6
Chin namanganan Hesus hachi lemay lipfu an tatakhu
1 Immuy chi at hichi hi arkhaw ja pfimmad-ang cha Hesus chin baybay ad Galilee an nangadnan khu hi Tiberias. 2 Cho-or chin tatakhu an nangunud ti tinnig cha hana milagro an en-enat na an nangpatikhaw ay ni apfalinana, ti nun-epatenong na hachi mumpunchokhoh. 3 Nunti-id cha Hesus ja chin disipolo na han pfulludna ja inumpfun cha. 4 Metongor ay chuy ja machakngan chin pfehtan chi Hudju an Panginomnoman Cha Chin Nalohan Chin Angher Apo Jos. 5 Unagkhu nuntigkhatigkhaw hi Hesus ja tinnig na hachi cho-or an tatakhu an khun mehmehnot ay hija, ja inali na ay Philip hi, “Chaad nin chi i ta-o nguminaan hi epa-an hay hato tatakhu?” 6 Inali na hitay ta toptopngana hi Philip, ti aniˈ-ilan Hesus hini atona. 7 Tempfar Philip ja inali na hi, “Anong un inginay pfinoˈla hi gwaloy pfulana ja achi omanay hi hiniˈ-itangon cha.” 8 Ja inalin Andrew an oha ay cha chuy adalan Hesus an ibpfan Simon Peter hi, 9 “Tayya han ung-ungnga an lala-e an nunhohongot hi lema an tenapayb ja chugwa an khachiw. Muti achi omanay ti cho-or hato tatakhu.” 10 Ja inalin Hesus hi, “Ipapfun ju hachi tatakhu.” Hotti impapfun cha ay chuy agawwachaan cha an achoˈlan chi holoˈ. Ja umuy hi lemay lipfu hachi linala-e ay chuy an khagong. 11 Enalan Hesus chin lema an tenapay ja nunyaman ay Apo Jos, ja empe-ap-apong na hachi tatakhu an numpanga-umpfun. Ja enat na khu chin khachiw. Ja nangan cha ingkhana hi na-apchan cha an amin. 12 Unagkhu na-apchan chin tatakhu ja inalin Hesus hachi disipolo na hi, “I ju tipunon hay hachi nun-ahagwar ta ma-id metapar.” 13 Hotti enat cha ja nun-apnu han himpolo ta chugwa an pfahkit chin nun-ahagwar ay chuy lema an tenapay an inan hachi tatakhu.
14 Tinnig hachi tatakhu hichuy enat Hesus an nangpatikhaw ay ni apfalinana, ja inali cha hi, “Hijah tay hini nipadtu an Profetan Apo Jos an umali heto lota.” 15 Aniˈ-ilan Hesus an khun cha nomnomon an piliton cha hija an mumpfalin hi ari cha. Muti achi na podhon, hotti tenaynana chicha ja inti-id na khu ay chuy an pfulludna ta i omohha.
Chin chimmalanan Hesus hichin chanum
16 Gwan nahilip ja nunchayyu hachi disipolon Hesus hichi baybay, 17 ja nunlukhan cha han pfalangay ta umuy cha hichi chammangna an ad Kapernaum. Gwa an nadhom ja ma-id pay tinnig cha hi mangunud ay Hesus. 18 Unagkhu himpfumagkha ja immali han mapfi-ah an ijah ja nuntipjaˈ-ong chin chanum. 19 Khun mungkhaud hachi disipolon Hesus ja unagkhu immachawwi cha hi lema wenno unum hi kilomitlu ay chin pingngit chi baybay an narpugwan cha, ja tinnig cha hi Hesus an khun chumalan ay chuy chanum, ja khun mehmehnot ay chicha. Ja nang-entata-ot cha. 20 Himmapit hi Hesus ja inali na hi, “Achi aju toma-ot ti ha-in.” 21 Ja nun-an-anla cha an nanglukhan ay hija. Naˈnaˈ-omtang ja emmatam cha chin pingngit chi baybay an negpongan ni i cha omajan.
22 Chin nun-ingwiˈgwiit ja gawwacha cha pay hachi tatakhu ay chuy pingngit chuy baybay an chammang ni immajan hachi disipolon Hesus. Tinnig cha an ma-id uchumna hi pfalangay, ja anila cha an agkhuy niˈlukhan hi Hesus chin oh-ohha an nunlukhanan hachi disipolo na. 23 Muti ay chuy an nanong ja gwacha chin uchumna an pfalangay an narpu ad Tiberias an nangtaˈchug ay chuy negpongan chin nanganan hachi tatakhu ay chuy tenapay an nunyamanan Apo Hesus ay Apo Jos. 24 Tinnig hachi tatakhu an ma-id hi Hesus, ja ma-id khu hachi disipolo na. Ja amat hichi ja niˈlukhan cha chin pfalangay, ja neˈpacheh cha an umuy ad Kapernaum ta i cha hingiton hi Hesus.
