Paulus ni surat kedua ber soranyar na
Korintus
Salam
1:1-2
1 Ye surat nof yakw Paulus ma waninrar Timotius ma taktem a talele Yesus.
Yakw kweluk Yesus ninr Ray Silai Ni mangsiduk klwarat Ratu Ni mpempeang.
Yakw kurengi surat ye ber soranyar na kote Korintusa ma ber tomwatar monuk ma ralele Yesus na propinsi Akhaya.*
2 Yakw ktwak ma weni Amninrar Ratu ma Yesus ninr Ray Silai ma neluk ninr Mangnrure ne rfatutu Nir dalam ngamone ma ral maline ber a kmi.
Paulus nose terima kasih ber Ratu
1:3-11
3 Wangur,
mya ma tdangin Ratu.
Ratu ye Yesus ninr Ray Silai ma neluk ninr Mangnrure ne Amany.
I ye Amninrar ma nlompang resi kit ma dedesar ma nafkoran tomwatar ma ramin suse dalam.
4 I ye ma nafkoran kam na mamy susar felnir mpane.
I nose farane nema noak ma tomwat walyetar ramin susar mpane,
kam bise ma mafkoran sir a nbal nor fakoran ma Ratu nal ber kam.
5 Kam mkoman susar yadin lo,
farlan susar ma Yesus ninr Ray Silai nkoman a ne.
Nempa Ratu dedesar ma nafkoran kam,
fali dalmyamar lese mor ninr Ray Silai.
6 Farlan kam mkoman suse iane nose ma mimkoran ma bise nose ma mir momorip nangafel.
Ma Ratu nafkoran kam nema kam bise ma mafkoran kmi a nbal.
Iane nwayat ma msyabar ma mkyoman suse ma bomir myal ma mibare mir suse ne.
Ma susar ma kmi mkyoman a ne feleles farlan susar ma kam mkoman a nbal.
7 Ma kam malele feti kmi mimkoran ma milele Ratu.
Fali kam mafai feti kmi mkyoman suse farlan kam,
ma keta Ratu nafkoran kmi a nbal farlan ma nafkoran kam.
8 Wangur,
kam mfalak farane nema kmi mifai suse ma kam mkoman na propinsi Asia ye.
Suse ma kam mkoman a ne maberat desar ma to mabare mal,
nwayat ma to mdaun sasaf lo ma mdaun lan feti keta mat.*
9 Kam mrase desar feti to dodo a nbal e,
myal tetetak mamate ber kam lo.
Iane diat kam nema kete malele mamy fakoran nempa malele lan Ratu ma nafmorip a nbali mangmwatar.
10 Boloka kam mkoman suse maberat desarb ma nwayat ma ketla mat,
nempa Ratu nalin kam a mbie mof susar a ne.
Ma kam mtikloi ma malele feti keta nalin kam a nbal na lere ma nma ne.
11 Ma kmi a nbal e msyampayang ber kam,
mpa Ratu ntulung kam ma nalin kam a nbie nof mamy susar.
I nose farane fali ndengar mir sampangar a ne.
Iane nwayat ma keta tomwatar yadin rdangin Ratu fali Ni dalam ngamone ma nfatutu ber kam a ne.
Paulus nfalyole feti safe nwayat ma to nti Korintus
1:12-24
12 Wangur,
kam mafai feti safe-safe monuk ma kam mose ber tomwatar na saryamprene ye,
kam mose mor dalmyamar lelerap ma mamlonry.
Ma nlengan a nbal e,
safe ma kam mose ber a kmi noak ma taktem a ne,
nwayat ma dalmyamar rsenang resi.
Ma kam bise ma mose kabanir monuk a ne fali Ratu nfatutu Ni dalamy ngamone ber kam,
ma to nof tomwatar nir andanwar.
13-14 Kam to mamudim sasaf na mamy surat dalam ma marengi ber a kmi a ne.
Mpa kmi bise ma mbyaca ma mkyaul myal.
Botuan feti lere ye kmi to mkyaul myal kabanir monuk ma kurengi ne,
nempa kulele feti keta bise ma mkyaul myal monuk.
Yakw kulele ma kmi myose farane nema na lere ma Yesus ninr Mangnrure nma nbali saryamprene,
keta kmi mdyangin kam na safe-safe ma kam mose ber a kmi a ne,
farlan ma kam mdangin a kmi a nbal.
15 Yakw kufai botuan feti kmi msyenang myor yakw.
Iane nwayat ma luryain e,
yakw kose ma ktwi kswalan a kmi fen lain du nema myonri berkat fen lain du a nbal.
16 Yakw kose ma ktwi Makedonia nempa keta kwelat ma kswalan a kmi a fuky.
Ma noak ma kbwali yakw e,
keta kwelat ma kswalan a kmi a nbal,
nema bise ma mtyulung ningw perluar na ningw mpampane far propinsi Yudea.*
17 Botuan feti luryain e,
yakw kmpweang ma ktwi kswalan a kmi,
nempa to ktwi.
Ma yakw to ktwi kswalan a kmi a mpa,
nre kete mdyaun feti ningw andaun to ntai,
ma kose safe-safe klwarat ningw mpempeang motak.
Ma mdyaun feti yakw ye farlan tomwatar ma far dodo e rfalak feti rti,
ma far dodo e,
rfalak feti to rti.
18 Ratu dedesar ma nose nlarat safe ma nfalak.
Ma I nafai dalangw feti safe ma kfwalak ber a kmi a ne botuan ma to far tomwatar ma nir andanwar far dol far da.
19 *Yakw kfwalak farane fali Yesus ninr Ray Silai ma neluk Ratu Anaky a ne to far tomwatar ma nir andanwar far dol far da.
Mpa I keta nafdiat safe ma nfalak.
Ma kmi mdyengar ibar na I lo nof yakw,
Silas,
ma Timotius.
20 Ratu nafdiat safe-safe monuk ma nyoding ber kit a ne fali safe ma Yesus ninr Ray Silai nose ber kit lo.
Iane nwayat ma bise ma tfalak,
“Amen” la tdangin Ratu.
21 Lan Ratu ma nose ma kit monuk dedesar ma tamkoran ma talele Yesus ninr Ray Silai.
Ma I a nbal nfil a nkese kit ma teluk Ni tomwatar.
22 Ma Ratu nal Smwangtany ber kit la nfatutu feti Ni tomwatar ber kit.
Ma Ni Smwangtany ma nal ber kit a ne nose ma kit tafai feti keta tonri monuk safe ma Ratu nyoding ber kit.
23 Ratu nafai dalangw,
mpa farlan yakw klwepusuk e,
ka weni Ratu nukun yakw.
Ma farlan to ktwi kswalan kmi a na Korintus noak a ne iane nangafel fali to kmpweang ma liringw mengarat a kmi nwayat ma dalmir suse.
24 Yakw kfwalak farye iane to feti kam mpeang ma mfarete kmi farlan bos.
Kam to mpeang ma mfarete kmi fali malele feti mimkoran desar ma milele ninr Ray Silai lo.
Ni botuan e,
kam mpeang ma dalminrar lese ma mkarya mor a kmi,
ma mose ma dalmir a rsenang.