Luke 24

Chin nummahuwan Hesus

¹ Unot nun-inggwiˈgwiit an Markhachu an nalahin chin ngilin, ja pfimmugwah chin pfinapfai an immuy hichi lupfuˈ ta in-uy cha chin lanob an enhakhana cha. ² Un chaagkhu emmatam ja nangalimutugwan cha an nipapaˈ-igwin chin tanglib chin lupfuˈ. ³ Himmikhop cha ja tinnig cha an ma-id hichin achor Apo Hesus. ⁴ Ja mun-am-amungaw hay hachi pfinapfai. Unagkhu himpfumagkha ja gwa han chugwa an linala-e an timmataˈchug an pomooˈ chi lopfong cha. ⁵ Nang-entata-ot hachi pfinapfai ja inloppolop cha. Ja inalin hachi angher ay chicha hi, “Anagkha ta hingiton ju hini mamattakhu ay tay an ilub-an chi natoy? ⁶ Ma-id heto, ti nummahu! Nomnomon ju chin inali na hi agawwachaan ju ad Galilee ⁷ hi nangarjana hi, ‘Ha-in an Na-ilangitan an Takhu, ja mahapor an mipulangaˈ hay hana napfahulan an tatakhu ja epfakhataˈ hay kros ja chin me-atloh arkhaw hot mummahuwaˈ.’” ⁸ Ja nenomnom mahpay hachi pfinapfai chin inalin Hesus.

⁹ Numpfangngad cha hichi agawwachaan hachi himpolo ta oha an adalan ja hachi uchumna an numpun-ibpfa cha. Ja impa-innila cha an amin chin tinnig cha ja chengngor cha. ¹⁰ Chin pfinapfai an cha Mary Magdalen, ja hi Joana, ja hi Mary an inan James, ja chin uchumna an pfinapfai an numpun-ibpfa cha chi nangpa-innila ay cha chuy apostol. ¹¹ Muti khemhonot hachi apostol un cha pangar-ali, hijaot un cha agkhuy pinati chin inali cha. ¹² Un angkhay hi Peter chi pfimmutay ja temmagtag an immuy hichi lupfuˈ. Unagkhu emmatam ja inhichip na ja un hay tinnig na ja chin namiˈlug cha ay Hesus an negwagwallang. Amat hichi ja empacheh na ja khuna nomnomnomon hitay an na-at.

Chin numpatikhan Hesus han chugwa an tatakhu an umuy ad Emaus

¹³ Ay chuy khu an arkhaw ja gwa han chugwa an takhu an khun umuy ad Emaus an himpolo ta oha chi kilomitlu hi inachawwi na ad Jerusalem. Cha tay an chugwa ja khun cha mitnud ay Hesus chin khuna puntudtuchugwan. ¹⁴ Khun cha haphapiton an amin hachi en-enat chin tatakhu ay Hesus. ¹⁵ Ay chuy an khun cha panaphapitan ja nehnot hi Hesus ja nitnud ay chicha. ¹⁶ Tinnikhaw cha muti agkhuy cha immatunan, ti achi na penhod an mumpa-innila. ¹⁷ Ja inalin Hesus ay chicha hi, “Ngachah atag nuy khun ju haphapiton hi khun ju chumalanan?” Intaˈchug cha ja tinnig na an ahighikha chin angah cha khapo chin khun cha haphapiton. ¹⁸ Inalin chin oha an hi Kleopas hi, “He-a nin ja angkhay chi i nummangili ad Jerusalem an agkhuy nanginnila chin naˈna-at hichi ay tay immuy an ar-arkhaw.” ¹⁹ Inalin Hesus hi, “Ngay ngachah hana na-at?” Tempfar cha ja inali cha hi, “Hay hana ena-enat cha ay Hesus an eNazaret. Oha hija an profeta an hennag Apo Jos. Ja matikhaw hana tatakhu an gway apfalinana an muntudtuchu ja an mangat hi milagro. ²⁰ Muti hachi a-ap-apon chi papachi ja hachi uchumna an a-ap-apo mi chi nangpulang ay hija ay Pilato ta hugijona an gway pfahor na ja empapatoy na. Ja empepfakhat na hija han kros. ²¹ Hijay enehchor mi an mangepfangngad ay chita-o an holag Israel ay ni pun-ap-apugwan ta-o. Ja ad ugwani chi me-atlo hi arkhaw chin natajana. ²² Ja gwa han nakasda-aw an na-at ad ugwani, ti hana uchumna an ibpfa mi an pfinapfai ja pfimmugwah cha an immuy hichi lupfuˈ ²³ ja un chaagkhu inhichip ja ma-id chin achor Hesus. Immali cha an nangali an tinnig cha hana angher an nangpa-innila an nummahu hi Hesus. ²⁴ Amat hichi ja immuy hachi uchumna an ibpfa mi hichi lupfuˈ ja tinnig cha an umannung hichin inalin hachi pfinapfai muti ma-id tinnig cha ay Hesus.” ²⁵ Ja inalin Hesus ay chicha hi, “Natottot aju kaykhu, ti nalikhat hi pamatiyan ju hachi inalin chin profetan Apo Jos! ²⁶ Unchah agkhuy ju anila an mahapor an hortapon tay an Kristo hato an likhat ja unot mipapfagto?” ²⁷ Ja impa-innilan Hesus an amin hay hana nitulaˈ an hapit Apo Jos an ma-at ay hija, nete-a hichin intulaˈ Moses ingkhana hichin intulaˈ hachi profeta.