Hi Hesus ja mipadchung hi anun an mangchat hi piˈtakhuwan
25 Unot inah-upan hachi tatakhu hi Hesus ay chuy chammangna an ad Capernaum ja inali cha ay hija hi, “Rabbi, aˈ-anunay immaliyam heto?” 26 Ja inalin Hesus hi, “Umannung hitay alloˈ, an hini khunaˈ paningitan ay chaˈju ja khapo ta inan ju chin tenapay ja na-apchan aju. Achiyaˈ khun hingiton khapo ta na-awatan ju hana enat u an panginnilaan ju ay ni apfalinaˈ. 27 Hay maphod hi aton ju ja pfu-un hini anun heto lota chi epa-ennongan ju an itamu ti hay hato ja mapogpog. Hay epa-ennongan ju an hingiton ja hini anun an achi mapogpog, an hijay mangchat hi piˈtakhuwan an ma-id chi pogpogna. Hini mangchat ay tay an achi mapogpog an anun ja un angkhay ha-in an Na-ilangitan an Takhu, ti hi Ama chi nangchat hi kalintikhaˈ.” 28 Ja empfokha cha ay hija hi, “Hot ngay aton mi an mangat ay ni penhod Apo Jos?” 29 Tempfar Hesus ja inali na hi, “Hay podhon Apo Jos hi aton ju ja mamati aju ay ha-in an hennag na.” 30 Ja empfokha cha khu hi, “Hot gwacha mah chi ipatikhaw mu ta panginnilaan mi ay ni apfalinam ta gway aton mi an mamati ay he-a. Hotti ngay mah atom? 31 Hi Moses ja penangana chin a-apo ta-o hi mana hichi let-ang. Ti allona ay ni hapit Apo Jos hi, ‘Penangana chicha ay ni anun an narpu ad langit.’”c 32 Tempfar Hesus ja inali na hi, “Umannung hitay alloˈ, an pfu-un hi Moses chi nangchat ay chuy inan cha an narpu ad langit, an hi Ama chi nangchat. Ja chin khun cha anun an narpu ad langit, ja pfu-un hijay nahamad an anun an ichat Apo Jos ay chaˈju ad ugwani. 33 Ti hinuy nahamad an anun an ichat Apo Jos ja hijah nuy hini narpu ad langit ta ichat nay piˈtakhuwan hay hana tatakhu an mamati ay hija.” 34 Ja inali cha hi, “Apo, khun mu akay mah ichat hinuy allom an anun ay chaˈmi.” 35 Ja inalin Hesus hi, “Ha-in hini mipadchung hi anun an mangchat hi piˈtakhuwan. Ti hini mamati ay ha-in ja achi homenhenaang ja achi ma-ug-ugaw. 36 Muti umannung chin inaliˈ, an anong unaˈ tinikhaw ay chaˈju ja agkhujaˈ pattiyon. 37 An amin hana eneˈchan Ama an mumpfalin hi tatakhuˈ ja umali cha ay ha-in. Ja hini umali ay ha-in ja akhamichoˈ an achiˈ epakak. 38 Ti immaliyaˈ an narpu ad langit ta atoˈ hini penhod Ama an nannag ay ha-in an pfu-un hini penenhod u. 39 Hijah tay chi penhod Ama hi atoˈ, an pummahuwoˈ an amin hana inchat na ay ha-in ay tay umali an apogpokhan tay lota ta ma-id oh-ohha hi ma-utaw. 40 Ti hitay hini penhod Ama, ta an amin hana tatakhu an nanginnila ja namati ay ha-in, ja miˈtakhu cha hi ma-id chi pogpogna. Hotti pummahuwoˈ chicha chin apogpokhan tay lota.”
41 Unot chengngor hachi Hudju chin inali na ja ente-a cha an mungngulungur, ti achi cha penhod chin inali na an, “Ha-in hini mipadchung hi anun an narpu ad langit.” 42 Ja khun cha allon hi, “Unchah pfu-un hitay hini empfalay Josep an hi Hesus? Anila ta-o cha nuy a-ammod na, ja anagkha ta allona hi un narpu hija ad langit?” 43 Ja inalin Hesus ay chicha hi, “Epokhong ju an mungngulungur. 44 Ma-id chi hay oha hi mamati ay ha-in an khahin un hi Ama an nannag ay ha-in chi mangehnot ay chicha. Hana ayya mamati ja pummahuwoˈ chicha chin apogpokhan tay lota. 45 Ti gwa han nitulaˈ an hapit Apo Jos an intulaˈ hachi profeta hi nangarjana hi, ‘An amin chi tatakhu ja tuchugwan Apo Jos.’d Hini munchongor ay ni ituchun Ama ja khenokhotana, ja mamati ay ha-in. 46 Ma-id chamchama nannig ay Ama, ti un angkhay ha-in an narpu ay hija chi nannig. 47 Umannung hitay alloˈ, hana mamati ay ha-in ja miˈtakhu cha hi ma-id chi pogpogna. 48 Ja ha-in hini mipadchung hi anun an mangchat hi nahamad an piˈtakhuwan. 49 Chin a-apo ju an nangan chin mana hichin agawwachaan cha hichi let-ang ja nun-a-atoy cha chamchama. 50 Muti hitay inaliˈ an anun an narpu ad langit, ja hini mangan hot achi matoy. 51 Ja ha-in hini mipadchung hi anun an narpu ad langit an mangchat hi piˈtakhuwan. Hini mangan ay tay an anun ja miˈtakhu hi ma-id chi pogpogna. Ti hitay an anun ja hija hitay achor u an ichat u ta gway aton chi tatakhu an miˈtakhu.”
