John 1

JOHN

Hini Hapit an numpfalin hi takhu

¹ Chin hunhunana an agkhuy na-apja hitay lota, ja hikhud an gawwacha han Hapit an ma-id uchumna nu pfu-un hi Kristo. Gawwacha hija ay Apo Jos ja Jos khu hija. ² Hotti gawwacha hija ay Apo Jos chin hunhunana. ³ Khapo ay tay an Hapit ja un marmu an amin hana narmu, ja ma-id oh-ohha hi narmu an agkhuy na limmu. ⁴ Hitay an Hapit an hi Kristo ja hijay narpugwan chi piˈtakhuwan, ja hitay piˈtakhuwan ja hijay hilaw an manenakhan hi nomnom chi tatakhu. ⁵ Ti khenong chi un naherngan hitay lota khapo hi agkhuy nanginnilaan chi tatakhu ay Apo Jos hotti hi Kristo chi nunhilaw. Ja hitay an hilaw ja achi amehon chi munhehellong.

⁶ Gwacha han lala-e an nangngachan hi John, an hennag Apo Jos ⁷ an muntihtikhu hay omaˈ-atan tay an hilaw an hi Kristo, ta khapo ay tay atona ja mamati an amin chi tatakhu. ⁸ Pfu-un hi John chi ma-ali an hilaw, an un hija chin hennag Apo Jos an muntihtikhu hay omaˈ-atan tay an hilaw. ⁹ Ti hi Kristo an hini umannung an hilaw ja umali heto lota ta mahenakhan an amin chi tatakhu. ¹⁰ Ja gawwacha ay tay lota an himpfu na ja anong un hijay Nampfu hi tatakhu ja agkhuy cha immatunan. ¹¹ Anong un chin tatakhu ay chuy pfuglay na ja agkhuy cha inapfulut hija. ¹² Muti chin nangapfulut ja namati ay hija, ja inchatana chicha hi kalintikhan an mipfilang hi empfapfalay Apo Jos. ¹³ Hay enat cha an numpfalin hi empfapfalay Apo Jos ja achi amat ay ni aton ta-o an tatakhu an metoˈkhong, ja achi khapo hi pamhod chi hempfalay an magwachaan hi empfalay cha, ti hi Apo Jos chi nanghumang an pun-empfalay chicha.

¹⁴ Hitay ma-ali an Hapit ja numpfalin hi takhu, ja neˈheto ay chita-o ay tay lota. Impatikhaw na ay chita-o an amin chi khohkhoh Apo Jos ja hini umannung an omaˈ-atana. Tinnikhaw mi chi kinajos na an oh-ohha an Empfalay Jos Ama. ¹⁵ Hitay chi tinihtikhuwan John ja iniˈgwap na an nangali hi, “Hija chin inali-aliˈ ay chaˈju an umali an metob ay ha-in an napfagpfagto, ja gawwacha hija chin hunhunana ja una-ot magwacha.”

¹⁶ Nakhotkhotap chi maphod an enat na ay chita-o ti otongngan chi khohkhoh na. ¹⁷ Ti chin ayya urchin Apo Jos ja impatulaˈ na ay Moses hotti impa-innila na, muti hini ayya umannung an omaˈ-atan Apo Jos ja hini khohkhoh na, ja hi Hesu Kristo chi nangpa-innila ay chita-o. ¹⁸ Ma-id chi hay nannikhaw ja nangpa-innila ay Apo Jos, an un angkhay hi Hesu Kristo an oh-ohha an Empfalay na. Ti Jos khu hija an ninidchum ay Ama na.

