John 3

Chin niˈhapitan Nicodemus ay Hesus

¹ Gwacha han ohan Farisee an ap-apon chi Hudju an hi Nicodemus chi ngachana. ² Gwa han ohan nadhom ja immuy hi Nicodemus ay Hesus ja inali na hi, “Rabbi, anila mi an he-ay mehtolo an hennag Apo Jos, ti omod an cho-or hana khun mu aton an achi ma-at chi takhu nu ma-id hi Apo Jos an mangchat hi apfalinan.” ³ Himmapit hi Hesus ja inali na hi, “Umannung mangkay hitay alloˈ ay he-a, an achi midchum hini takhu ay ni Pun-ap-apugwan Apo Jos nu achi mumpiggwa an metoˈkhong.” ⁴ Ja inalin Nicodemus hi, “Aa, muti ngay aton ni ma-ilog an metoˈkhong khu? Unchah mapfalin an mumpfangngad ay ni poton ina na ta mumpiggwa an metoˈkhong?” ⁵ Tempfar Hesus ja inali na hi, “Umannung hitay alloˈ ay he-a an mahapor an metoˈkhong hini takhu hi chanum ja ay ni Espiritu Santo ja un midchum ay ni Pun-ap-apugwan Apo Jos. ⁶ Hini takhu ja omempfalay hi takhu. Hini ayya Espiritu Santo ja ichat nay pfakhu an na-ispirituwan an piˈtakhuwan. ⁷ Achi a mamannor ay ni inaliˈ an mahapor an mumpiggwa aju an metoˈkhong. ⁸ Ti un amat ay ni ijah an mumpfurpfuluud muti ma-id maptoˈ hi arpugwana ja omajana, an un ikhad hija. Amat hina khu ay ni Espiritu Santo an muntamu ay ni takhu ta mumpiggwa an metoˈkhong.” ⁹ Ja inalin Nicodemus hi, “Hot ngay amatana mah?” ¹⁰ Tempfar Hesus ja inali na hi, “He-ay oha an ma-ar-ali an muntudtuchu hana holag Israel ja anagkha ta achim ma-awatan hitay inaliˈ? ¹¹ Umannung mangkay hitay alloˈ ay he-a, an anila mi ja tinnig mi hana khun mi hapiton. Anong un amat hina ja achi ju pattiyon hana khun mi tihtikhuwan. ¹² Tayya an impa-innilaˈ ay chaˈju hini omaˈ-atan hana gwah to lota ja niya an achiyaˈ pattiyon. Hotti om-omod an achi aju mamati nu etoloy u an mangpa-innila hana khun maˈma-at ad langit. ¹³ Ti ma-id ohah takhuh immuy ad langit ja numpfangngad ta ipa-innila na hini omaˈ-atana, an un angkhay ha-in an Na-ilangitan an Takhu an narpu ad langit. ¹⁴ Hay ma-at ay ha-in ja amat chin khumoˈ an ulog an nipfitin chin ajiw an empachoˈ Moses. Amat hina khu ay ha-in an Na-ilangitan an Takhu an mipfitinaˈ han kros, ¹⁵ ta an amin hana mamati ay ha-in ja miˈtakhu cha hi ma-id chi pogpogna. ¹⁶ Ti otong hini pamhod Apo Jos hay hana tatakhu ay tay lota. Hijaot una impa-ali hini oh-ohha an Empfalay na ta an amin hana mamati ay hija ja achi cha ma-utaw ta un chaot miˈtakhu hi ma-id chi pogpogna.

