Na ninr momorip e ka tatulung kit
6:1-10
1 Soranyar,
farlan mifai feti tomwatar sa nof a kmi ye nose sale,
kmi ma dedesar e myorip a mlyarat Ratu Smwangtany Ni mpempeang,
ka msyurat i ma nbali i far dalamten malonri.
Ma noak ma msyurat i kete mires,
ma ka mijake kmi nema kete mfyufw far sale nbal.
2 Noak ma msyalan tomwatar ma rkoman suse ka mtyulung sir na nir suse ne.
Farlan myose farane iane kmi myose mlyarat Yesus ninr Ray Silai Ni faretar.
3 Farlan tomwatar sa ndaun feti i nangamon a nlengan nof tomwat walyetar safo tate,
ni botuan e,
nlepusuk a nbali i.
4 Tomwatar mpane ka koko sir rtenak a rbali safe ma sir rose ne feti nangafel nre tate.
Farlan nangafel e,
dalmir a rsenang.
Nempa kete rdaun feti safe ma rose ne nangafel a nlengan nof tomwat walyetar.
5 Fali tomwatar mpane ka rabare safe-safe ma sir rose.
6 Yakw kfwalak ber a kmi,
ka msyaman mir berkat ber tuanggurwar ma raftutu Ratu Ni ngribatnir ber a kmi a ne.
7 Wangur kete mdyaun feti mimpuat motak Ratu keta to nukun a kmi.
Ni botuan e,
Ratu keta nbalas ber sir nlarat safe ma sir rose ne.
Iane feleles farlan safe ma tomwatar rtanam keta ral isnir.
8 Ise ma nmorip e,
nlarat ni makeus yatkar keta nait e,
nkoman suse dedesar na au dalam.
Ma ise ma nmorip a nlarat Ratu Smwangtany Ni mpempeang keta i nonri momorip dedesar.
9 Mpa wangur,
ka kete tafelingat ma tose kabain ngamonar,
fali farlan dedesar tose kabanir a ne keta nait ni tewat e,
Ratu nbalas ngamone ber kit.
10 Mpa noak ma lolone tmorip e,
ka dedesar ma tose ngamone ber tomwatar monuk,
ma nlengan a nbal e,
ber waninrar ma ralele Yesus ninr Ray Silai.
Paulus nsurat soranyar ma nkirim salam ber sir
6:11-18
11 Wangur,
surat mangtan famudi ye koko yakw ma kurengi.
Kmi bise ma msyalan hufrar ye fali hufrar ye silayar rlengan rof huruf walyetar.
12 Tomwatar ma ribut ma rsunat a kmi a ne,
sir rose rlarat agame ni yayatrwar ma rfatutu lan nir ngamone ber tomwat ngayadin.
Sir rose farane fali ramtaut feti farlan rafwibar na Yesus ninr Ray Silai ma nmat na katutun sangwalu,
ma to rlarat agame ni yayatrwar e,
keta tomwat Yahudyar rsiksa sir.
13 Ma ni botuan e,
tomwatar ma rlarat sunat a ne koko sir to rafmpwane monuk tetetkar ma Ratu nal ber Musa.
Sir ribut a kmi ma tomwatar rsunat a kmi nema rafdas sir feti kmi mlyarat nir yayatrwar lo.
14 Nempa yakw to kmpweang desar ma kufdas yakw na safe kabain ma yakw kose.
Yakw kmpweang lan ma kdwangin Yesus ninr Mangnrure ma ninr Ray Silai ne fali nmat na katutun sangwalu ber yakw.
Ma Ni mamate ne nwayat ma safe ma tomwatar rdaun feti ubany na saryamprene ye to ubany ber yakw lo.
Ma yakw nbal e,
kswangwalu ningw makeus saryamprenar lo.
15 Fali tomwatar rsunat sir nre to rsunat sir e,
iane to ubany.
Lan ye ma ubany feti Ratu nose ma tmorip a na momorip beberi.
16 Ma ktwak Ratu ma nfatutu Ni dalamy ngamone ma nal maline ber sir ma rmorip a rlarat safe ma kuftutu ne.
Fali sir monuk reluk Ratu Ni tomwatar lo.
17 Mpa ntabw nof lere ye yakw ktwak ma ka kete tomwate fen lese nbal ma nbangal yakw na safe ma kuftutu ne.
Yakw kfwalak farane fali tenangw ye nfen ber sinryar.
Ma sinryar a ne neluk faniak feti tomwatar rsiksa yakw fali kwarya ber Yesus.
18 Soranyar,
yakw ktwak ma ka weni Yesus ninr Mangnrure ma neluk ninr Ray Silai ne nfatutu Ni dalamy ngamone ber a kmi.
Amen.
Nater lan ye.
Salam nof yakw,
Paulus.