Chin tinihtikhuwan John Bautista

¹⁹ Gwa han namenghan an hennag chin a-ap-apon chi Hudju ad Jerusalem hichin uchumna an papachi ja Levita an immuy hichin agawwachaan John, ta hanhanan cha nu ngay nitakhuwana. ²⁰ Agkhuy enhaot John an empfaag na hini umannung an pfu-un hija chi Hennag Apo Jos an Mamahhod. ²¹ Ja empfokha cha khu hi, “Hotti ngay nitakhuwam mah? He-a chah chin profeta Elijah an un a nummahu?” Ja inali na hi, “Pfu-un.” Hen-empfokha cha khu hi, “Hotti he-a chah hini Profeta an hahadchon mi an umali?” Ja inali na khu hi, “Pfu-un.” ²² Ja hen-empfokha cha khu hi, “Hot ngay nitakhuwam mah? Mahapor an epfaag mu hini omaˈ-atam ta gway ipa-innila mi hana nannag ay chaˈmi?” ²³ Tempfar John ja inali na hi, “Ti anila ju chin impadtun profeta Isaiah hi nangarjana hi, ‘Hichi let-ang ja gwacha han khun mun-ugwap an khuna allon hachi tatakhu hi, “Epaphod ju hini agwun ni umali an Apo.”’ Ja ha-in hitay hinapit Isaiah.”

²⁴ Gwa hachi uchumna an Farisee an nidchum hay hana hennag cha ²⁵ ja empfokha cha hi, “Hot anagkha mah ta un he-a hon khun a mumbautisar un pfu-un he-a hini Mamahhod, ja pfu-un he-a hi Elijah, ja pfu-un he-a hinuy Profeta an umali?” ²⁶ Tempfar John ja inali na hi, “Ha-in ayya ja khunaˈ mumbautisar hi chanum muti gwa han ninidchum ay chaˈju an achi ju imatunan. ²⁷ Hijay metob ay ha-in muti achi mapfalin an ipadchungaˈ ay hija, ti munnaud hija an napfagpfagto.”

²⁸ Na-at hay hato ad Betani ay ni chammang ni gwanggwang an Jordan, an hichi chi numbautisaran John chin tatakhu.

Hi Hesus chi amat hi pfoˈtot chi karnero an midaton

²⁹ Unot chin nun-ingwiˈgwiit ja tinnig John hi Hesus an khun umuy ay chuy agawwachaana, ja inali na hi, “Chuyya hini amat hi pfoˈtot chi karnero an inchat Apo Jos an midaton ta ma-aan hana pfahor ta-o an tatakhu heto lota. ³⁰ Hitay hichin inaliˈ ay chaˈju an, ‘Gwacha han metob ay ha-in an napfagpfagto, ti gawwacha hija chin hunhunana ja una-ot magwacha.’ ³¹ Anong un ha-in ja agkhuy u anila hitay an umali. Muti hijaot unaˈ pfinaar ay Apo Jos an mumbautisar hi chanum ta ipa-innilaˈ hija ay chaˈju an holag Israel.”

³² Ja nuntihtikhu hi John an inali na hi, “Umannung an tinnig u hini Espiritun Apo Jos an nun-ohop ay hija an narpu ad langit an amat hi kaloma chin tikhaw na. ³³ Agkhuy u immatunan hija muti hi Apo Jos an namaar ay ha-in an mumbautisar hi chanum, ja hijay nangali ay ha-in hi, ‘Hini takhu an tikham an omajan ni Espiritu ja hija hini mumbautisar hi Espiritu Santo.’ ³⁴ Ja naˈna-atigkhaˈ an hijah tay chi na-at, ja umannung hitay tihtikhuwaˈ ay chaˈju an hija hini Empfalay Apo Jos.”

