2
Chin kasar ad Cana
1 Nalahin chi chugwah arkhaw, ja gwacha han kasar ad Kana an provincian chi Galilee. Ja gawwah chi hi Mary an ammod Hesus 2 ja neˈ-ajag cha khu hi Hesus ja hachi disipolo na. 3 Unagkhu khimminagwa chin kasar ja napoh chin pfajah, ja inalin chin ammod Hesus ay hija hi, “Chiya an napoh hichuy inumon hachi tatakhu.” 4 Ja inalin Hesus ay hija hi, “Ikhachaˈ, ina, hi atoˈ, ti agkhuy pay nachakngan hini timpo an pangpa-innilaaˈ ay ni omaˈ-ataˈ.” 5 Amat hichi ja inalin ina na hachi takhala hi, “Unuchon ju nu ngay allona hi aton ju.”
6 Gwa han unum an pfato an pfuhih an khun cha pangittugwan hi chanum an mipfulu. Ti paniyaw ay cha nuy Hudju nu achi cha mumpfulu hon nangan cha. Ja himpoloh tempfa hi chanum chi mitto ay ni oha an pfuhih. 7 Amat hichi ja inalin Hesus hachi takhala hi, “Punggwon ju hay hachi pfuhih hi chanum.” Hotti pinnu cha. 8 Ja unaot khu allon ay chicha hi, “Amat hina ja pinauˈ ju ta ichat ju ay chuy khun mangpadchong ay tay kasar.” Enat cha 9 hot tenamtaman chin khun mangpadchong ay chuy kasar chin chanum an numpfalinon Hesus hi pfajah. Muti agkhuy na anila nu ngay nangalan cha ay chuy pfajah an un angkhay hachi pimmauˈ chi nanginnila. Enajakhana hichuy lala-e an nungkasar 10 ja inali na hi, “Hay ugali ta-o ja ipa-inum ta-o hi mahhun hini mapmaphochan an pfajah, ja unchani ayya ta cho-or chi ininum chi tatakhu, ja un ta-o ipapfutay hini achi munnaud an maphod. Muti tan he-a, ja en-ang-angonoh mu an impa-inum hitay pfuher an pfajah!”
11 Enat Hesus hitay ad Kana an provincian chi Galilee, ja hijah tay chi pengpenghan chi milagro hi enat na an nangpatikhagwana ay ni nakaskasda-aw an apfalinana. Ja namati hachi disipolo na ay hija.
12 Napfalin hitay ja empacheh cha Hesus ja hi ina na ja hachi ibpfa na an linala-e ja hachi disipolo na, ja immuy cha ad Kapernaum ja nihihidchi cha.
Chin immajan Hesus ay ni Templo ad Jerusalem
13 Gwa an machakngan hichin Pfehtan chi Hudju an Pangnomnoman cha chin Nalohan ni Angher Apo Jos chin Pfalay chin A-ap-apo cha ad Egypt, ja immuy hi Hesus ad Jerusalem. 14 Unot ne-atam ay chuy partug chi Templo ja chinakngana hachi khun mungkumerchu hi pfakah, karnero ja kaloma an hijay khun nguminaan hana tatakhu hi ipidaton cha ay Apo Jos. Ja tinnig na khu hachi numpanga-umpfun an khun munhukat hi pihun hachi tatakhu hi pihun chi Hudju. 15 Enala na hachi tali ja enephod na hi huplit ja nun-epakak na hachi khun mungkumerchu ja hachi karnero ja pfakah ay chuy partug chi Templo. Nun-ipfu-allu na khu hachi lamehaan an nun-egwallangan hachi pihu hotti nun-egwa-at cha. 16 Inali na hachi khun mungngina hi kaloma hi, “Pun-ekak ju hana ingina ju! Achi ju pumpfalinon hitay pfalay Ama hi pungkumerchuwan!” 17 Ja nenomnom chin disipolo na hichin nitulaˈ an hapit Apo Jos hi nangarjana hi, “Amat hi chumalang hitay puhuˈ khapo hi punnomnomaˈ ay tay pfalay mu.”a
18 Napfalin an tinnig hachi a-ap-apon chi Hudju hichuy an enat Hesus ja empfokha cha ay hija hi, “Anagkha ta un he-a hon enat mu chi amat heto? Ipatikhaw mu adchiya ay chaˈmi hay panginnilaan an he-a ja gway apfalinam.” 19 Tempfar Hesus ja inali na hi, “Paˈ-iyon ju hitay templo muti un umuy hi toloh arkhaw hot ehaˈ-ad u khu, ta panginnilaan ju ay ni apfalinaˈ.” 20 Ja inali cha hi, “Apat chi polo ta han unum hi tagwon ja un mapakhad hitay Templo ja un chah olog mu an mamakhad hi toloh arkhaw?” 21 Muti hini templo an hinapit Hesus ja hini achor na. 22 Ja chin nummahuwana ay chuy me-atloh arkhaw hi natajana, ja un nomnomon hachi disipolo na hitay an inali na. Ja pinati cha mahpay chin nitulaˈ an Hapit Apo Jos ja hachi inalin Hesus.
Anilan Hesus hini nomnom chi tatakhu
23 Ay chuy an neˈpfehtaan Hesus ad Jerusalem, ja cho-or chi namati ay hija khapo ta tinnig cha hana ena-enat na an nangpatikhaw an gway apfalinana. 24 Muti hi Hesus ja agkhuy nunchunu ay chicha, ti aniˈ-ila nay nitakhuwan cha. 25 Achi khahin un gway mangpa-innila ay hija ay ni omaˈ-atan chi tatakhu ti aniˈ-ila na hini nomnom cha.