¹⁷ Agkhuy hennag Apo Jos hini Empfalay na an immali heto lota an manugwi hi takhu ta madusa cha, an hay nannakhan Ama na ja umali an Manakhu hi tatakhu. ¹⁸ Hana ayya mamati ay ni Empfalay na ja achi cha mahugwi an madusa. Ja hana ayya achi mamati ja napfalin an nahugwi cha an madusa, ti achi cha pattiyon hini oh-ohha an Empfalay na. ¹⁹ Hini adusaan cha ja immali hini manilagwan hi tatakhu, muti penpenhod cha hini munhehellong mu hini mumpapattar, ti napukhit hana khun cha aton. ²⁰ Ti hana khun mangat hi napukhit ja pfuhulon cha hini mumpapattar ja achi cha mehnot ay ni hilaw, ti achi cha podhon an mapfu-ihan hana napukhit an khun cha aton. ²¹ Hana ayya khun miˈtakhu hi magpong ja umali cha ay ni hilaw ta matikhaw hana maphod an khun cha aton khapo ay ni apfalinan Apo Jos.”

Chin nanapitan John Bautista ay ni amatan Hesus

²² Napfalin hay hachi, ja immuy cha Hesus ja hachi disipolo na hichi provincian chi Judea. Nihihidchi cha hi at hichi hi arkhaw ta mumbautisar cha. ²³ Ja gwacha khu hi John Bautista ad Enon an nehnot ad Salim. Hichi khuna pumbautisaran an achoˈlan chi chanum. Ja gwa hachi immuy ay hija an numpabautisar. ²⁴ Ay chuy ja agkhuy pay nipfalud hi John.

²⁵ Ja gwa han nunhohongngilan cha chuy disipolon John ja han ohan Hudju, an chumalat hini aton an mun-ulah ta maleneh hini takhu hi pannig Apo Jos. ²⁶ Immuy cha ay John ja inali cha hi, “Rabbi, anilam chah hini khun aton chin nun-ibpfam an takhu chin agawwachaan ju hichi chammang chi Jordan, chin khun mu tihtikhuwan ay chaˈmi? Gwa mangkay an khun mumbautisar ad ugwani ja hijay omajan an amin chi tatakhu.” ²⁷ Ja inalin John hi, “Aa, ti otong hini apfalinana, ja ma-id apfalinan hi amat hina nu pfu-un hi Apo Jos chi mangchat. ²⁸ Chengngor ju mit chin inaliˈ an pfu-un ha-in hini Mamahhod muti ha-in hini hennag Apo Jos an mangpangpangullu ja un umali hija. ²⁹ Ti amat heto, an unaˈ amat ay ni lala-e an mangpangpangulu ay ni kasar ni khayyum na an mungkasar. Anong un pfu-un hijay mangahagwa ay ni pfalahang ja otong chi anla na an manginnila an immali hini lala-e an mangahagwa ay hija. Amat hina khu ay ha-in, an hini enat u ja enhakhanaˈ hini umaliyan ni Mamahhod, ja munnaud chi pun-an-anlaaˈ ti tan immali hija. ³⁰ Mahapor an hijay ipapfagpfagton chi tatakhu ta pfu-un ha-in.”

³¹ Hana tatakhu ja gawwacha cha ay tay lota, ja hana gwah to lota chi khun cha hapihapiton. Hini ayya narpu ad langit ja hijay napfagpfagto an amin. ³² Hapitona hana tinnig na ja chengngor na muti un tortollo hana mangapfulut ay ni khuna tihtikhuwan. ³³ Ja hana mangapfulut ay ni khuna tihtikhuwan ja tihtikhuwan cha khu an umannung hana hapit Apo Jos. ³⁴ Ti hapit Apo Jos hana allon ni Hennag na an muntihtikhu, ti hijay nangchatan Apo Jos an amin hi apfalinan ni Espiritu Santo. ³⁵ Ti hi Jos Ama, ja podpodhona hitay an Empfalay na ja impulang na an amin ay hijay apfalinan ta hijay mangpaptoˈ. ³⁶ Hana ayya mamati ay tay an Empfalay na ja miˈtakhu cha hi ma-id chi pogpogna. Hana ayya man-ug ay tay Empfalay na ja achi cha miˈtakhu, ja hoˈmon cha hini ma-id pogpogna an pundusaan Apo Jos ay chicha khapo hi pfungot na.