(4:1-7)
1-2 Wangur,
mdyengar ma kfwalak contoh sa nbal farye:
Farlan kanak merwanar sa,
ma amany nal kuase ma nonri nir kabanir monuk,
keta to bise ma nonri kabanir a ne fuky fali lolone marumat i.
Mpa tomwatar sa najake i ma nurus kabanir a ne terik ni tewat ma nonri kabanir a ne.
Boloka kanak a ne keta nkuase kabanir monuk a ne nempa lere ye i farlan kawar ma to ni kuase sasaf na kabanir a ne.
3 Farlan kit a nbal:
Noak ma kit to talele Yesus ninr Ray Silai fuky e,
kit farlan kanak a ne.
Ma tlarat desar yayatur saryamprenar farlan kawar ma nlarat ni bos.
4 Nempa keta nait ni tewat e,
Ratu nsiduk Anaky ma nma saryamprene.
Kanak ye ma bat sa namtoranbabe I ma keta nlarat desar Yahudyar nir yayatrwar.
5 Ratu nsiduk Anaky a ne ma nalin tomwatar ma Yahudyar nir yayatrwar rkete sir a ne nema kit monuk bise ma teluk Ratu angkir.
6 Ma kit teluk angkir lo mpa nal Anaky Smwangtany ma nkarya na dalminrar nwayat ma kit bise ma tar Ratu feti,
“Amo,
O Amo!”
7 Mpe kit to teluk kawar lo nempa teluk Ratu angkir.
Mpa keta kit tonri nbal safe-safe ma I nau ber angkir a ne.
Paulus dalamy suse na tomwat Galatiar
4:8-20
8 Wangur,
luryain e kmi to milele Ratu fuky mpa mlyarat desar smwangtar ma mdyaun feti sir a ne ratu safo tate.
9 Ma lere ye kmi mifai Ratu nempa ni botuan e,
Ratu nafai kmi lo.
Ma safema mbyali kmi ber smwangat saryamprenar ma to ubnir sasaf ma to rose ral sasaf a ne?
Ma safema mlyarat desar sir?
10 Kmi myose bulan beberi,
mios festa na let isnir,
ma myose ler silai walyetar a nbal.
Safe desar ma mlyarat Yahudyar nir yayatrwar a ne?
11 Mpa yakw dalangw suse feti keta Ibar Ngamone ma kuftutu ber a kmi a ne nti letkape motak.
12 Soranyar!
Boloka tomwat Yahudi yakw,
nempa kmworip farlan kmi,
ma to kose klwarat agame ni yayatrwar.
Mpa yakw ktwak desar kof a kmi ma ka myose mbyalak yakw,
ma mtyate monuk yayatrwar a ne.
Ma luryain a ne dedesar ma myose ngamone yakw.
13 Kmi lolone minremi nre!
Yakw bise ma kufwibar Ibar Ngamone ber a kmi noak a ne fali kufanas.
14 Boloka ningw maninik a ne nose suse kmi nempa to mimkin ma to miliu yakw.
Ma kmi mlyangun yakw farlan ma mlyangun Ratu Ni malaektar sa ma nlengan a nbal e,
kmi mlyangun yakw farlan ma mlyangun Yesus ninr Ray Silai.
15 Yakw kswalan desar feti noak a ne kmi msyenang resi,
ma farlan bise e,
myal matmir ber yakw.
Nempa lere ye safema to msyenang lo.
16 Nre kete kfwalak kabain botunar ber a kmi,
mpa lere ye mbyangal yakw lo.
17 Tomwat walyetar ma rafwibar anftutw lepuskwar ma ber a kmi a ne rareke desar ma rabut a kmi nempa dalmir to ranglerap.
Sir rose farane la rakese kit nema mlyarat desar sir.
18 Botuan feti farlan tomwatar rngabo ma rabut a kmi na kabain ngamonar,
iane nangafel.
Nempa ka dedesar ma rose farane ror dalmir kateman,
boloka kumin nre to kumin.
19 Wangur ma kwamis a kmi,
yakw kal a kmi a kweluk angkur.
Safe ma kmi myose ye nwayat ma yakw kwoman suse farlan bate ma namtoranbab.
Ma keta kwoman suse ne dedesar terik ma mir wewelmpampane mbyalak Yesus ninr Ray Silai.
20 Yakw kmpweang desar ma lere ye kor a kmi,
nema kete liringw mengarat a kmi,
fali to kufai ma kutanuk lo.
Ansaur na Hagar ma Sara
4:21-31
21 Wangur,
kmi ma mpyeang ma myorip a mlyarat tetetkar ma Ratu nal ber Musa ne,
no mfyalak,
kmi mkyaul myal safe ma rarengi na tetetkar a ne nre tate?
22 Na tetetkar ma Ratu nal ber Musa ne rarengi feti Abraham anaky merwanar du.
Sa e,
enany ma nmpan kawar,
ma sa e,
enany to nmpan kawar ber kekes.
23 Kanak ma enany nmpan kawar a ne,
ramtoranbabe i a rlarat tomwatar nir mpempeang.
Nempa kanak ma enany to nmpan kawar ber kekes a ne,
ramtoranbabe i a rlarat Ratu Ni mpempeang far ma I nyoding.
24-25 Batar du ye farlan ma Ratu nose Ni yoyoding du.
Nof yoyoding du a ne,
sa e Ratu nose na bubuar Sinai na nus Arab.
Iane ain ma Ratu nal tetetkar ber Musa.
Mpa tomwatar monuk ma tetetkar lolone rkete sir a ne,
sir farlan Hagar ni dasdalam ma rmpan kawar.
Sir ye ma rfatutu nbal kote Yerusalem lere ye fali tomwatar ma ramin a ne rlarat dedesar tetetkar farlan ma rakawar sir.
26 Nempa Sara ye nfatutu Yerusalem na surga.
I to nakawar ber kekes ma i farlan ene ber kit monuk ma to tlarat tetetkar a ne,
fali talele Yesus ninr Ray Silai.
27 Fali rarengi na Kitap Lelerap dalam feti,
“Ngamone desar ber bate ma nmakw ma to anaky
Ma bate ma to namtoranbab ma to nkoman maninik e,
ka nsenang resi ma nampumpuki i!
Fali bate ma sawany ntate i keta angkir yadin
nlengan nof bate ma sawany namin.”
28 Soranyar!
Kmi myeluk Ratu angkir fali I nose nlarat Ni yoyoding a ne.
Kmi ye feleles farlan Ishak ma ramtoranbabe i fali Ratu nose nlarat Ni yoyoding ber Abraham.
29 Noak a ne kanak ma ramtoranbabe i a rlarat tomwatar nir mpempeang a ne,
nsiksa kanak ma ramtoranbabe i a rlarat Ratu Smwangtany Ni mpempeang.
Iane feleles farlan lere ye nbal.
Tomwatar ma rmorip a rlarat tetetkar ma Ratu nal ber Musa ne rsiksa tomwatar ma ralele Yesus ninr Ray Silai.
30 Nempa rarengi na Kitap Lelerap dalam feti,
“Ka ratian bat kawar a ne nor anaky,
fali kanak a ne keta to nonri amany ni kabanir fen lese nbal.
Lan kanak ma enany to nmpan kawar a ne ma nonri monuk kabanir a ne.”
31 Mpa soranyar,
kit ye to teluk bate ma nmpan kawar a ne angkir,
nempa teluk bate ma to nmpan kawar ber kekes a ne angkir.
Fali to tlarat tetetkar ma Ratu nal ber Musa ne lo nempa talele Yesus ninr Ray Silai.