JOHN
Hini omaˈ-atan tay an libju
Hini nangtulaˈ ay tay an libju ja hi apostol John an empfalay cha Zebedee ay Salome an eGalilee. Hini khapuna an intulaˈ na hitay ja mapfaha ay tay kapitulo 20 versikulo 31: “...ta gway aton ju an mamati an hi Hesus ja hija hini Empfalay Apo Jos an hini Hennag na an Mamahhod, ja ta magwachaan aju hi nahamad an piˈtakhuwan khapo hi peˈ-oh-ohhaan ju ay hija.” Hotti cho-or hini mapfaha ay tay an Ebanghelyo an mangpatikhaw ay ni kinajos Hesu Kristo an Empfalay Apo Jos. Mapfaha khu hini omaˈ-atan chi pammati ja hini piˈtakhuwan an ma-id chi pogpogna.
Ay ni teˈte-an tay libju an intulaˈ John ja impa-innila na an hi Hesus ja hija hini ma-ali an Hapit Apo Jos, ja hitay an Hapit ja numpfalin hi takhu, ja neˈheto heto lota ta tikhagwun chi tatakhu ja ta annilaon chay nomnom ja kinajos tay Ama. Ja inidchum na an intulaˈ ay tay an libju han peto an milagro an enat Hesus an panginnilaan an umannung an Jos hija. Ja hija hay hato: chin nunlomanana hi chanum ta numpfalin hi pfajah (2:1-11); chin nangpatengngana chin empfalay chi ohan opiser chi khupferno (4:46-54); chin nangpatengngana chin lala-e an gwa ad Betsaida (5:1-18); chin namanganana hachi cho-or an tatakhu (6:6-13); chin chimmalanana chin tuˈjap chi chanum (6:16-21); chin nangakhahana chin napfulaw (9:1-17); chin nanakhuwana ay Lazarus (11:1-15).
Intulaˈ khu John hana nangchipatan Hesus ay ni omaˈ-atana. Amat chin inalin Hesus an omaˈ-at hija hi anun (6:35), hija hini hilaw (9:5), hija hini pantaw (10:7), hija hini chalan (14:6), hija hini nahamad an nitanum an ubas (15:1).
Cho-or khu hana ma-achar ay tay an libju an omaˈ-atan Jos Ama ja hini tamu na, ja amat hina khu ay ni Espiritu Santo. Mapfaha hini ingkarin Jos Ama an pummahuwan chi natoy (5:21), ja hini kinapfagto na (10:29), hini kinasanto na (17:11), ja allona khu an magpong hija an Ama (17:25). Ja ay ni kapitulo 14 ingkhana hi 16 ja mapfaha hini tamun chi Espiritu Santo an muntihtikhu ay ni umannung an tudtuchu, ja hija hini munheto hana namati ay Kristo, ja hija chi tomolong an manuchugwan ay chicha.
Gwacha hana uchumna an inalin Hesus an ay tay an libju chi achakngana ja angkhay: chin niˈhapitana ay Nicodemus hi hay aton an mipiggwa an metoˈkhong (3:1-21), chin niˈhapitana chin pfupfai an eSamaria hi amatan chi chanum an mangchat hi piˈtakhuwan (4:1-26); chin nuntudtuchugwana chin Pfehta an Pangephochan cha hi A-ab-abpfong (kapitulo 7); chin in-arig na an omaˈ-atan chi maphod an pastor chi karnero (kapitulo 10); chin nungkalalakhana ay Ama na chin khumaju an atajana (kapitulo 17). Hini aha an intuchun John an amin hana intulaˈ na ja hini omaˈ-atan chi nahamad an pamhod. Impa-innila na chin oha an pfakhu an urchin Apo Hesus an mahapor an mumpepennohhochan ta-o an amat ay ni enat na an namenhod ay chita-o. (13:34)