Mpa yakw ktwetak ma to ktwi kukmat a kmi noak a ne,
fali to kmpweang ma liringw mengarat a kmi ma kose ma dalmir suse nbal.
2 Farlan kose ma dalmir suse e,
ise nbal ma keta nafsenange dalangw?
Keta to kekes.
Fali lan kmi ma kose suse kmi a ne ma myose ma dalangw a nsenang.
3 Iane nwayat ma noak a ne yakw kurengi surtar sa la myurus ngrie ne fuky.
Yakw kurengi surat a ne nema noak ma ktwi kukmat a kmi e,
kete myose ma dalangw suse myor kabain yatkar ma kmi myose ne.
Fali ni botuan e,
kmi a ne ma ka myose ma dalangw a nsenang.
Ma kulele feti farlan yakw kswenang e,
kmi monuk a msyenang a nbal.
4 Noak ma yakw kurengi surat a ne ber a kmi e,
dalangw suse ma loloi desar ma dedesar ma ktwasing.
Yakw kose farane to feti kmpweang ma dalmir suse,
nempa kmpweang ma mifai feti yakw kwamis desar a kmi.
Paulus ntak soranyar na Korintus ma ka rlure tomwate ma nose sale
2:5-11
5 Wangur,
minremi tomwate ma kfwalak na ningw surat noak a ne,
botuan feti i nose sale lo.
Ma i to nose ma koko yakw dalangw suse,
nempa kmi monuk a nbal.
(Farlan to monuk-monuk a kmi e,
botuan feti i nose ma ketnir nof a kmi a ne dalmir suse lo nre!
Yakw kfwalak farye nema kete kutafal ngribatnir na safe ma tomwate ne nose lo.)
6 Ma tomwatar yadin nof a kmi ye ma mtyetak tomwate ne ni ngrie la myukun i,
mpa iane dengan lo.
7 Mpa lere ye ka mlyure ni salar a ne ma mifkoran dalamy.
Kmi myose farane nema kete dalam ntafal ma suse nwayat ma to nalele Ratu lo.
8 Mpa yakw ktwak ma ka mfyatutu mbyali feti mkyamis desar i.
9 Ma yakw kurengi surat a ne ber a kmi nema bise ma kswalan feti myose mlyarat safe ma kuftutu ber a kmi a ne nre tate.
10 Farlan kmi mlyure tomwate ma nose sale ber a kmi,
keta yakw klwure i a nbal.
Farlan botuan feti tomwate ne nose sale ber yakw keta klwure i.
Ma ninr Ray Silai nafai dalangw feti klwure i lo,
ma iane fen mir ngamone.
11 Yakw kfwalak ma ka mlyure tomwate ne nema to let ber smwangat yatkar nir ulun ma nfule kit,
fali kit tafai feti nmpeang lan ma nose kabain yatkar.
Paulus dalamy to ntai na kote Troas
2:12-13
12 Yakw ktwi kote Troas ma kufwibar Ibar Ngamone na ninr Ray Silai.
Noak ma kwait kote Troas a ne ninr Mangnrur Silai nal dalamten ngamone ma ber yakw lo.
Ma iane let ber yakw ma kufwibar Ibar Ngamone ne.*
13 Nempa dalangw to ntai fali to kutungan kor waninrar Titus.
Mpa ktwul tomwatar na iane ma ktwi Makedonia.
Ratu nfil Paulus ma nafwibar Ibar Ngamone
2:14-17
14 Boloka farane yakw kose alang ber Ratu ma dedesar ma nrure kam ma nose ma kam bise ma mafufu ninr muswar.
Ratu nose farane fali dalmyamar lese mor ninr Ray Silai.
Luryain a ne kam meluk Ratu Ni muswar nempa lere ye I nsiduk kam ma mafwibar Ibar Ngamone ne na mpenempen.
Ma Ibar Ngamone ma mafwibar a ne farlan angat ngafele ma tomwatar bise rangat angtany a ne.
15-16 Ratu nsiduk kam ma mafwibar Ibar Ngamone na ninr Ray Silai ber tomwatar monuk,
mpa na Ratu sounlury e kam ye farlan natan ma rapu ma tomwatar monuk bise ma rangat ni angat ngafele ne.
Ma ber tomwatar ma Ratu nfair sir,
safe ma kam mafwibar a ne farlan angat ngafele,
fali mafwibar ber sir feti bise ronri momorip dedesar.
Nempa ber tomwatar ma Ratu nukun sir,
safe ma kam mafwibar a ne farlan kabanir sa ma mpusuk desar,
fali mafwibar ber sir feti Ratu keta nukun sir ma rmat dedesar.
Ise ma boany nal ma nkaryae karyayar a ne nor koko i ni fakoran?
Keta to fen lese nbal.
17 Kam to mbalak tomwat ngayadin a ne ma rafwibar Ibar Ngamone la manriak doit.
Nempa kam mafwibar Ibar Ngamone mor dalmyamar lelerap.
Ratu nsiduk kam ma meluk ninr Ray Silai Ni mangkaryayar.
Ma I nafai feti kam mfalak lan kabain botunar.