52 Chengngor hachi Hudju ja ente-a cha khu an nunhohongnger ja inali cha hi, “Ngay aton tay an takhu an mangchat ay chuy achor na ta anun ta-o?” 53 Ja inalin Hesus hi, “Umannung hitay alloˈ. Nu achi aju meˈ-an ay tay achor u an Na-ilangitan an Takhu, ja miˈ-inum ay tay chalaˈ, hot achi aju magwachaan hi nahamad an piˈtakhuwan. 54 Hana ayya meˈ-an ay tay achor u ja miˈ-inum ay tay chalaˈ ja magwachaan cha hi piˈtakhuwan an ma-id chi pogpogna, ja pummahuwoˈ chicha chin apogpokhan tay lota. 55 Ti hitay achor u ja nahamad an anun, ja hini chalaˈ ja nahamad an ma-inum. 56 Hana meˈ-an ay tay achor u ja miˈ-inum ay tay chalaˈ ja meˈ-oh-ohha cha ay ha-in. Ja gawwachaaˈ khu ay chicha. 57 Hi Ama an mamattakhu chi nannag ay ha-in, hijaot un gwa ay ha-in hini nahamad an piˈtakhuwan. Amat khu hina hana mangan ay ha-in, an magwachaan cha hi nahamad an piˈtakhuwan. 58 Ti ha-in hini nahamad an anun an narpu ad langit, an achi amat chin khun anun hachi a-apo ju chin nahop. Ti hay hachi nangan ay chuy an anun, ja nun-a-atoy cha chamchama. Muti hana ayya meˈ-an ay tay an anun, ja miˈtakhu cha hi ma-id chi pogpogna.”
59 Inalin Hesus hay hato chin nuntudtuchugwana ay ni sinagoga ad Kapernaum.
60 Chengngor hachi disipolon Hesus hitay an intuchu na, ja cho-or chay nangali hi, “Mun-achamot kaykhu hay hato khuna ituchu ja nga chah chi mangngor?” 61 Inannilan Hesus an khun cha mungngulungur ja inali na hi, “Un ayya angkhay hay hato inaliˈ ja napukhit hi punnomnoman ju, 62 ja ngay nomnomon ju nu tikhanaˈ an Na-ilangitan an Takhu an mumpfangngad ad langit an narpugwaˈ? 63 Hay alloˈ ja hini mangchat ay ni nahamad an piˈtakhuwan ja hini Espiritun Apo Jos an pfu-un hitay lamoh. Ja hana inaliˈ ay chaˈju ja narpu ay ni Espiritun Apo Jos, hotti hay hato chamchama chi mangchat hi piˈtakhuwan. 64 Muti gwachay uchumna ay chaˈju chi achi mamati ay ha-in.” Inalin Hesus hitay ti napfajag an iniˈ-ila na hana achi mamati ay hija ja hini oha an i mangngina ay hija. 65 Ja entoloy Hesus an nangali hi, “Anilaˈ an gway achi mamati ay chaˈju. Hijaot un u inali hi ma-id chi hay oha hi mamati ay ha-in an khahin un ekhohkhohan Ama chicha.”
66 Chumalat hay hachi nun-ali na ja cho-or hachi ninitnud ay hija an nun-akak. 67 Ja inalin Hesus hachi himpolo ta chugwa an adalan hi, “Chaˈju ngay, un ju chah podhon an me-ekak?” 68 Tempfar Simon Peter ja inali na hi, “Apo, ngay uchumna hi i mi unuchon? An un he-a ja angkhay chi mangtuchu ay ni aton an miˈtakhu hi ma-id chi pogpogna. 69 Ja namati ami ay he-a ti inannila mi an he-a hini pinilin Apo Jos an nasantuwan.” 70 Ja inalin khu Hesus hi, “Aa, ti ha-in chi namili ay chaˈju an himpolo ta chugwa an adalan u. Muti anong ja gwa han oha ay chaˈju an amat ay Satanas hini nomnom na.” 71 Hay pitulungan tay an inalin Hesus ja hi Judas an empfalay Simon Iskariot. Ti anong un oha hija hay hachi himpolo ta chugwa an adalan, ja hija chi i mangngina ay Hesus ta patajon cha.