Ka tlarat tetetkar ma luryain Ratu nal ber Musa nre talele Yesus ninr Ray Silai?
3:1-5
1 Hei tomwat Galatiar a kmi,
mir mode desar ye!
Ise nfule kmi mampe to mlyarat anftutw botunar ye lo?
Yakw kfwalyole desar ber a kmi lo nre,
feti safema Yesus ninr Ray Silai nmat na katutun sangwalu!
2 No mfyalak:
Ratu nal Smwangtany ber a kmi a ne fali safe?
Fali mifmpwane tetetkar ma Ratu nal ber Musa nre mdyengar Ibar Ngamone ma milele Yesus ninr Ray Silai?
3 Safema mir mode desar ye!
Noak ma betno milele Yesus ninr Ray Silai e,
kmi myorip a na momorip beberi ma mlyarat Ratu Smwangtany Ni mpempeang,
nempa lere ye myose mlyarat lan mir andanwar ma mifmpwane tetetkar a ne nbal,
nema Ratu nafdiat a kmi.
4 Kmi mkyoman susar yadin fali milele Yesus ninr Ray Silai lo.
Mpa keta mir susar monuk ne nti letkape motak e?
Tate nre!
5 No mdyaun,
Ratu nal Smwangtany ma nose kabain mpasalnar ber a kmi a ne fali safe?
Fali mdyengar Ibar Ngamone ma milele Yesus ninr Ray Silai nre mifmpwane tetetkar ma Ratu nal ber Musa?
Ratu nafdiat Abraham fali namkoran ma nalele Ratu
3:6-14
6 Wangur,
no msyalan amninrar Abraham.
Na Kitap Lelerap dalam rarengi farye,
“Abraham nalele Ratu,
nwayat ma Ratu nlangun ma nafdiat i.”*
7 Mpa ka mifai feti tomwatar ma ralele botuan Ratu,
sir a ne Abraham ni dasdalam.
8 Luryain e,
Ratu nfalak na Kitap Lelerap dalam feti farlan tomwatar ma to Yahudi sir a ne ralele Ratu keta nlangun ma nafdiat sir.
Ma Ibar Ngamone ne Ratu nafbotin baluan ber Abraham farye,
“Yakw keta kbwerkat nusar monuk kulyole nim momorip.”
9 Abraham nalele Ratu mpa Ratu nberkat i.
Iane nwayat ma Ratu nberkat tomwatar ma ralele I feleles farlan ma nberkat Abraham.
10 Rarengi na Kitap Lelerap dalam farye:
“Tomwatar ma to rose rlarat monuk tetetkar ma Ratu nal ber Musa,
keta Ratu nukun sir.”
Mpa tomwatar ma rareke ma Ratu nafdiat sir rof ma rafmpwane tetetkar ma Ratu nal ber Musa,
keta Ratu nukun sir,
fali to tomwate fen lese bise ma nlarat monuk tetetkar a ne.
11 Ni botuan e,
to tomwate fen lese ma Ratu nafdiat i nof ma nafmpwane tetetkar ma Ratu nal ber Musa.
Fali na Kitap Lelerap dalam rarengi feti,
“Tomwatar ma rmorip e rafsenange dalangw,
sir keta dedesar ma rmorip fali ralele Yakw.”
12 Tomwate ma nalele Ratu to feleles nor tomwate ma nlarat tetetkar ma Ratu nal ber Musa,
ma to bise ma nonri momorip dedesar.
Fali rarengi na Kitap Lelerap dalam feti,
“Tomwate ma nafmpwane agame ni yayatrwar keta nmorip a nlarat yayatrwar a ne.”
13 Ni botuan e,
to fen lese nbal ma bise nafmpwane monuk agame ni yayatrwar a ne,
mpa keta Ratu nukun kit monuk.
Nempa Yesus ninr Ray Silai nanrenre I ma ntikloi na katutun sangwalu la ntebus kit nema Ratu to nukun kit.
Fali rarengi na Kitap Lelerap dalam feti,
“Tomwate ma ntikloi na katutun sangwalu,
iane feti Ratu nukun i.”
14 Yesus ninr Ray Silai nose farane nema Ratu nal berkat ber tomwatar ma to Yahudi sir a nbal far ma nyoding ber Abraham a ne.
Luryain e,
Ratu nyoding feti keta nal Smwangtany ber tomwatar ma ralele I a ne,
nwayat ma kit ma talele Ratu bise ma tonri Smwangtany a nbal farlan ma I nyoding a ne.
