim sasaf mbalak Musa.
Musa nteri souny nor maloli nema tomwat Israelar kete rsalan Ratu Ni snyain na souny ma nti a nti e nlai ne.*
14 Tomwat Israelar nir andanwar ratngup a nbal terik lere ye fali kabar sa ma lolone nose nteri nir andanwar.
Ma noak ma rbaca Ratu Ni Yoyoding Wangim a ne sir to rkaul ral.
Lan ninr Ray Silai ma nose ma rkaul ral.
Mpa farlan dalmir lese ror I,
keta kabar sa ma nose nteri nir andanwar a ne nlai,
nwayat ma rkaul ral.
15 Ma terik lere ye nbal kabar sa ne lolone nose nteri nir andanwar mpa noak ma rbaca Musa ni kitpar a ne to rkaul ral.
16 Nempa farlan tomwatar sa ntate ni salar ma nbali i ber Ratu ninr Mangnrure e,
keta kabar sa ma nose nteri ni andaun a ne nbie nof ia*.
17 Ninr Mangnrur Silai ye iane Ratu Smwangtany.
Ma farlan to sasaf ma rkuase kit,
keta to tperlu ma tose tlarat Musa ni tetetkar a ne lo nema Ratu nfair kit.
18 Kit monuk ma talele ninr Mangnrur Silai ne,
to sasaf ma rose rteri ninr andanwar lo.
Mpa tomwat walyetar bise ma rsalan ninr Mangnrur Silai Ni kuase ma nlie nlengan na ninr momorip.
Kit farlan totote,
ma nfatutu ninr Mangnrur Silai Ni kuase ma nlie nlengan a ne.
Ma ninr Mangnrur Silai ne iane Ratu Smwangtany ma nkarya na dalminrar.
I dedesar ma nose ma ninr momorip tbalak I,
nema nti a nti e,
kit feleles farlan I a nbal ma Ni kuase nlie nlengan.