Chin nahhun an adalan Hesus

³⁵ Chin nun-inggwiˈgwiit ja gawwah chi khu hi John ja han chugwa an disipolo na. ³⁶ Unaagkhu tinnikhaw hi Hesus an maloh ja inali na hi, “Chuyya chin inaliˈ an amat hi pfoˈtot chi karnero an inchat Apo Jos an midaton.” ³⁷ Unot chengngor chin chugwa an disipolo na hitay an inali na ja nitnud cha ay Hesus. ³⁸ Nunligkhoh ja tinnig na chicha an ninitnud, ja inali na hi, “Nga chah chi penhod ju?” Tempfar cha ja inali cha hi, “Chaadmah chi nunhihittugwam, Rabbi?” Ay ni hapit chi Hudju ja Rabbi chi pangali cha ay ni khun muntuchu. ³⁹ Tempfar Hesus ja inali na hi, “Miˈjali aju ay ha-in ta tikhan ju hini nunhihittugwaˈ.” Hotti nitnud cha ay hija. Emmatam cha chin napujaw, ja ni-ib-ipfun cha.

⁴⁰ Hay ngachan chin oha ay cha chuy an chugwa an nangngor chin inalin John an i nitnud ay Hesus, ja hi Andrew an akhin Simon Peter. ⁴¹ Amat hichi ja chinaˈpuh Andrew an i mannig ay ibpfa na an hi Simon. Unaot tinnikhaw hi ibpfa na ja inali na hi, “Tinnikhaw mi mahpay hini Mamahhod, an hija hini ma-ali an Mesias.” Hitay an Mesias ja hi Kristo hi hapit chi Griego. ⁴² Ja initnud Andrew hi ibpfa na an hi Simon ja immuy cha ay Hesus. Unagkhu emmohchong Hesus hi Simon ja inali na hi, “He-a hi Simon ja hay ngachan amam ja hi John, muti mangadnan a hi Sefas.” Hitay an ngachan an Sefas ja hihiya ay Peter, an hay podhona an hapiton ja pfato.

Chin nangajakhan Hesus ay cha Philip ja hi Nataniel

⁴³ Gwa khu an nun-inggwiˈgwiit ja nenomnom Hesus an umuy ad Galilee. Tinnikhaw na hi Philip ja inali na ay hija hi, “Miˈjali a ay ha-in.” ⁴⁴ Hi Philip ja eBetsaida an pfuglay khu cha Andrew ay Peter. ⁴⁵ Inapfulut Philip chin inalin Hesus ja i na tinnig hi Nataniel. Ja inali na hi, “Chinittum mi hini Mamahhod an hinapit Moses ay ni intulaˈ na ay ni urchin Apo Jos, ja nitulaˈ khu hachi libjun chi profetan Apo Jos chin pengpenghana. Hay ngachana ja hi Hesus an eNazaret, an empfalay Josep.” ⁴⁶ Ja inalin Nataniel hi, “Un chah gway maphod hi marpu ad Nazaret?” Ja inalin Philip hi, “Miˈjali a akay niˈ ta tikham.” Ja niˈjuy. ⁴⁷ Unot tinnig Hesus hi Nataniel an gwa an me-atam ja inali na hi, “Tayya han takhu an nahamad an holag Israel ja ma-id lahlah na.” ⁴⁸ Ja inalin Nataniel hi, “Ngay nanginnilaam ay ha-in?” Tempfar Hesus ja inali na hi, “Tinnig u he-a an inu-umpfun han puun chi ajiw an higos ja unot umali hi Philip an mangagwit ay he-a.” ⁴⁹ Ja inalin Nataniel ay hija hi, “Rabbi, umannung an he-a hini Empfalay Apo Jos! He-a hini Ari mi an holag Israel!” ⁵⁰ Ja inalin Hesus hi, “Niya an namati a khapo ta inaliˈ hi tinnig u he-a hi inu-umpfunam han puun chi higos. Cho-or pay chi tikham hi o-ot-ottong an maˈma-at mu hitay.” ⁵¹ Ja inalin khu Hesus hi, “Umannung mangkay hitay alloˈ ay chaˈju, an matikhaw ju an mipfughor ad langit. Ja tikhan ju khu hana angher Apo Jos an munhigwar an khun tomolo an umuy ad langit hon numpfangngad an umali ay ha-in an Na-ilangitan an Takhu.”