Tetetkar ma Ratu nal ber Musa to bise ma nkes kalin safe ma luryain e Ratu nyoding ber Abraham
3:15-20
15 Wangur,
mdyengar ma kfwalak contoh sa na ninr momorip lerar farye:
Farlan tomwatar du a rfat ma lese ma rose nir yoyoding na meterai das,
keta nof radu a ne to fen lese ma bise ma nkes kalin,
nre ntafal nir yoyoding a ne.
16 Farlan a nbal safe ma Ratu nyoding ber Abraham.
Na Kitap Lelerap dalam rarengi feti Ratu nyoding ber Abraham ma ber ni dasdalam.
Ratu Ni yoyoding ber Abraham ni dasdalam a ne,
iane to feti ber ni dasdalam monuk,
nempa ber lan tomwate lese,
I a ne Yesus ninr Ray Silai.
17 Yakw ningw andaun farye:
Ratu nyoding baluan ber Abraham lo,
ma keta ngarak raty fat buty tel a relak,
betno I nal tetetkar ber Musa.
Mpa tetetkar ma Ratu nal ber Musa ne to bise ma nkes kalin Ratu Ni yoyoding a ne.
18 Ni botuan e,
Ratu nal berkat silai ber Abraham nlarat safe ma I nyoding.
Ma I to nal berkat nlarat tetetkar ma nal ber Musa,
fali farlan nal berkat nlarat tetetkar ma I nal ber Musa,
iane feti keta to nlarat safe ma nyoding lo.
19 Farlan farane,
Ratu nal tetetkar ber Musa ma fen safe?
Ratu ntafal tetetkar nor Ni yoyoding luryain a ne nema tomwatar rafai feti rose sale fali rlangas tetetkar a ne.
Sir rose rlarat Musa ni tetetkar a ne,
terik ma Abraham ni dasdalam sa nma,
farlan ma Ratu nyoding lo.
Ma Ratu nal tetetkar ber Musa nalyole Ni malaektar,
betno Musa nfalak ber tomwat Israelar.
20 Nempa noak ma Ratu nose Ni yoyoding ber Abraham,
koko I a nfalak.
I to nal kekes ma neluk lenre farlan biase tomwatar du ma rose nir yoyoding.
Kit tafmpwane tetetkar ma Ratu nal ber Musa terik ma Yesus ninr Ray Silai nma
3:21-29
21 Farlan farane tetetkar ma Ratu nal ber Musa ne to nordeng nor Ni yoyoding e?
Tate!
Botuan feti feleles.
Farlan tlarat tetetkar,
keta tmorip e tangamon,
ma bise ma tonri momorip dedesar,
fali Ratu keta nafdiat kit nof lan ma tlarat tetetkar a ne.
22 Nempa to tomwate fen lese bise ma nlarat monuk tetetkar a ne fali na Kitap Lelerap dalam rarengi feti tomwatar monuk rose salar lo.
Mpa tomwatar bise ma ronri momorip dedesar ma Ratu nyoding a ne nof lan ma ralele Yesus ninr Ray Silai.
23 Noak ma kit to talele Yesus ninr Ray Silai fuky e,
kit farlan tomwatar ma ramin sel dalam fali tetetkar ma Ratu nal ber Musa ne nkete kit.
Tetetkar a ne nkete kit terik ma Ratu nafbotin Yesus ninr Ray Silai ber kit nema talele I.
24 Ma tetetkar ma Ratu nal ber Musa ne farlan tomwate ma najake desar kit terik ma Yesus ninr Ray Silai nma ma talele I,
nema Ratu nafdiat kit.
25 Ma lere ye nait ni tewat ma tomwatar ralele Yesus ninr Ray Silai,
mpa tetetkar ma Ratu nal ber Musa ne to rkete kit lo.
26 Ma kmi myeluk Ratu angkir lo fali milele Yesus ninr Ray Silai.
27 Ma fali radiris kmi monuk lo ma myorip dalmir lese myor Yesus ninr Ray Silai,
mpa keta mir wewelmpampane mbyalak I.
28 Na Ratu sounlury e,
tomwat Yahudyar ma tomwatar ma to Yahudi sir,
karwar ma melar,
bate ma merwane,
kmi monuk ye feleles,
fali ralele Yesus ninr Ray Silai ma dalmir lese ror I.
29 Mpa farlan kmi myeluk Yesus ninr Ray Silai Ni tomwatar,
iane feti Abraham ni dasdalam ber kmi ma keta myonri nbal safe ma Ratu nyoding ber Abraham.