²⁸ Gwa an mehnot cha chin pfuglay an omajan cha ja enchapchapoh Hesus an amat hi achawwi pay chi omajana. ²⁹ Muti impa-ud cha hija ja inali cha hi, “Achi a umuy ta meheto ta-o, ti chiya an mahilip.” Amat hichi ja nitnud ay chicha. ³⁰ Inumpfun cha an mangan ja enalan Hesus chin tenapay ja nunyaman ay Apo Jos ja unaot itta-ittangon an inchat ay chicha. ³¹ Ay chuy an nangatana ja immatunan cha mahpay an hija hi Hesus. Unagkhu amat hichi ja na-upfah hija. ³² Ja khun munhapit cha chuy an chugwa an inali cha hi, “Anagkha ta agkhuy ta immatunan ad anachi hi khuna piˈhapitan ay chita hichi chalan? Hijaot un ta khun mun-an-anla hi nangtuchugwana ay ni hapit Apo Jos.”

³³ Amat hichi ja empacheh chaot an numpfangngad hichi ad Jerusalem. Ja chinakngan cha an na-a-amung hachi himpolo ta oha an adalan ja hachi uchumna an numpun-ibpfa cha. ³⁴ Ja inalin hachi adalan hi, “Umannung an nummahu hi Apo Hesus, ti numpatikhaw ay Simon Peter.” ³⁵ Amat hichi ja impa-innilan khu chin chugwa chin na-at ay chicha hichi ad Emaus, an hay nang-imatunan cha khu ay Apo Hesus hi nangitta-ittangana chin tenapay.

Chin numpatikhan Hesus hachi adalana

³⁶ Ay chuy an khun cha punhahapitan ja numpatikhaw hi Hesus an timmataˈchug ay chuy nuntotongngaan cha, ja inali na hi, “Hay lenong chi magwacha ay chaˈju.” ³⁷ Ja nun-abjot cha ja nang-entata-ot cha, ti khemhon cha un pfanig hitay tinnig cha. ³⁸ Ja inali na ay chicha hi, “Achi aju toma-ot ja achi aju munharhalinchugwa. ³⁹ Tikhagwun ju hay hato hukhat tay ngamoy u ja hay hato hu-iˈ an un ha-in. Aplohonaˈ hot annilaon ju an gway achor u ja tungar u. Ti un chah gway achor ja tungar chi pfanig?” ⁴⁰ Unaot inali hay hato ja impatikhaw na chin ngamoy na ja chin hu-i na. ⁴¹ Nanannor cha ja mun-an-anla cha an nannig ay Hesus muti munharhalinchugwa chamchama chin nomnom cha. Amat hichi ja empfokhan Hesus ay chicha nu gway mapfalin hi ma-an. ⁴² Ja inchat cha han negkhong an khachiw ⁴³ ja tittinnig cha an enala na ja inana.

⁴⁴ Nakhipfoh an nangan ja inali na ay chicha hi, “Hay hato chin inali-aliˈ ay chaˈju chin khun ju pitnuchan ay ha-in, an mahapor an ma-at ay ha-in an amin chi intulaˈ Moses ja chin intulaˈ chin profeta ja hini nitulaˈ an libjun chi Psalms.” ⁴⁵ Amat hichi ja inchatana chicha hi maphod an nomnom an manginnila ay ni hapit Apo Jos. ⁴⁶ Ja inali na ay chicha hi, “Hitay chin nitulaˈ an hapit Apo Jos, an mahapor an matoy hi Kristo ja unot mummahu ay ni me-atlo hi arkhaw. ⁴⁷ Ja ekasaba cha hitay tukhun Apo Jos an allon cha hi, ‘Chuˈkhon ju hana pfahor ju hot pakawanon chaˈju ay Apo Jos.’ Heto ad Jerusalem chi pangte-aan cha an pangtudtuchugwan ja unot hay hana uchumna an apfuglapfuglay.”

⁴⁸ Ja inalin khu Hesus hi, “Chaˈju chi muntihtikhu an umannung hay hato an na-at. ⁴⁹ Ipa-aliˈ hini Espiritu Santo an inalin Ama. Hotti hahadchon ju heto ja achi aju makmakak ingkhana hi umali an mangchat hi apfalinan ju an muntihtikhu.”

Chin timmalakhujan Hesus

⁵⁰ Emmopoh hay hato an inali na ja initnud na hachi na-amung an tatakhu ja nakak cha ad Jerusalem. Un chaot ne-atam ad Betani ja entag-oy na chin ngamoy na ta ijapfana chicha. ⁵¹ Ay chuy an khuna pangijapfan ay chicha ja khun tumalakhuy ad uchu. ⁵² Ja dinaydayaw cha hija ja numpfangngad cha ad Jerusalem an nunhegla chi an-anla cha.

⁵³ Ja khun cha umu-umuy hichi Templo an i mundaydayaw ay Apo Jos.